قىتايدا 12 الدانعان سالىمشى بىرگە سۋيتسيد جاساماق بولدى

استانا. قازاقپارات - سولتۇستىك قىتايداعى شوۋچجوۋ قالاسىندا (شانسي پروۆينتسياسى) تۇرعىندار ينۆەستيتسيالىق قورعا سالعان اقشالارىن جوعالتقان. كەيىننەن ول قوردىڭ زاڭسىز تىركەلگەنى جانە الاياقتاردىڭ اسىرعان ايلاسى انىقتالىپ، بۇعان قاتىستى قىلمىستىق ءىس قوزعالعان.

ال تەرگەۋ ناتيجەسىنە كوڭىلى تولماعان 12 سالىمشى التى قاباتتى اكىمشىلىك عيماراتتىڭ توبەسىنە شىعىپ، ودان سەكىرمەك بولعان. بۇل تۋرالى «چجۋنگو سينۆەن» اگەنتتىگى حابارلادى.

سودان كەيىن، جەرگىلىكتى بيلىك پەن پوليتسيا وكىلدەرى بەس ساعات بويى كەلىسسوزدەر جۇرگىزىپ، الدانىپ قالعان سالىمشىلاردى اقىلعا شاقىرىپ، بۇل نيەتتەرىنەن كەرى قايتۋعا كوندىرگەن. بارلىق سالىمشىلار «حەلي» دەپ اتالاتىن ينۆەستيتسيالىق قورعا ءوز اقشالارىن سالعان.

قوردىڭ يەسى ولارعا دەپوزيتتەر بويىنشا جوعارى پايىزدىق ستاۆكالار تولەۋگە ۋادە ەتكەن، ءبىراق ونىڭ ورنىنا اقشانى جىمقىرىپ، قاشىپ كەتكەن. وتكەن جىلدىڭ قاراشا ايىندا زاڭسىز قارجىلىق قىزمەتىن كورسەتپەك بولعان الاياقتاردىڭ ۇشەۋى قاماۋعا الىنىپ، ءتورتىنشى كۇدىكتى قاشىپ كەتكەن بولاتىن. قوردىڭ قاشقىن يەسى مەن سالىمشىلاردىڭ اقشاسىن ىزدەۋ جۇمىستارى ءالى ناتيجە اكەلمەدى.

تەرگەۋ وكىلدەرى الدانعان سالىمشىلارعا قاشىپ كەتكەن الاياق پەن ۇرلانعان قاراجاتتى ىزدەستىرۋگە بەلسەندى تۇردە كىرىسەتىنىن ايتىپ، ۋادە بەردى، دەپ جازادى khabar.kz.