قازاقستاندىق 120 سارباز ب ۇ ۇ مەدالىمەن ماراپاتتالدى
باسپا ءسوز مالىمەتتەرىنە قاراعاندا، ناگرادالاردى تابىستاۋ سالتاناتتى ءراسىمى ليۆانداعى ب ۇ ۇ- نىڭ بەكەتىندە ءوتتى. وعان 600 دەن اسا ادام قاتىستى. ونىڭ ىشىندە، 30 ەلدىڭ ەلشىسى مەن اسكەري اتتاشەسى، «شىعىس» سەكتورى بولىمشەلەرىنىڭ كومانديرلەرى بار.
ءراسىم جالاۋلاردى شىعارۋ جانە قاتىسۋشى ەلدەردىڭ مەملەكەتتىك ءانۇرانىن ورىنداۋدان باستالدى. ءراسىمنىڭ بارلىق قاتىسۋشىلارى الدىندا «شىعىس» سەكتورىنىڭ كومانديرى گەنەرال- مايور انتونيو رومەرو ءسوز سويلەپ، بىتىمگەرشىلىك ميسسياعا قوسقان ۇلەستەرى مەن ادال قىزمەتتەرى ءۇشىن بىتىمگەرشىلەرگە العىسىن ءبىلدىردى. 120 قازاقستاندىق اسكەري قىزمەتشىنى ب ۇ ۇ- نىڭ «بەيبىتشىلىك ءۇشىن قىزمەت» مەدالدارىمەن ماراپاتتادى.
«بۇل مەن ءۇشىن جانە بارشا جەكە قۇرام ءۇشىن زور قۇرمەت. ءبىز جاي عانا مەدالدار العان جوقپىز. ءبىز ءۇشىن ءبىرىنشى كەزەكتە بۇل بىتىمگەرشىلىك قىزمەتكە قوسقان ۇلەسىمىز ءۇشىن مەملەكەتىمىزگە دەگەن قۇرمەت. ليۆانداعى بىتىمگەرشىلىك ميسسيا مەن ءۇشىن ءبىرىنشى، ونىڭ ۇستىنە، روتا كومانديرى لاۋازىمىندا ءوتتى. بۇل بىزگە ۇلكەن جاۋاپكەرشىلىكتى جۇكتەيدى. ءبىراق، ءبىزدىڭ الدىمىزدا ءبىر ورتاق ماقسات تۇر - تاۋەلسىز قازاقستاننىڭ تۋى استىندا ادال قىزمەت اتقارۋ»، - دەدى مايور ايان نۇرقاسوۆ.
سالتاناتتى راسىمنەن كەيىن قازاقستاندىق بىتىمگەرشىلىك روتانىڭ كوركەمونەرپازدار ۇجىمى ۇيىمداستىرعان كونسەرت ءوتتى.
ەستەرىڭىزگە سالا كەتسەك، قازاقستاندىق بىتىمگەرشىلەردىڭ ءبىرىنشى روتاسى ب ۇ ۇ بىتىمگەرشىلىك ميسسياسىنىڭ مەرزىمى 2019 -جىلعى ءساۋىردىڭ اياعىندا اياقتالادى. ولاردىڭ ورنىنا قازىرگى كەزدە دايىندىقتان ءوتىپ جاتقان ەكىنشى روتا ليۆانعا اتتانادى.
