استانادا ءورت شىققان ۇيدەن 125 ادام ەۆاكۋاتسيالانىپ، 3 بالا اۋرۋحاناعا ءتۇستى

استانا. قازاقپارات - استانادا كوپقاباتتى تۇرعىن ءۇيدىڭ 2-قاباتتاعى پاتەردەن ءورت شىعىپ، تۇرعىندار ەۆاكۋاتسيالاندى، دەپ حابارلايدى قازاقپارات ءتىلشىسى قالالىق توتەنشە جاعدايلار دەپارتامەنتىنىڭ باسپا ءسوز قىزمەتىنە سىلتەمە جاساپ.

«21- اقپان ساعات 12:26 دا قالالىق توتەنشە جاعدايلار دەپارتامەنتىنە سارىارقا اۋدانى قوسشىعۇل ۇلى كوشەسى، 22/1 مەكەنجايىندا ءورت شىققانى تۋرالى حابار ءتۇستى. وقيعا ورنىنا جەتكەن ءورت سوندىرۋشىلەر كوپقاباتتى تۇرعىن ءۇيدىڭ 2- قاباتىندا ورنالاسقان پاتەردە 25 شارشى مەتردە جيھاز بەن ءۇي زاتتارىنىڭ جانىپ جاتقانىن انىقتادى»، - دەلىنگەن حابارلامادا.

ەلوردالىق ءورت سوندىرۋشىلەر اۆتوساتى كومەگىمەن 26 ادامدى ءورت اۋماعىنان امان الىپ شىقتى.

ونىڭ ىشىندە 13 بالا بار. جالپى سانى 125 كە جۋىق ادام ەۆاكۋاتسيالاندى.

«جەدەل جاردەم بريگاداسى مەن اپاتتار مەديتسيناسى ورتالىعىنىڭ دارىگەرلەرى 6 ادامعا، (ۇشەۋى بالا) مەديتسينالىق كومەك كورسەتۋ ءۇشىن اۋرۋحاناعا جەتكىزدى»، - دەيدى ۆەدومستۆودان.

رەسمي اقپاراتتا ايتىلعانداي، ءتىلسىز جاۋمەن كۇرەسكە جەكە قۇرامنىڭ 18 مامانى جانە 4 تەحنيكا جۇمىلدىرىلدى.