قازاقپارات كۇنتىزبەسى: 11- اقپان
اتاۋلى كۇندەر
عىلىمداعى ايەلدەر مەن قىزداردىڭ حالىقارالىق كۇنى
ب ۇ ۇ شەشىمىمەن 2016-جىلدىڭ 11- اقپانىنان باستاپ عىلىمداعى ايەلدەر مەن قىزداردىڭ حالىقارالىق كۇنى (International Day of Women and Girls in Science) اتاپ ءوتىلىپ كەلەدى. باستى ماقساتى - عىلىم مەن ءبىلىم سالاسىنداعى گەندەرلىك تەڭدىكتى قامتاماسىز ەتۋ جانە ايەلدەر مەن قىزداردىڭ قۇقىقتارى مەن مۇمكىندىكتەرىن كەڭەيتۋ.
دۇنيەجۇزىلىك ناۋقاستار كۇنى
العاش رەت 1993-جىلى اتاپ ءوتىلدى. بۇل ەرەكشە كۇندى بەلگىلەۋ باستاماسى ريم پاپاسى يوانن پاۆەل ەكىنشىگە تيەسىلى.
حالىقارالىق قاۋىپسىز ينتەرنەت كۇنى
جىلدىڭ ەكىنشى ايىنىڭ ەكىنشى اپتاسىنىڭ ەكىنشى كۇنى اتالىپ وتەدى. مەرەكە 2004-جىلى ەۋروپا كوميسسياسىنىڭ «قاۋىپسىز ينتەرنەت» باعدارلاماسى اياسىندا بەكىتىلدى. ونىڭ ماقساتى - ونلاين تەحنولوگيالاردى، بارلىق الەمدە، اسىرەسە بالالار مەن جاستار اراسىندا قاۋىپسىز ءارى ساۋاتتى قولدانۋدى ناسيحاتتاۋ.
ەستە قالار وقيعالار
1976-جىلى پەتروپاۆلدا 5№ ورتا مەكتەپتە سوۆەت وداعىنىڭ باتىرى، قازاقستاندا جاساقتالعان 316-اتقىشتار ديۆيزياسىنىڭ كومانديرى يۆان ۆاسيليەۆيچ پانفيلوۆ مۇراجايى قۇرىلدى.
ەكسپوناتتاردىڭ ءبىر بولىگى تىكەلەي گەنەرال پانفيلوۆقا ارنالسا، ءبىر بولىگى 316-اتقىشتار ديۆيزياسى (كەيىننەن 8-گۆارديالىق) مەن ماسكەۋ تۇبىندەگى پانفيلوۆشىلار اسكەرىنىڭ ەرلىگىنە ارنالعان. ديۆيزيا قازاقستاندا جاساقتالعان، نەگىزىنەن الماتى جانە فرۋنزە (قازىرگى بىشكەك) تۇرعىندارىنان قۇرىلعان.
ەكسپوناتتار اراسىندا - پانفيلوۆشىلار ديۆيزياسىندا سوعىسقان سولتۇستىك قازاقستاندىق جەرلەستەردىڭ ارداگەرلىك كۋالىكتەرى، سول جىلدارداعى گازەت قيىندىلارى، مايداننان كەلگەن ءۇشبۋ حاتتار، ازىق-تۇلىك كارتوچكالارى بار.
1992-جىلى ماسكەۋدە قازاقستان رەسپۋبليكاسى مەن يسپانيا كورولدىگى اراسىندا ديپلوماتيالىق قارىم-قاتىناس ورناتۋ تۋرالى بىرلەسكەن مالىمدەمەگە قول قويىلدى.
1992-جىلى قازاقستان رەسپۋبليكاسى مەن گەرمانيا فەدەراتيۆتى رەسپۋبليكاسى اراسىندا ديپلوماتيالىق قارىم-قاتىناس ورناتۋ تۋرالى نوتالار الماسۋ ءراسىمى ءوتتى.
1997-جىلى قازاقستان رەسپۋبليكاسى پرەزيدەنتىنىڭ جارلىعىمەن كەڭەس وداعىنىڭ مارشالى ي. س كونيەۆ اتىنداعى الماتىداعى جوعارى اسكەري ۋچيليشەسى قازاقستان رەسپۋبليكاسىنىڭ قارۋلى كۇشتەرى اسكەري اكادەمياسى بولىپ وزگەرتىلدى.
2005-جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ تاريح فاكۋلتەتىندە اكادەميك ماناش قوزىبايەۆ اتىنداعى ءدارىسحانانىڭ سالتاناتتى اشىلۋ ءراسىمى ءوتتى. م. قوزىبايەۆ (1931-2002) - سان عاسىرلىق مۇراعات قۇجاتتارىن كوپ زەرتتەپ، كەڭەس زامانىندا بۇرمالانىپ كەلگەن قازاق تاريحىن دامىتۋعا ەلەۋلى ۇلەس قوسقان عالىم. ول ساياسي قۋعىن-سۇرگىن كەزىندە قۇربان بولعان قازاق زيالىلارىن اقتاۋ تۋرالى ءبىرىنشى بولىپ ماسەلە كوتەرىپ، پارلامەنتتەگى اقتاۋ كوميسسياسىن باسقاردى. كورنەكتى عالىمنىڭ مىڭنان استام زەرتتەۋ ەڭبەكتەرىنىڭ ءبىرازى قىتاي، اقش، تۇركيا، كورەيا، يران ەلدەرىندە اۋدارىلىپ، كىتاپ بولىپ شىقتى. قر ۇكىمەتىنىڭ قاۋلىسىمەن ەلىمىزدەگى ءبىرقاتار ءبىلىم وردالارىنا عالىمنىڭ ەسىمى بەرىلدى.
2009-جىلى «سامۇرىق-قازىنا» ۇلتتىق ءال-اۋقات قورى» ا ق قۇرىلىمىندا رەسپۋبليكالىق بيۋجەت ەسەبىنەن مەديتسينالىق تەحنيكالاردى ساتىپ الۋدى ۇيىمداستىراتىن «س ق- فارماتسيا» كومپانياسى قۇرىلدى.
2011-جىلى قازاقستاندىق باق سالاسىندا ۇيلەستىرۋ كەڭەسى قۇرىلدى. ول قوعامدىق قاتىناستار مەن ب ا ق زاڭناماسىن جەتىلدىرۋمەن اينالىسادى، باق ءۇشىن ساراپتامالىق-ۇسىنىمدىق ۇسىنىستار مەن تۇجىرىمدار ازىرلەيدى، ۇلتتىق اقپاراتتىق كەڭىستىكتىڭ جاي- كۇيىن زەرتتەيدى.
2015-جىلى الماتىدا باستاپقى مەديتسينالىق-سانيتتارلىق كومەك بويىنشا دۇنيەجۇزىلىك دەنساۋلىق ساقتاۋ ۇيىمىنىڭ الەمدەگى العاشقى كەڭسەسى سالتاناتتى تۇردە اشىلدى.
2016-جىلى قازاقستاندا بالانىڭ قۇقىقتارىن قورعاۋدىڭ ۇلتتىق جۇيەسىن جەتىلدىرۋ جانە ب ۇ ۇ- نىڭ بالا قۇقىقتارى تۋرالى كونۆەنتسياسىنا قاتىسۋشى رەتىندە قازاقستاننىڭ حالىقارالىق مىندەتتەمەلەرىن ورىنداۋ ماقساتىندا قازاقستانداعى بالالاردىڭ قۇقىقتارىن قورعاۋ جونىندەگى ومبۋدسمەن ينستيتۋتى قۇرىلدى. ونىڭ نەگىزگى ماقساتى - بالالاردىڭ قۇقىقتارى مەن زاڭدى مۇددەلەرىن قامتاماسىز ەتۋ، سونداي-اق مەملەكەتتىك جانە قوعامدىق ينستيتۋتتارمەن بىرلەسىپ، ولاردىڭ بۇزىلعان قۇقىقتارى مەن بوستاندىقتارىن قالپىنا كەلتىرۋ.
2016-جىلى قازاق، ورىس جانە اعىلشىن تىلدەرىندە باسىلىپ شىعاتىن «ورتالىقازيالىق ونەرتانۋ جۋرنالىنىڭ» العاشقى ءنومىرى جارىققا شىقتى. باسىلىم قازاقستانعا عانا ەمەس، ت م د جانە شەت ەلدەرگە تارالادى.
جۋرنالدىڭ نەگىزگى ماقساتى - ونەر سالاسىنداعى قازاقستاندىق عالىمداردى ەۋروپالىق دەڭگەيگە شىعارۋ، ولاردىڭ جۇمىستارىنا سىلتەمە سانىن كوبەيتىپ، رەيتينگتەرىن ارتتىرۋ.
2017-جىلى قازاقستاندا «تۇمار» ۇلتتىق تەلەۆيزيالىق سىيلىعى تاعايىندالدى. «تۇمار» ۇلتتىق تەلەۆيزيالىق سىيلىعىن قر اقپارات جانە كوممۋنيكاتسيالار مينيسترلىگى ەلىمىزدىڭ ەڭ ساپالى جانە وزەكتى ءونىمىن انىقتاۋ ارقىلى قازاقستاندىق ساپالى تەليەۆيدەنيەنى دامىتۋ، ىلگەرى جىلجىتۋ، تەلەۆيزيالىق ءونىم جاساۋشى تالانتتى كاسىبي مامانداردى قولداۋ ماقساتىندا بەكىتكەن ەدى.
