كوروناۆيرۋس: 11 كۇننەن كەيىن ناۋقاستاردىڭ اينالاعا قاۋپى ازايادى

نۇر- سۇلتان. قازاقپارات – ق ر باس مەملەكەتتىك سانيتارلىق دارىگەر ايجان ەسماعامبەتوۆا كوروناۆيرۋس سيمپتوممەن ءوتىپ جاتقان ناۋقاستاردان قاۋىپ قاي كەزدە جوعارى بولاتىنىن ءتۇسىندىردى، دەپ حابارلايدى قازاقپارات ءتىلشىسى.

«كوروناۆيرۋس پايدا بولعاندا، ينفەكتسيانىڭ قالاي تارالاتىنىن، قانشالىقتى جۇقپالى ەكەنىن، قالاي ەمدەۋ كەرەكتىگىن ەشكىم بىلگەن جوق. بۇل تاجىريبەنىڭ بارلىعى جيناقتالدى. 18 ميلليون حالىققا شامامەن 1 ميلليون تەست جاسالدى. تەست جۇرگىزىلەتىن توپتاردى ۇنەمى كەڭەيتىپ وتىردىق. بۇل، سيمپتومسىز ناۋقاستاردى انىقتاۋعا كومەكتەستى. ءتىپتى سيمپتومسىز ناۋقاستار سانى كوبەيىپ، %80 جەتتى. الەمنىڭ كوپتەگەن ەلدەرى مۇنداي تەستىلەۋدى ءالى جۇرگىزگەن جوق»، - دەدى باس سانيتارلىق دارىگەر Facebook-تە وتكەن ونلاين- بريفينگتە.

سونىمەن بىرگە، سپيكەر سيمپتومدى ناۋقاستار 11كۇننەن كەيىن اينالاعا قاۋىپسىز بولاتىنىن جەتكىزدى.

«سيمپتومسىز ناۋقاستاردى انىقتاۋ ارقىلى ينفەكتسيانىڭ قوعامعا قالاي تارالاتىنىن باعالادىق. جيناقتالعان تاجىريبەلەر ناۋقاستار اۋرۋ بەلگىلەرى بايقالعانشا - العاشقى ەكى كۇن، بايقالعان سوڭ 7 كۇن ارالىعىندا اينالاسىنا قاۋىپ تۋدىراتىنىن كورسەتتى. ياعني، 11كۇننەن كەيىن اينالاعا ءقاۋىپ ازايادى. بۇل جەردە تەست وڭ ناتيجە كورسەتۋى دە مۇمكىن»، - دەدى ا. ەسماعامبەتوۆا. بۇعان دەيىن ا. ەسماعامبەتوۆا جۇمىس بەرۋشىلەرگە پ ت ر- تەستىلەۋدىڭ ناتيجەسى تۋرالى انىقتامانى تالاپ ەتۋ مىندەتتەلمەگەنىن ايتقان ەدى.