ەلباسى تۋرالى جۇرت بىلە بەرمەيتىن 12 قىزىقتى دەرەك - فوتو

استانا. قازاقپارات - 1. نۇرسۇلتان - اتا-انانىڭ تىلەۋىمەن تۋعان بالا. اناسى ءالجان ابىشكە تۇرمىسقا شىققاننان كەيىن بەس جىلعا دەيىن قۇرساق كوتەرمەي، اللادان بالا تىلەۋمەن بولادى. شىن تىلەكتى اللا بەرسە كەرەك، كوپ ۇزاماي، ءالجان انا ءتۇس كورەدى.

تۇسىندە تەڭىز تۇبىنەن مىلتىق تاۋىپ الىپ، ونى كۇيەۋى ءابىشتى قۋانتايىن دەپ اسىنىپ العانىن كورەدى. ويانا كەلە ەت جاقىن اعايىندارىنا جورىتقاندا، ولار «ءتۇسىڭ جاقسى ەكەن. قۇداي سەندەرگە ۇل بەرەر» دەيدى. كوپ ۇزاماي دۇنيەگە نۇرسۇلتانداي ۇل كەلەدى.

 

اتا-اناسى ءابىش پەن ءالجان، ىنىلەرى ساتىبالدى مەن بولات، قارىنداسى ءانيپا

2. ەلباسىنىڭ اكەسى ءابىشتىڭ باعبان بولعانىن بىلەسىز بە؟ ءابىش -  ءبىر اعاش پەن ەكىنشىسىن بۋدانداستارىپ ءتۇرلى جەمىس الا بەرەتىن باۋ- باقشانىڭ ناعىز بىلگىرى بولعان. اكەسى تۋرالى نۇرەكەڭنىڭ ءوزى: «جۇرت ءبىزدىڭ باققا كەلىپ، كەرەمەت ءوسىپ تۇرعان تاڭعاجايىپ جەمىستەردى نەمەسە ءبىر جاعىندا كادىمگى اپورت الماسى، ەكىنشى جاعىندا ۋىلجىعان المۇرت ءپىسىپ تۇرعان اعاشتى تاماشالايتىن. اكەم وسىرگەن ونداي جەمىستەردى كەيىن ەش جەردە كورگەن ەمەسپىن. ءوزىنىڭ سۇيىكتى سورتتى الماسى -  اپورتتى ول كەلەسى كوكتەمگە دەيىن بۇزباي ساقتايتىن»، -  دەپ جازادى ءوز ەستەلىگىندە.

 

اكەسى ءابىش

3. ءالجان - دۇعاسى قابىل بولعان انا. يسلام دىنىندە اتا- انانىڭ بالاعا جاساعان دۇعاسى اللا تاراپىنان ءسوزسىز قابىل بولاتىن دۇعالار قاتارىنا جاتادى. تۇڭعىشىنىڭ تىلەۋىن تىلەگەن انا نۇرسۇلتاننىڭ كىشكەنتاي كەزىندە «جارىعىما عۇمىر بەر!» دەپ تىلەپ وتىرسا، كەيىن تەمىرتاۋعا كەتكەنىندە: «ەي، اللا! سۇلتانىما اماندىق، ساۋلىق بەرە گور! جۇلدىزىن جارىق قىلا گور! وزىڭە تاپسىردىم، اللا» دەپ دۇعا ەتپەي ۇيىقتامايدى ەكەن.

 

اناسى الجانمەن

4. نازاربايەۆتىڭ مەككەدە قاعبانىڭ ىشىنە كىرگەنىن، ءمادينادا پايعامبارىمىز (س. ا. س. ) جاتقان جەرگە كىرۋگە رۇقسات العانىن بىلەسىز بە؟ 1996 -جىلى ەلباسىمىز ساۋد ارابياسىنا بارعان ساپارىندا كورولدىڭ ەرەكشە ىقىلاسى ءتۇسىپ، وعان قاسيەتتى جەرلەردىڭ بارلىعىنا كىرۋگە رۇقسات بەرىلەدى. نۇرسۇلتان ءابىش ۇلى سول جاقتىڭ مەشىتتەرىندە ناماز وقىپ، پايعامبارىمىزبەن (س. ا. س) قاتار، ايگىلى ساحابا حامزانىڭ (ر. ا. ) دا ءقابىرىن زيارات ەتەدى.

 

قاجىلىق ساپارىندا

5. ءمادينادا ءۇش اي جاۋماعان جاڭبىر، ءبىزدىڭ ەلباسىمىز بارعان ۋاقىتتا جاۋعان. ارابتار مۇنى ەرەكشە جاعدايعا بالاپ، وعان وزگەشە قۇرمەت كورسەتىپ، التىن تىستى قۇران سىيعا تارتقان. ءتىپتى ەسىمىندەگى «نۇر»، «سۇلتان» سوزدەرىنىڭ اراب تىلىنەن الىنعانىنا نازار اۋدارىپ، ريزا بولىسقان.

 

يسلام فينانسىنىڭ دامۋىنا قوسقان ۇلەسى ءۇشىن ماراپاتتالۋ. بىرىككەن اراب امىرلىكتەرى

6. ەلباسىمىز مۋزىكانى بالا كەزىنەن جاقسى كورگەن. كىشكەنتاي كەزىنەن ماندولين، باياندا ويناي بىلگەن، دومبىرا تارتقان. ءاندى دە جاقسى ايتادى، قوڭىر داۋىسى بار.

 

نۇرسۇلتان ءابىش ۇلى حالىق اندەرىن دومبىرانىڭ سۇيەمەلدەۋىندە وتە ادەمى ورىندايدى

7. نۇرسۇلتان - شەبەر شاڭعىشى. بالا كەزىنەن شاڭعىنى جاقسى كورگەن نۇرسۇلتان ءۇشقوڭىردىڭ بيىگىنەن، نەبىر قيىن جولسىز جەرلەرمەن سىرعاناعاندا الدىنا جان سالماعان ەكەن.

 

رەسەي پرەزيدەنتى ۆ. پۋتينمەن شىمبۇلاق شاڭعى بازاسىنداعى دەمالىس

8. نازاربايەۆ - الپينيست. نۇرسۇلتان تاۋ بالاسى بولعاننان كەيىن بە، الپينيزمگە قاتتى قۇمارتقان. كىشكەنتاي كۇنىندە ءۇشقوڭىردىڭ تاۋ- تاسىن ءجيى ارالاپ كەتەدى ەكەن. كەيىن پرەزيدەنت بولعاننان سوڭ دا كاسىبي الپينيستەرگە ىلەسىپ، بىرنەشە شىڭدى باعىندىرعان. سونىڭ ىشىندە تەڭىز دەڭگەيىنەن 4010 م بيىكتىكتەگى اباي شىڭىنىڭ ورنى ەرەكشە. بۇگىندە الماتى ماڭىندا نۇرسۇلتان شىڭى بار.

 

اباي شىڭىنا كوتەرىلۋ جولىندا الەمگە ايگىلى قازاقستاندىق الپينيست اناتوليي بۋرەيەۆ جولباسشى بولدى

9. نۇرسۇلتان - قۇرالايدى كوزگە اتقان مەرگەن. ەلباسىمىز اڭ اۋلاعاندى، سايات قۇرعاندى جاقسى كورەدى. ءارى ونىڭ مەرگەندىگى تۋرالى ءتۇرلى اڭىزدار بار. بىرگە وقىعان دوسى، بەلگىلى زاڭگەر، كۇنى كەشە دۇنيەدەن وتكەن ماقسۇت نارىكبايەۆ ول تۋرالى: ء«بىر جولى اتقان وعىنىڭ جارتى شاقىرىم قاشىقتىقتا تۇرعان جانۋاردىڭ جۇرەك تۇسىنان ءدال تيگەندىگىن كوردىم. تەك حاس مەرگەن عانا وسىلاي اتا الادى عوي»، - دەگەن بولاتىن كەزىندە.

 

سايات قۇرعان كەز. ورتادا ەل اعالارى دىنمۇحاممەد قونايەۆ پەن نۇرسۇلتان نازاربايەۆ

10. نۇرسۇلتان - اقىن. ونىڭ سۋىرىپ سالاتىن قاسيەتى بار ەكەنىن اينالاسىنداعىلار ءجيى ايتادى. ال ولەڭدەرىمەن تەك جاقىندارى عانا تانىس بولسا كەرەك. حالىق نازارىنا ءالى ۇسىنىلا قويعان جوق. جۇرت تەك «ەلىم مەنىڭ»، «ءۇش قوڭىر» سەكىلدى انگە اينالعان ولەڭدەرىن بىلەدى.

11. نۇرسۇلتان - گولف شەبەرى. ەلباسىمىز حاينان ارالدارىنداعى دەمالىستارىنىڭ بىرىندە گولف ويناۋ شەبەرلىگىمەن جەرگىلىكتى حالىقتى قاتتى تاڭعالدىرىپتى. گولف دوپشاسىن باستاۋ الاڭشادان كومبە الاڭشاداعى شۇڭقىرعا ءبىر ۇرعاننان كىرگىزگەن. تاڭدايلارىن قاققان قىتاي ماماندارى سول جەرگە ەسكەرتكىش تە ورناتپاق بولعان كورىنەدى.

 

12. نۇرسۇلتان ءابىش ۇلى - ءازىلقوي ادام. ول كىسىمەن داستارحانداس بولعان كوپتەگەن ادامدار ەستەلىكتەرىندە ەلباسىمىزدىڭ ەرەكشە ءازىلقوي ادام ەكەندىگىن ايتادى. اسىرەسە ەركىن وتىرىستاردا ءازىل ايتىپ، اينالاسىنداعىلاردى كۇلدىرىپ، كوڭىلدەرىن كوتەرىپ وتىرادى ەكەن.



islam.kz