ءبىر اۋلەتتىڭ 11 ادامى سۋعا كەتتى: تۇركىستان وبلىسىنىڭ باسشىلىعى وقيعا ورنىنا باردى

تۇركىستان. قازاقپارات - تۇركىستان وبلىسىنىڭ باسشىلىعى سىرداريا وزەنىنە باتىپ كەتكەن ادامداردى ىزدەستىرۋ جۇمىستارىن باقىلاۋ ءۇشىن وقيعا ورنىنا باردى، دەپ حابارلايدى قازاقپارات ءتىلشىسى.

وسى ۋاقىتتاعى جاعداي بويىنشا، سۋعا كەتكەن 11 ادامنىڭ سەگىزىنىڭ دەنەسى تابىلدى. قالعان 3 ادامنىڭ ءمايىتىن ىزدەۋ جالعاسىپ جاتىر. ولاردىڭ بارشاسى كوكساراي اۋىلىندا تۇراتىن ءبىر اۋلەتتىڭ ادامدارى.

«جاعداي وبلىس باسشىسى دارحان امانگەلدى ۇلىنىڭ تىكەلەي باقىلاۋىندا. وبلىس اكىمىنىڭ ءبىرىنشى ورىنباسارى ز ۇلىپحار جولداسوۆ پەن وبلىس اكىمىنىڭ ورىنباسارى بەيسەن تاجىبايەۆ اتالعان جەردە بولىپ، نۇسقاۋلىقتار جۇرگىزدى. قايعى جامىلعان اۋلەتتىڭ ۇيىنە بارىپ، كوڭىل ايتتى. ءتيىستى كومەك ۇيىمداستىرىلاتىن بولادى»، - دەلىنگەن تۇركىستان وبلىسى اكىمدىگى تاراتقان حابارلامادا.

قازىر وقيعا ورنىندا 144 بريگادا، 16 تەحنيكا، 6 ءجۇزۋ قۇرالى جۇمىس ىستەپ جاتىر. ىزدەستىرۋ شارالارى تۇندە دە توقتاعان جوق.

وبلىستىق توتەنشە جاعدايلار دەپارتامەنتى جانىنان جەدەل شتاب جۇمىس ىستەپ تۇر.

ەسكە سالايىق، قايعىلى جاعداي وتىرار اۋدانىنداعى سىرداريا وزەنىنەن وتەتىن كوپىر ماڭىندا بولدى. سۋعا كەتكەندەردىڭ بارلىعى 4 اعايىندىنىڭ وتباسى مۇشەلەرى، ولار تىيىم سالىنعان جەرگە شومىلۋعا بارعان.