15:56, 02 - ءساۋىر 2017 | GMT +5
سۋ تاسقىنىنان 127 ادام اجال قۇشتى
استانا. قازاقپارات - كولۋمبيانىڭ پۋتۋمايو دەپارتامەنتى موكوا مۋنيتسيپاليتەتىندە وزەندەردىڭ تاسۋىنان 127 ادام اجال قۇشتى.
بۇل تۋرالى شينحۋا اگەنتتىگى حالىقارالىق قىزىل كرەس ۇيىمىنا سىلتەمەمەن حابارلادى. بۇعان دەيىن Associated Press كولۋمبيا پرەزيدەنتى حۋان مانۋەل سانتوستىڭ مالىمدەمەسىنە سۇيەنە وتىرىپ، اپاتتان 112 ادامنىڭ كوز جۇمعانىن حابارلاعان ەدى.
نوسەر جاۋىن سالدارىنان وزەندەر ارناسىنان اسىپ، تاسىپ جاتىر. سۋدىڭ كوپ بولىگى تاڭسارىدەن تۇرعىن ۇيلەردى شايىپ، ادامداردىڭ ءومىرىن توسىننان قيىپ كەتكەن. مۋنيتسيپاليتەتتەگى كوپتەگەن كوپىر قيراعان.
كولىكتەر دە اساۋ تولقىنداردىڭ جالىندا كەتە بارعان. ەل پرەزيدەنتى قازا بولعانداردىڭ تۋعان-تۋىستارىنا كوڭىل ايتا وتىرىپ، قۇتقارۋشىلار مەن قارۋلى كۇشتەرگە جاپا شەككەندەرگە شۇعىل كومەك كورسەتۋدى تاپسىردى.
