الماتىدا 11 جاسىندا دالادا قالعان بالا قالاي تابىستى كاسىپكەرگە اينالدى
تالاي اشتىقتى باستان كەشىرىپ، ءومىردىڭ اۋىرتپاشىلىعىن ەرتە سەزىنگەن جىگىت بۇگىندە وڭتۇستىك استاناداعى تابىستى كاسىپكەرلەردىڭ بىرىنە اينالعان، دەپ حابارلايدى Stan.kz.
وزىمنەن كەيىنگى جاستارعا ۇلگى، تىم قۇرىعاندا موتيۆاتسيا بولسىن! وسىنى ماقسات تۇتقان دميتري باستان كەشكەن حيكاياسىن Facebook تەگى پاراقشاسىندا باياندادى.
«نەلىكتەن قاتارلاستارىم مەنەن جاقسى ءومىر سۇرەدى؟ ءومىر نەگە ادىلەتسىز؟ بالا كەزىمدە وسى سۇراقتاردى وزىمە ءجيى قوياتىنمىن. سەبەبى 11 جاسىمدا ۇيىمنەن كەتۋگە ءماجبۇر بولدىم. قيىنعا سوقتى، سەبەبى جەرتولەدە، شاتىردا تۇنەدىم. 6- سىنىپتى ازەر دەگەندە اياقتاپ، مەكتەپتى تاستاۋعا ءماجبۇر بولدىم. كۇندىزگى ۋاقىتتا كولىك جۋىپ، ونى قاراۋىلداۋمەن اينالىستىم، تەگىن «دەنساۋلىق» گازەتىن ساتتىم. 2 جىلدان كەيىن اۆتوبۋسقا كوندۋكتور بولىپ جۇمىسقا ورنالاستىم»، - دەپ باستادى اڭگىمەسىن ديما.
24 جاستاعى جىگىتتىڭ ايتۋىنشا، قوعامدىق كولىككە كۇن سايىن مىنەتىن جولاۋشىلاردىڭ ءبىرى وعان ۇسىنىس جاساپ، ءومىرىن وزگەرتۋگە مۇمكىندىك بەرگەن. ناقتىراق ايتساق، جولاۋشى دميتريگە جارناما قاعازدارىن ءىلۋدى ۇسىنعان. ءار قاعازعا 3 تەڭگە العان كۇندەرى ءدميتريدىڭ ەسىندە جاقسى ساقتالعان.
«ءبىر جىلدان كەيىن باستىعىمدى ورنىنان تايدىردىم، ياعني ونى جۇمىستان شىعارىپ، ورنىنا مەنى قويدى. الايدا مەنىڭ جالاقىم ونىكىنەن 5 ەسە از بولدى. جاسىم 13 تە بولعاندىقتان، باسشىلىق ەشقايدا كەتپەيتىنىمدى ءبىلدى»، - دەگەن ديما سول جىلدارى كومپانيا كەڭسەسىندە ءومىر سۇرگەنىن ايتادى.
«ورىندىقتا ۇيىقتادىم، ەڭ كىشىسى بولعاندىقتان دۇكەنگە بارۋ مەنىڭ مىندەتىم ەدى»، - دەپ ەسكە الادى كاسىپكەر.
ايتۋىنشا، 2008 -جىلى داعدارىس باستالىپ، باسشىلىق ونىڭ ايلىق جالاقىسىن تولەي الماعان.
«ايلىعىم نەبارى 40 مىڭ تەڭگە، ال ولار ماعان 100 مىڭ تەڭگەدەن اسا قارىز بولدى. قول قۋسىرىپ قاراپ وتىرا المايتىنىمدى ءتۇسىندىم. سوندا باستىعىم بارلىعىمىز بىرىگىپ اقشا جيناعان ساندىقشانى الۋدى ۇسىندى. اۋىزشا قارىزدان گورى قولما قول اقشا الدەقايدا دۇرىس دەپ سونى تاڭدادىم. ونىڭ ىشىنەن 36 مىڭ تەڭگە شىقتى»، - دەيدى دميتري.
36 مىڭ تەڭگەنى قالتاعا سالعان جاس جىگىت كومپانيادان جۇمىستان شىققانىن ايتادى. بۇل كەزدە ديما نەبارى 15 جاستا. قالايدا اياققا تۇرۋدى كوزدەگەن ول مۇنىمەن توقتاپ قالمايدى. كۇندىز- ءتۇنى جۇمىس ىزدەيدى. الايدا كامىلەتتىك جاسقا تولماعان جىگىتتى ەشكىم جۇمىسقا قابىلدامايدى. سول كەزدە جاس جىگىت ءوز جۇمىسىن باستاۋعا بەل بۋادى.
«بۇرىن جۇمىس ىستەگەن كومپانيامنىڭ جۇمىسىن قايتالادىم. باعاناعى 36 مىڭ تەڭگەگە پرينتەر، 4 بۋما قاعاز جانە قالالىق تەلەفون ساتىپ الدىم. جارناما قاعازدارىن شىعارىپ، كوشەلەرگە ءىلىپ شىقتىم. كەيىن بۇرىنعى كومپانياداعى مامانداردان تاپسىرىس الىپ وتىرۋعا كەلىستىم. تابىستى تەڭدەي بولىسەمىز دەدىم. سونىمەن 15 جاسىمدا ءوز جۇمىسىمدى باستاپ كەتتىم. 16 جاسىمدا العاشقى كولىگىمدى ساتىپ الدىم»، - دەيدى دميتري.
17 جاسقا تولعاندا دميتري ەكىنشى كولىگىنە قول جەتكىزەدى. كامىلەتتىك جاسقا تولماعان جىگىت تاعى دا ءبىر جىل كۋالىكسىز كولىك ايداعانىن ايتادى.
«ەگەر ءتارتىپتى بۇزباساڭ، سەنى ەشكىم توقتاتپايدى ەكەن. ءبىراق سوندا دا كۋالىكتىڭ ورنىنا 5 مىڭ تەڭگە ۇستاپ ءجۇردىم»، - دەيدى ديما.
ءيا، بۇدان كەيىن ديما كومپانيانى كەڭەيتىپ، بىرنەشە ادامدى جۇمىسپەن قامتيدى. 5 جىل ىشىندە مول اقشاعا كەنەلىپ، ءتىپتى تابىسى ميلليونعا دەيىن بارادى. الايدا بۇل قۋانىش كوپكە سوزىلمايدى. 2012 -جىلى ديمانىڭ كەڭسەسىنە ۇرى تۇسەدى.
«سول شاقتا قۇقىق قورعاۋ ورگاندارىنا قاتتى اشۋلاندىم. اقىرىندا كومپانيامدى ساتىپ جىبەردىم، ءتىپتى قازاقستاننان كەتكىم كەلدى. بىرنەشە رەت تالپىندىم دا، الايدا ۆيزا الا المادىم. بۇل ۋاقىت ارالىعىندا سبەربارنكتە جۇمىس ىستەدىم. ءارتۇرلى سالادا ءوزىمدى سىناپ كوردىم. نە ىستەمەدىم دەسەڭىزشى؟ ! ءبىلىمىم بولماسا دا، IT مەن بۋحگالتەريا، ت. ب. سالالاردىڭ مامانىنا اينالدىم»، - دەيدى دميتري.
العاشقىدا سالىنى سۋعا كەتىپ، ەلدەن كەتپەكشى بولعان دميتري ءۇش جىل ىشىندە قايتا اياققا تۇرادى. 2015 -جىلى ول «ايتيماتيكا» اتتى جەكە كومپانياسىنىڭ نەگىزىن قالايدى. اتالعان كومپانيا كومپيۋتەر جوندەۋ جانە سوعان قاتىستى دۇنيەلەرمەن اينالىسادى.
«3 جىل ىشىندە شتات كولەمىن 13 قىزمەتكەرگە دەيىن ۇلعايتىپ، تابىسىمدى ونداعان ميلليوننان اسىردىم. ال قازىر قىس مەزگىلىندە جىلى جاقتاردا دەمالامىن، مىقتى كولىك مىنەمىن، جالپى شالقىپ ءومىر سۇرەمىن»، - دەيدى 24 جاستاعى جىگىت.
ناشار ءومىردى كورگەندىكتەن جانە سولاي ءومىر ءسۇرۋدى قالاماعاندىقتان ۇنەمى تاۋەكەلگە بارىپ وتىردىم، دەيدى ديما.
«قاي جەردە، كىم بولىپ دۇنيەگە كەلسەڭ دە، ءبىلىمىڭ، العاشقى كاپيتالىڭ بار بولسا دا، جوق بولسا دا تابىستى بولۋعا مۇمكىندىك بار. بۇل حيكايا ارقىلى وسىنى ايتقىم كەلدى»، - دەيدى دميتري نيكولايەۆيچ.
ايتا كەتەيىك، ديمانىڭ كومپانياسى بۇگىندە 50 مەكەمەگە قىزمەت كورسەتەدى.
