تويدان قايتقان: 11 ادامنىڭ سىردارياعا قالاي باتىپ كەتكەنىنە قاتىستى العاشقى بولجام ايتىلدى

تۇركىستان. قازاقپارات - تۇركىستان وبلىسىندا سىرداريا سۋىنا باتىپ كەتكەن وتباسى تويدان شىققان سوڭ، سۋ جاعاسىنا دەمالۋعا بارعان، دەپ حابارلايدى قازاقپارات ءتىلشىسى.

تۇركىستان وبلىسىندا سىرداريا سۋىنا باتىپ كەتكەن ادامداردى ىزدەستىرۋ جۇمىستارى توقتاۋسىز جۇرگىزىلىپ جاتىر. ازىرگە 11 ادامنىڭ 8 نىڭ دەنەسى تابىلدى. ال، قالعان ءۇش ادامدى ىزدەۋ جۇمىستارى كەشەلى بەرى جۇرگىزىلىپ جاتىر. ولاردىڭ ەكەۋى كامەلەتكە تولماعان جاسوسپىرىمدەر.

«وتە اۋىر جاعداي. بۇل جەردە ءبىر اۋلەتتىڭ وتباسى تويدان شىققان سوڭ سۋ جاعاسىنا دەمالۋعا بارعان. بارشاسى شومىلاتىن جەر ەمەس ەكەندىگىن بىلگەن. سەبەبى، ەشبىرى سۋعا شومىلاتىن كيىممەن تۇسپەگەن. سۋ جاعاسىندا وتىرعاندا كىشكەنتاي قىزدىڭ ءبىرى اياعى تايىپ، قۇلاپ كەتكەن. ونى قۇتقارماقشى بولىپ سوڭىنان اناسى سەكىرگەن، اكەسى سەكىرگەن. سودان اعىن سۋدان شىعا الماي قالعان دەگەن بولجام بار. ال، امان قالعان وتباسى مۇشەلەرىنە كورشىلەرى مەن اعايىندارى كومەكتەسكەن» - دەلىنگەن تۇركىستان وبلىسى اكىمدىگى تاراپىنان بەرىلگەن اقپاراتتا.

ەسكە سالايىق، قايعىلى جاعداي وتىرار اۋدانىنداعى سىرداريا وزەنىنەن وتەتىن كوپىر ماڭىندا بولدى. سۋعا كەتكەندەردىڭ بارلىعى 4 اعايىندىنىڭ وتباسى مۇشەلەرى، ولار تىيىم سالىنعان جەرگە شومىلۋعا بارعان دەگەن اقپارات تارادى.

سۋعا كەتكەن 11 ادامنىڭ سەگىزىنىڭ دەنەسى تابىلدى. قالعان 3 ادامنىڭ ءمايىتىن ىزدەۋ جالعاسىپ جاتىر.