رەسپۋبليكالىق ماڭىزداعى جولداردىڭ 11 مىڭ شاقىرىمى اقىلى بولادى
بۇل تۋرالى مەملەكەتتىك- جەكەشەلىك ارىپتەستىك جوبالارىنا ارنالعان ۇكىمەت وتىرىسىندا ق ر يندۋستريا جانە ينفراقۇرىلىمدىق دامۋ ءمينيسترى رومان سكليار ءمالىم ەتتى، دەپ حابارلايدى قازاقپارات ءتىلشىسى.
«اقىلى جول جۇيەسىن ەنگىزۋ جانە قىزمەت كورسەتۋ» جوباسى بويىنشا توقتالساق، جوبا اياسىندا رەسپۋبليكالىق ماڭىزى بار 11 مىڭ شاقىرىم اۆتوموبيل جولدارىندا اقىلى جول جۇيەسىن ەنگىزۋ كوزدەلگەن. قازىرگى ۋاقىتتا 2 ساتىلى كونكۋرس جاريالاۋ ءۇشىن تەحنيكالىق تاپسىرما ازىرلەۋدەمىز. مامىر- قاراشا ايلارى ارالىعىندا كونكۋرستىق راسىمدەر وتكىزىلەتىن بولادى، شارت جاساسۋ جەلتوقسان ايىنا جوسپارلانعان»، - دەدى مينيستر.
بۇدان بولەك ر. سكليار «الماتى ستانساسىن اينالىپ وتەتىن 73,2 شاقىرىمدىق تەمىرجول جەلىسىنىڭ قۇرىلىسى» جوباسىنا توقتالدى. بۇگىنگى تاڭدا بايقاۋدىڭ ءبىرىنشى كەزەڭىنىڭ قورىتىندىسى شىعارىلدى. بىلىكتىلىك ىرىكتەۋىنەن 2 قازاقستان- قىتاي بىرلەسكەن كونسورتسيۋمى ءوتتى. قازىرگى ۋاقىتتا جەكە سەرىكتەستى انىقتاۋ ءۇشىن بايقاۋدىڭ ەكىنشى كەزەڭىن وتكىزۋگە كونكۋرستىق قۇجاتتامالاردى ازىرلەۋ جۇمىستارى جۇرگىزىلۋدە. كەلىسىمشارتقا قول قويۋ بيىل قاراشا ايىنا جوسپارلانعان. قۇرىلىس جۇمىستارى 2020-2022 -جىلدار ارالىعىندا جۇرگىزىلەتىن بولادى.
اۆتور: رۋسلان عابباسوۆ