سوۆەت ۇكىمەتىنىڭ قولىنان قازاقتىڭ 11 حالىق اعارتۋ كوميسسارى قازا تاپقان - عاريفوللا انەس

نۇر- سۇلتان. قازاقپارات - حالىق اعارتۋ كوميسسارياتى ءبىلىم جانە عىلىم، مادەنيەت، سپورت، تۋريزم، باسپا ءسوز سياقتى بىرنەشە مينيسترلىكتىڭ قىزمەتىن اتقاردى.

بۇل جايىندا «قازاق رەسپۋبليكاسىنىڭ 100 جىلدىعى جانە ونىڭ قۇرىلۋىنا «الاش» قايراتكەرلەرىنىڭ قوسقان ۇلەسى» اتتى ونلاين كونفەرەنسيادا ايتىلدى، دەپ حابارلايدى قازاقپارات ءتىلشىسى.

«1920 -جىلى ورىنبوردا قازاق اۆتونومياسىنىڭ ءبىرىنشى سيەزى ءوتتى. سول قۇرىلتايدا باسشىلار تاعايىندالدى. سول كەزدە ۇلتتىق كوميسسارياتتار، قازىرگى تىلمەن ايتقاندا مينيسترلىكتەر قۇرىلدى. ادىلەت مينيسترلىگى، ىشكى ىستەر مينيسترلىگى، دەنساۋلىق مينيسترلىگى، جەر مينيسترلىگى قۇرىلدى. وسىنىڭ ىشىندە قازاق حالقىنىڭ رۋحانياتىنا جۇمىس ىستەگەن مينيسترلىك - حالىق اعارتۋ كوميسسارياتى بولدى. ول ءبىلىم جانە عىلىم، مادەنيەت، سپورت، تۋريزم، باسپا ءسوز سياقتى بىرنەشە مينيسترلىكتىڭ قىزمەتىن اتقاردى. العاشقى حالىق اعارتۋ كوميسسارى - احمەت بايتۇرسىنوۆ ەدى. ول 1920 -جىلدىڭ قازانىنان 1921 -جىلدىڭ قازان ايىنا دەيىن ءبىر جىل قىزمەت اتقاردى. احمەت بايتۇرسىنوۆتى قوسقاندا 12 حالىق اعارتۋ كوميسسارى بولدى. ولاردىڭ ءبارى 1-2 جىلدان قىزمەت اتقاردى. سونىڭ ىشىندە بىرەۋىنىڭ عانا تاعدىرى بەلگىسىز، قالعان 11- ءى سوۆەت ۇكىمەتىنىڭ قولىنان قازا تاپقان»، - دەيدى فيلولوگيا عىلىمدارىنىڭ دوكتورى، پروفەسسور عاريفوللا انەس.

ونىڭ ايتۋىنشا، ءار حالىق اعارتۋ كوميسسارىنىڭ سول سالادى ەتكەن ەڭبەگى زور. «قازاق حالقىنىڭ رۋحانياتى ءۇشىن تەر توككەن كوميسسارلاردىڭ ءبارى رەپرەسسياعا ۇشىرادى. جاس ۇرپاققا بارلىق شىندىقتى ايتۋ كەرەك. «اق جول» دەموكراتيالىق پارتياسى ءا. بوكەيحانوۆتىڭ 30 تومدىعىن، ەنتسيكلوپەدياسىن، الاش قايراتكەرلەرىنىڭ كىتابىن شىعاردى. سول ءۇشىن العىس ايتامىز»، - دەيدى ول.

ەسكە سالا كەتەيىك، اتالعان شارانى «اق جول» دەموكراتيالىق پارتياسى «الاش» ينستيتۋتىمەن بىرگە ۇيىمداستىرعان بولاتىن.

اۆتور: زارينا قاھارمان