شىعىس قازاقستاندا تاماقتان ۋلانعان وقۋشىلار سانى 120 دان استى
بوزانباي اۋىلىنداعى مەكتەپ وقۋشىلارىنىڭ جاپپاي ۋلانۋىنا بايلانىستى تەكسەرۋ جۇرگىزىلۋدە. سوڭعى مالىمەتتەرگە سۇيەنسەك، زارداپ شەككەن بالالار سانى 127 گە جەتىپ وتىر. ش ق و سانيتارلىق- ەپيدەميولوگيالىق باقىلاۋ دەپارتامەنتىنىڭ باستىعى قانات تۇرديەۆ ونلاين فورماتتا وتكەن باسپا ءسوز كونفەرەنسياسىندا اتقارىلىپ جاتقان جۇمىستارعا توقتالدى.
29-ناۋرىزداعى جاعداي بويىنشا 14 جاسقا دەيىنگى 93 بالا، 28 جاس ءوسپىرىم جانە التى ەرەسەك ادام ۋلانعان. بۇل 127 ادامنىڭ 110 ى بوزانباي ورتا مەكتەبىنىڭ وقۋشىلارى.
«ناۋقاستاردىڭ دەنە قىزۋى كوتەرىلىپ، جۇرەكتەرى اينىپ، قۇسىپ، ىشتەرى وتكەن. وسكەمەندەگى انا مەن بالا ورتالىعىنىڭ جۇقپالى اۋرۋلار بولىمىنە 62 بالا جاتقىزىلدى. قالعانداردى ۇيلەرىندە دارىگەر باقىلاۋىندا»، - دەدى قانات تۇرديەۆ.
ونىڭ ايتۋىنشا، ەپيدەميولوگيالىق تەكسەرۋ بارىسىندا ۋلانعاندارمەن بايلانىستا بولعان 383 ادام انىقتالعان. ولارعا دا مەديتسينالىق باقىلاۋ جۇرگىزىلۋدە.
«قازىرگى ۋاقىتتا دەپارتامەنت ماماندارى مەن ۇلتتىق ساراپتاما ورتالىعى تەكسەرۋ جۇمىستارىن جالعاستىرىپ جاتىر. قۇقىق قورعاۋ ورگاندارىمەن قوزعالعان قىلمىستىق ءىس بويىنشا زەرتحانالىق زەرتتەۋلەرگە تاماق ونىمدەرىنىڭ سىناماسى الىندى. مەكتەپ كارانتينگە جابىلعان»، - دەدى ش ق و سانيتارلىق- ەپيدەميولوگيالىق باقىلاۋ دەپارتامەنتىنىڭ باستىعى.
ەستەرىڭىزگە سالا كەتسەك، وسىعان دەيىن ش ق و-داعى مەكتەپ وقۋشىلارىنىڭ تاماقتان ۋلانعانى حابارلانعان بولاتىن.
اۆتور: تالعاتجان مۇحامەتبەك ۇلى
