دينا نۇرپەيىسوۆا جايلى 12 دەرەك
2. نۇرپەيىس - ءبىرىنشى كۇيەۋىنىڭ ەسىمى. نۇرپەيىس ماقات ۇلىمەن دينا بار-جوعى 5 جىل تۇرعان. ديناعا ءتولقۇجات بەرەردە تەگىن جازۋ ءۇشىن اتاسىنىڭ ەسىمىن سۇراعان.
ءبىراق قازاقتىڭ سالت-ءداستۇرى بويىنشا، كەلىن اتا-باباسىنىڭ، اتالارىنىڭ ەسىمدەرىن داۋىستاپ اتاي المايدى. سوندىقتان ول: «مەنىڭ تەگىم نە ءۇشىن كەرەك؟ مىنە، ۇلىم جۇرىنباي نۇرپەيىسوۆ دەپ جازىلعان. مەنى دە سولاي دەپ جازىڭىز»، - دەپ جاۋاپ بەرگەن.
3. كۇيەۋىنەن دينا ءۇشىنشى بالاسىنا ەكىقابات كەزىندە قالعان. سوندىقتان ۇلىنىڭ اتىن جۇرىنباي دەپ قويعان.
4. كۇيەۋى ولگەن سوڭ، امەڭگەرلىك سالتىمەن ونى كۇيەۋىنىڭ ۇلكەن اعاسى نۇرالىعا (ونى ءبارى شاپەك دەپ اتاعان) تۇرمىسقا بەرگەن. نۇرالىدان 10 بالا تاپقان، ءبىراق، كوبى جاستاي شەتىنەپ كەتكەن.
5. اشتىق جىلدارى نۇرالى ءوزىنىڭ ءبىرىنشى وتباسىمەن بىرگە قالىپ، دينا استراحان وبلىسىنا كەتكەن. ول جاقتا ءجۇرىپ قۇمارشىق تەرىپ، سول وسىمدىكتەن كوجە جاساپ، بالالارىن اشتىقتان امان الىپ قالعان.
6. ديناعا دومبىرانى ۇلكەن اپكەلەرىن سۇيەمەلدەپ تۇرۋى ءۇشىن اكەسى كەنجە ۇيرەتكەن. دينانىڭ اپكەلەرى ءاندى جاقسى ايتقان.
7. ول العاش رەت دومبىرانى 5 جاسىندا قولىنا ۇستاعان، ال 9 جاسىندا دومبىرانىڭ قۇلاعىندا ويناعان قىزدىڭ اتاعى كوپكە تاراعان.
8. 9 جاسىندا دينانى العاش رەت قۇرمانعازى كورىپ، كىشكەنتاي قىزدىڭ ونەرىنە ءتانتى بولعان. 19 جاسىنا دەيىن قۇرمانعازى دينانىڭ شەبەرلىگىن شىڭداپ، وعان ءوزىنىڭ بىرنەشە كۇيىن بەرگەن. وسىنىڭ ارقاسىندا قۇرمانعازىنىڭ ويناۋ تەحنيكاسى بىزگە دەيىن جەتىپ وتىر.
9. الماتىعا دينا 75 جاسىندا كوشىپ كەلگەن. احمەت جۇبانوۆ قالي جانتىلەۋوۆ دومبىراشىدان دومبىرانىڭ قۇلاعىندا وينايتىن كەمپىر جايلى ەستيدى. ءسويتىپ ديناعا سماعۇل كوشەكبايەۆتى جىبەرەدى، ول دينانى دومبىراشىلار مەن كۇيشىلەر سلەتىنە كەلۋگە كوندىرگەن.
10. ول 94 جاسقا دەيىن ءومىر ءسۇردى. سوڭعى ءدامى تاۋسىلعانشا باسىنداعى جاۋلىعىن ءوزى بايلاعان. نەمەرەسى بالجاننان ولەر الدىندا دومبىرا اپەرۋىن سۇراعان. شاناقتى ساۋساعىمەن ءتۇرتىپ: «94 جىل بويى بىرگەمىز، مەنىڭ جانىم مەن دومبىرام ءبىر-ءبىرىن قيماي جاتىر»، دەگەن ەكەن.
11. ونىڭ بىرنەشە ۇلى سوعىسقا كەتكەن، ءبىراق، ءبىر بالاسىن بولسا دا جانىندا قالدىرۋدى ەشكىمنەن وتىنبەگەن. لاۋازىمدى تۇلعالارعا ەشقاشان ءوتىنىشىن ايتپاعان. 1916 -جىلى جارلىققا سايكەس ۇلى جۇرىنبايدى تىل جۇمىستارىنا اكەتەدى. دينانىڭ «1916 -جىل» دەپ اتالاتىن كۇيلەر جيناعى بار.
12. «اسەمقوڭىر» اتتى كۇيى باتىس قازاقستان وبلىسى، جالپاقتال اۋىلىنا تۇرمىسقا شىققان قىزى اسەمقوڭىرعا ارنالعان. كۇيدى دينا قىزىن ساعىنىپ، زارىعىپ وتىرىپ شىعارعان.
ايجان حاميتتىڭ فەيسبۋكتەگى جەكە پاراقشاسىنان اۋدارىلدى