قازاقستاندا 11 ءبۇلدىرشىننىڭ باۋىرى اۋىستىرىلعان

استانا. قازاقپارات - 2016 -جىلعى 19-21 - قازاندا الماتى قالاسىندا ق ر تاۋەلسىزدىگىنىڭ 25 جىلدىعىنا ارنالعان «قازاقستان حيرۋرگيا قىزمەتىنىڭ جەتىستىكتەرى مەن دامۋ پەرسپەكتيۆالارى» اتتى حالىقارالىق كونفەرەنسيا وتۋدە.

 ونىڭ بارىسىندا ترانسپلانتولوگيانىڭ وزەكتى ماسەلەلەرى، شۇعىل حيرۋرگيالىق كومەك كورسەتۋدىڭ زاماناۋي تاسىلدەرى، ينتەرۆەنتسيالى كارديولوگياداعى، اريتمولوگياداعى، انگيوحيرۋرگياداعى جاڭا باعىتتار قاراستىرىلادى. بۇل تۋرالى ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باسپا ءسوز قىزمەتىنەن حابارلادى.

ق ر  د س ا د م ا. ن. سىزعانوۆ اتىنداعى حيرۋرگيانىڭ ۇلتتىق عىلىمي ورتالىعى (ءارى قاراي - ح ۇ ع و) ۇيىمداستىرعان شاراعا 500 دەن استام وتاندىق دارىگەرلەر مەن الىس- جاقىن شەتەلدىڭ 20 ەلىنەن كەلگەن 50 جەتەكشى ماماندار قاتىسادى.

 شارا بارىسىندا ق ر د س ءا د م جاۋاپتى حاتشىسى ايدا قۇرمانعاليەۆا ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆانىڭ اتىنان ءسوز سويلەپ، ا. ن. سىزعانوۆ اتىنداعى حيرۋرگيا ۇلتتىق عىلىمي ورتالىعى - حيرۋرگيالىق جانە ترانسپلانتولوگيالىق كومەكتى دامىتۋ بويىنشا جەتەكشى ەمحانالاردىڭ ءبىرى ەكەنىن اتاپ ايتتى.

«2015 -جىلى 298 ترانسپلانتاسيانىڭ 68 ءى ا. ن. سىزعانوۆ اتىنداعى ح ۇ ع و- دا وتكىزىلدى، سونىمەن بىرگە، 5 مىڭعا جۋىق حيرۋرگيالىق وتا جاسالىپ، 4 مىڭنان استام پاسيەنتكە حيرۋرگيالىق كومەك كورسەتىلدى. بۇگىندە ورتالىق ايماقتىق اۋرۋحانالاردا كورسەتىلەتىن بىلىكتى ءارى ساپالى مەديتسينالىق كومەككە، ازاماتتار اراسىنداعى ءولىم- ءجىتىمدى ازايتۋعا نەگىزدەلگەن يننوۆاتسيالار ەنگىزۋ شارالارى ءساتتى جۇزەگە اسىرىلىپ كەلەدى»، - دەپ كورسەتىلگەن تامارا دۇيسەنوۆانىڭ العى سوزىندە.

 ءمينيستردىڭ پىكىرىنشە، اتالعان كونفەرەنسيا ق ر تۇرعىندارىنا كورسەتىلەتىن حيرۋرگيالىق كومەكتىڭ جاڭا تاسىلدەرى مەن ادىستەرىن ەنگىزۋ ءۇشىن ءتيىمدى الاڭ بولىپ، دەنساۋلىق ساقتاۋ سالاسى، حالىقتىڭ ءومىر ءسۇرۋ ۇزاقتىعى مەن ساپاسىن ارتتىرۋ باعىتىندا ەلدەر اراسىنداعى بايلانىستى نىعايتا تۇسپەك.

ق ر د س ءا د م باس حيرۋرگى، ا. ن. سىزعانوۆ اتىنداعى ح ۇ ع و باسقارما باسشىسى، اكادەميك بولات بايماحانوۆ كونفەرەنسيا قازاقستانداعى حيرۋرگيانىڭ دامۋ دەڭگەيىن كورسەتەدى دەپ ەسەپتەيدى.

«قازىرگى تاڭدا 155 باۋىر ترانسپلانتاتسياسى، ونىڭ ىشىندە 1 جاسقا دەيىنگى بالالاردا - 11, 720 بۇيرەك ترانسپلانتاتسياسى وتكىزىلىپ، جۇرەك- قانتامىرلار جۇيەسىن ەمدەۋدىڭ زاماناۋي حيرۋرگيالىق تاسىلدەرى، ينۆاليديزاتسياعا جول بەرمەي، پاتسيەنتتەردىڭ ءومىرىن ۇزارتۋعا مۇمكىندىك بەرەتىن پلاستيكالىق حيرۋرگيا سالاسىنداعى زاماناۋي ادىستەرى ەنگىزىلدى»، - دەپ ايتتى بولات بايماحانوۆ.

 جۋىردا كونفەرەنسيا اياسىندا ا. ن. سىزعانوۆ اتىنداعى ح ۇ ع و- دا و. الفيەري (يتاليا) ، ا. بوگاچيەۆا- پروكوفيەۆا (رەسەي)، Кengo Кanateka (جاپونيا)، بولات بايماحانوۆ (قازاقستان) سىندى بەلگىلى مامانداردىڭ قاتىسۋىمەن كارديوحيرۋرگيا، ينتەرۆەنسيالى كارديولوگيا، گەپاتوپانكرەاتو- بيليارلىق حيرۋرگيا، باۋىر ترانسپلانتاتسياسى، وڭەش جانە ىشەك- قارىن جولدارىنىڭ حيرۋرگياسى، نەفرولوگيا، بۇيرەك ترانسپلانتاتسياسى بويىنشا شەبەرلىك سىنىپتارى ءوتتى.

ءارى قاراي وتاندىق حيرۋرگتار شەتەلدىك ساراپشىلار بولىسكەن تاجىريبەنى ءوز ەمحانالىق ىسىندە قولدانا الادى.

 كونفەرەنسيا سوڭىندا ۇزدىك ماماندار ءمينيستردىڭ العىس حاتتارىنا يە بولدى.