شىمكەنتتىك پوليتسيا سەرجانتى 11 بالا تاربيەلەپ وتىر
بالالارىنىڭ ۇلكەنى 16 دا بولسا، كىشىسى 2 گە تولعان.
بۇل تۋرالى «وتىرار» حابارلايدى.
باۋىرجان بولاشاق جارىمەن 2000 -جىلى تانىسىپتى. ول كەزدە حاديشانىڭ جاسى 19 دا بولىپتى. تويدان سوڭ جاس وتباسى سارى اعاش اۋدانىنداعى اباي اۋىلىندا تۇرعان. ال وتاعاسى ىشكى ىستەر باسقارماسىنا قىزمەتكە ورنالاسقان سوڭ، وتباسى شىمكەنتكە كوشىپ كەلگەن. وبلىس ورتالىعىنا كەلەمىن دەگەنشە، ولار التى بالالى بولىپ ۇلگەرگەن.
«ءار جىل سايىن وتباسىمىز تولىعىپ، ءبىر عانا جالاقىعا ءۇمىت ارتۋ قيىن بولدى. سول سەبەپتى مەن جۇمىسقا شىقتىم»، - دەيدى حاديشا.
قازىر ول قالاداعى اۋرۋحانالاردىڭ بىرىندە اكۋشەر بولىپ جۇمىس ىستەيدى. اتا- اناسى جۇمىستا بولعان كەزدە، بالالارعا باۋىرجاننىڭ 68 جاستاعى اناسى قارايدى.
كوپبالالى وتباسى شىمكەنتتىڭ شەتىندەگى جالدامالى ۇيدە تۇرىپ جاتىر. ۇلكەن ۇل بيىل مەكتەپتى ءتامامداعالى وتىر.
«مەن كوبىنەسە قىزدارىم ءۇشىن الاڭدايمىن. ولاردىڭ جوعارى ءبىلىم العانىن قالايمىن. قىزدار قازىرگى زاماندا ءوز- وزدەرىن قامتاماسىز ەتە الۋى ءتيىس»، - دەدى سەرجانت.
قازىر ەرلى- زايىپتىلاردىڭ تاپقان تايانعاندارى تەك تاماق پەن كيىمگە كەتىپ جاتىر. «التىن القا» ءۇشىن تولەنەتىن اقشا جالاقىعا ءجاي عانا كومەكشى. ءبىراق، وتباسى شاعىمدانىپ، قول جايعاندى قولاي كورمەيدى. ولار ءۇشىن ەڭ باستىسى - بەرەكەلى وتباسى بولۋ عانا.
