الماتىدا كارانتين رەجيمى 11-مامىردان كەيىن دە ساقتالادى
الماتى قالاسىنىڭ مەملەكەتتىك باس سانيتارلىق دارىگەرى جانداربەك بەكشيننىڭ ايتۋىنشا، 11-مامىردان كەيىن شاھاردا كارانتين رەجيمى ساقتالادى. وسى ورايدا، الماتىلىقتار مەديتسينالىق بەتپەردە كيىپ، جەكە باسىنىڭ قاۋىپسىزدىگى مەن ىندەتتىڭ الدىن الۋ ءۇشىن دەزينفەكسيالىق جانە انتيسەپتيكالىق قۇرالداردى پايدالانۋدى توقتاتپاۋى كەرەك.
«بارلىق قاۋىپسىزدىك شارالارى ساقتالاتىنىن ايتقىم كەلەدى. توتەنشە جاعداي رەجيمى اياقتالعان كۇننىڭ وزىندە شەكتەۋ شارالارى، سانيتارلىق- ەپيدەميولوگيالىق تالاپتار ساقتالادى. مەنىڭ ويىمشا، بۇل - بىزگە ءالى دە قاجەت. ويتكەنى، كوروناۆيرۋس ينفەكسياسىن جۇقتىرۋ ءقاۋپى تولىق سەيىلگەن جوق»، - دەدى ج. بەكشين.
بۇل رەتتە، قالا تۇرعىندارىنا حالىق كوپ شوعىرلاناتىن جەرلەرگە بارماۋعا كەڭەس بەرىلدى. دۇكەن، شاشتاراز، كيىم تازالايتىن مەكەمەلەرگە بارعاندا الەۋمەتتىك قاشىقتىقتى ساقتاۋ قاجەت. سونداي-اق، قىزمەتكەرلەردەن قاراپايىم گيگيەنا ەرەجەلەرىن ساقتاۋ تالاپ ەتىلەدى. ج. بەكشين ادامدار الدىن الا جازىلۋ ءتارتىبىن ساقتاپ، ۇلكەن كەزەك قالىپتاستىرماۋعا شاقىردى.
«بارلىق دۇكەندەر مەن كاسىپورىندار سانيتارلىق- ەپيدەميولوگيالىق نورمالاردى ساقتاۋى ءتيىس. بۇل رەتتە، قالاداعى بارلىق جۇمىس بەرۋشىلەرگە ايتارىم: ءوز قىزمەتكەرلەرىن كاسىپورىننىڭ نەمەسە نىساننىڭ مەنشىك نىسانىنا قاراماستان جەكە قورعاۋ قۇرالدارىمەن قامتاماسىز ەتۋ كەرەك. بارلىق پەرسونال بەتپەردە، قولعاپ جانە ءوزىنىڭ تەحنولوگيالىق كيىمىندە بولۋى ءتيىس. دۇكەندەر مەن شاشتاراز قىزمەتكەرلەرى مىندەتتى تۇردە بەتپەردە، باس كيىم جانە فيرمالىق كيىممەن قوسا، قولعاپ كيۋى قاجەت. بارلىق ءۇي- جايلار ۇنەمى جەلدەتىلىپ، ال جۇمىس ورىندارى دەزينفەكتسيالاۋ قۇرالدارىمەن وڭدەلۋى شارت»، - دەپ اتاپ ءوتتى باس سانيتارلىق دارىگەر.
ول سونداي-اق، بۇل ەرەجەلەر قۇرىلىس نىساندارىنا دا قاتىستى ەكەنىن اتاپ ءوتتى. قۇرىلىستا بارلىق جۇمىسشىلار وزدەرىنىڭ تەحنولوگيالىق كيىمدەرىن كيىپ جۇرگەنىنە قاراماستان، بەتپەردە كيۋلەرى مىندەتتى. 11-مامىردان كەيىن قالانىڭ پەريمەترى بويىنشا ورنالاسقان بلوكپوستار جۇمىسى دا جالعاسادى. بۇعان دەيىن قابىلدانعان قالاعا كىرۋ مەن شىعۋ ەرەجەلەرى سول كۇيى ساقتالادى. جۇمىسقا رۇقسات العان كاسىپورىندار عانا جىبەرىلەدى. قوعامدىق كولىكتىڭ جۇمىس ءتارتىبى دە وزگەرىسسىز قالادى (ساعات 06.00 دەن كەشكى 19.00 گە دەيىن).
