09:55, 06 - قىركۇيەك 2022 | GMT +5
اباي وبلىسىندا اۋەزوۆتىڭ 125 جىلدىعىنا وراي «ەڭلىك- كەبەك» ەسكەرتكىشى جاڭارتىلادى - فوتو
سەمەي. قازاقپارات - اباي وبلىسىندا مۇحتار اۋەزوۆتىڭ 125 جىلدىعىنا وراي «ەڭلىك- كەبەك» ەسكەرتكىشى اشىلادى، دەپ حابارلايدى قازاقپارات ءتىلشىسى.
بيىل زاڭعار جازۋشى مۇحتار اۋەزوۆتىڭ 125 جىلدىعى. قازاق قارا ءسوزىنىڭ حاس شەبەرىنىڭ قۇرمەتىنە اباي وبلىسىندا ءبىرقاتار شارا وتكىزىلەدى دەپ جوسپارلانۋدا. سونىڭ ءبىرى - اباي اۋدانىنداعى «ەڭلىك- كەبەك» ەسكەرتكىشىنىڭ اشىلۋى بولماق.
«مۇحتار اۋەزوۆتىڭ 125 جىلدىعى اياسىندا وبلىس اكىمى نۇرلان ۇرانحايەۆتىڭ تاپسىرماسىنا سايكەس، اباي اۋدانىنىڭ اۋماعىندا ورنالاسقان «ەڭلىك-كەبەك» كەسەنەسىنە جوندەۋ جۇمىستارى جۇرگىزىلۋدە. جۇمىستار تامىز ايىنىڭ اياعىندا باستالدى. سونىمەن قاتار قوس عاشىققا ارنالعان ەسكەرتكىش ورناتىلادى. جۇمىستار وسى جىلدىڭ قىركۇيەك ايىنىڭ سوڭىندا اياقتالادى»، - دەپ حابارلادى وبلىس اكىمدىگىنىڭ باسپا ءسوز قىزمەتى.
ايتا كەتەيىك، مۇحتار اۋەزوۆ تراگەديا جانرىنداعى «ەڭلىك- كەبەك» پەساسىن 1922 -جىلى جازعان.
اۆتور تالعاتجان مۇحامەتبەك ۇلى
