قازاقستاندا قوسىمشا ورتكە قارسى قىزمەتتىڭ 121 دەپوسىن سالۋ قاجەت
سەناتور سەرگەي ەرشوۆ ءوزىنىڭ دەپۋتاتتىق ساۋالىندا وسى ماسەلەنى جاريا ەتتى، دەپ حابارلايدى قازاقپارات ءتىلشىسى.
دەپۋتات جاعدايعا ەگجەي-تەگجەيلى تالداۋ جاساۋ بارىسىندا ماڭىزدى ەكى پروبلەما انىقتالعانىن اتاپ ءوتتى. ءبىرىنشىسى - توتەنشە جاعدايمەن كۇرەستە الەۋەتتى كۇشتەر مەن ءتيىستى قۇرالداردىڭ جەتىسپەۋى. ەكىنشىسى - توتەنشە جاعدايدان قورعاۋدى قامتاماسىز ەتۋدەگى جۇيەلى ءتاسىلدىڭ بولماۋى.
«ەلىمىزدە مەملەكەتتىك ورتكە قارسى قىزمەتتىڭ 426 بولىمشەسى بار، ءالى قوسىمشا 121 دەپو سالۋ قاجەت. بىزگە ۇسىنىلعان مالىمەتتەرگە سايكەس، ءتىپتى 2030-جىلعا قاراي ءورت ءسوندىرۋ بولىمشەلەرىن سالۋ قاجەتتىگى تەك 55 پايىزعا عانا ورىندالادى. جالپى تەحنيكا سانىنىڭ شامامەن 20 پايىزۆى وتكەن عاسىردىڭ 70-90-جىلدارىنان باستاپ پايدالانىلىپ كەلەدى جانە جاڭارتۋدى تالاپ ەتەدى»، - دەپ اتاپ ءوتتى سەناتور ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
دەپۋتات پروبلەمالاردى شەشۋگە قارجى بولىنەتىنىن، ءبىراق ەسەپ-قيساپقا قاراعاندا يگەرىلمەيتىنىن اتاپ ءوتتى.
س. ەرشوۆ 2018-جىلدىڭ جەلتوقسانىندا وسى سالاداعى ەرەكشە مەكەمە - كاسىبي اسكەريلەندىرىلگەن اۆاريالىق-قۇتقارۋ قىزمەتى جەكەشەلەنىپ كەتكەنىن ەسكە سالدى. وسى شەشىمنىڭ ناتيجەسىندە مەملەكەت اسا كۇردەلى اۆاريانى جەدەل جويۋدى قامتاماسىز ەتە الاتىن مامانداندىرىلعان قىزمەتتەن ايىرىلىپ قالدى. توتەنشە جاعدايلار مينيسترلىگىنىڭ اقپاراتىنا قاراعاندا، قازاقستان اۋماعىندا مەملەكەتتىك ەمەس ورتكە قارسى 331 قىزمەت نىسانى بار. بۇل ەلىمىزدەگى ءورت ءسوندىرۋ بولىمشەلەرىنىڭ جارتىسىنا جۋىعى مەملەكەتتىك ەمەس دەگەندى بىلدىرەدى.
سەناتور جەكەشەلەنگەن كاسىپورىندار پورتفەلىن ءارتاراپتاندىرۋ، سونداي-اق توتەنشە جاعدايدى جويۋ بارىسىندا مەملەكەتتىك ەمەس ۇيىمداردىڭ جاۋاپكەرشىلىگى جونىندە نورماتيۆتىك- قۇقىقتىق رەتتەۋدى جەتىلدىرۋدى ۇسىندى.
