جىل باسىنان بەرى 11 اسكەري قىزمەتشى قايتىس بولدى
بۇل تۋرالى قازاقستان قارۋلى كۇشتەرى باس اسكەري مەديتسينالىق باسقارماسى باستىعىنىڭ ورىنباسارى بەرىك ءىلياسوۆ ايتتى، دەپ حابارلايدى قازاقپارات ءتىلشىسى.
«جىل باسىنان بەرى 11 اسكەري قىزمەتشى قايتىس بولدى. سونىڭ ىشىندە جەتەۋى العان جاراقاتىنان، ال ءتورت ادام ناۋقاسىنا بايلانىستى دۇنيەدەن ءوتتى. وسىنىڭ اراسىندا مەرزىمدى اسكەري قىزمەتتە بولعان ساربازداردىڭ ەكەۋى كوز جۇمدى. ونىڭ ءبىرى قاڭتار ايىندا پاراشيۋتپەن سەكىرۋ كەزىندە، ەكىنشىسى - ونكولوگيالىق اۋرۋ سالدارىنان قايتىس بولدى»، - دەدى بەرىك ءىلياسوۆ سەناتتا تىلشىلەر سۇراعىنا جاۋاپ بەرە وتىرىپ.
بۇدان بۇرىن حابارلانعانداي، 2020-جىلدان باستاپ 270 اسكەري قىزمەتشى قايتىس بولدى.
ءولىم جاعدايلارىنىڭ ەڭ كوپ تاراعان سەبەپتەرىنە توقتالساق، اۋىرىپ قايتىس بولۋ - %36، كولىك اپاتىنىڭ سالدارى - %24، سۋيتسيد - %20.
ەسكە سالساق، 18- قاڭتار كۇنى استانا قالاسىنىڭ ماڭايىندا پاراشيۋتپەن جوسپارلى سەكىرۋ بويىنشا وقۋ-جاۋىنگەرلىك تاپسىرمالارىن ورىنداۋ بارىسىندا مەرزىمدى قىزمەتتەگى سارباز قازا تاپتى.
