پەتروپاۆلداعى مەكتەپ وقۋشىسى ۇ ب ت- دان 128 بالل الدى
س ق و ءبىلىم باسقارماسى باسپا ءسوز قىزمەتىنىڭ مالىمەتىنشە، ۇ ب ت- دا وبلىس بويىنشا ازىرگە ەڭ جوعارى بالل جيناعان دميتريي اننەنكوۆ پەتروپاۆل قالالىق ءبىرىنشى جالپى ءبىلىم بەرەتىن IT ليتسەيىنىڭ تۇلەگى. ول تەست تاپسىرۋعا بەرىلەتىن مۇمكىندىكتىڭ العاشقىسىندا 128 بالل جينادى. «ۇ ب ت- عا بىرنەشە اي دايىندالىم. ءتۇرلى نۇسقالارىمەن جۇمىس ىستەدىم. ءبىراق ۇ ب ت كەزىندە، مەنىڭشە، سۇراقتار قيىنداۋ بولدى. بەيىندىك پاندەر رەتىندە مەن ماتەماتيكا مەن فيزيكانى تاڭداعان ەدىم. ماتەماتيكا 11 جىل بويى مەنىڭ سۇيىكتى ءپانىم بولدى»، - دەيدى دميتري اننەنكوۆ.
بيىل بۇل وقۋ ورنىن 39 تۇلەك بىتىرمەك. ولاردىڭ ءبىرقاتارى 120 ۇپايدان جوعارى ناتيجە كورسەتىپ ۇلگەردى.
«بيىلعى تۇلەكتەر ءۇشىن وقۋ جىلى وڭاي بولعان جوق. العاشقى ەكى توقساندى قاشىقتان وقىدى. سوندىقتان ۇ ب ت- عا دايىندىقتى ءۇشىنشى توقساننان عانا باستادىق. ءبىزدىڭ وقۋشىمىز بۇگىنگى كۇنى وبلىس بويىنشا ەڭ جوعارى بالل الىپ وتىر، مۇنى ماقتانىشپەن ايتامىز. ۇ ب ت- نىڭ اياقتالۋىنا ءالى ءبىر اي ۋاقىت بار. سوندىقتان بۇدان دا جوعارى كورسەتكىشكە ءالى دە قول جەتكىزەمىز دەپ ويلايمىن»، - دەيدى پەتروپاۆل قالالىق ءبىرىنشى جالپى ءبىلىم بەرەتىن IT ليتسەيىنىڭ ديرەكتورى وكسانا نوۆيكوۆا.
«التىن بەلگىگە» ۇمىتكەر دميتري اننەنكوۆ ەندى مەكتەپتەگى ەمتيحاندارىنا دايىندالماق.
«ۇ ب ت- دا العان ۇپايىم كوڭىلىمنەن شىقتى. ويتكەنى مەن وزىمە 120-دان كەم المايمىن دەپ مەجە قويعان ەدىم. مەحانيكا- ماتەماتيكالىق فاكۋلتەتكە، قولدانبالى ماتەماتيكا جانە ينفورماتيكا ماماندىعى بويىنشا تۇسپەكپىن، عىلىم جولىن تاڭداۋىم مۇمكىن»، - دەيدى مەكتەپ تۇلەگى. بيىل س ق و- دا 11-سىنىپتىڭ 2456 وقۋشىسى ۇ ب ت تاپسىرۋعا ءوتىنىش بەرگەن ەدى.
