قوستانايلىق 115 جاستاعى اجەي ءالى كۇنگە دەيىن كىتاپ وقىپ، وزدىگىنەن ءجۇرىپ- تۇرادى - فوتو
اجەي وزدىگىنەن ءجۇرىپ- تۇرا الادى. اس ۇيگە ءوز اياعىمەن بارىپ، ءوزى تاماقتانادى. قيمىلى شيراق، ويى سەرگەك. اسىرەسە، اجەيدىڭ ءالى كۇنگە دەيىن كىتاپ وقيتىنى قايران قالدىرادى. ساناۋلى جىلداردان كەيىن قوستانايلىق مارفۋعا سەلتەتكەنوۆانىڭ ەسىمى گيننەس كىتابىنا پلانەتامىزدىڭ «ەڭ قارت تۇرعىنى» ەسەبىندە جازىلۋى مۇمكىن.
سىرلى اياقتىڭ سىرى كەتسە دە، سىنى كەتپەگەن. بۇگىن 115 جاس مەرەيتويىن قارسى العان مارفۋعا اجەي شاۋ تارتپاعان. ەڭكەيىپ بۇگىلمەگەن، جۇرەگىنە ءاجىم تۇسپەگەن. ەڭبەك ەتىپ ەسەيگەن ەرەكشە جان «ۇزاق جاساۋدىڭ قۇپياسى - جۇرەكتىڭ تازالىعى» - دەيدى. 112-كە تولعانشا 5 ۋاقىت نامازىن قازا قىلماعان.
ۇلت- ازاتتىق كوتەرىلىس، ناۋبەت پەن سوعىس جىلدارىنىڭ كۋاسى بولعان كەيۋانانىڭ تۇڭعىش قىزى 97 جاستا. وسكەمەن شاھارىندا تۇرادى. كەلىنى 93-تە. 115-تەگى ەل اناسىنىڭ كۇتىمى، التىنشى قىزى جىبەكتىڭ ەنشىسىندە.
قازاقستانداعى ەڭ قارت تۇرعىننىڭ 1902 -جىلى، 3-ناۋرىزدا تۋعانىن راستايتىن ءتولقۇجاتتارىن دا ءوز كوزىمىزبەن كوردىك. كوردىك تە، عاجايىپقا ەرىكسىز سەندىك. ونىنشى مۇشەل جاسقا اياق باسقان قارت انا شوبەرە- شوپشەك تۇرماق، جەتىنشى ۇرپاعى نەمەنەسىنىڭ الاقانىنان سۋ ىشكەن. ءبىر اۋلەتتىڭ ماۋەلى بايتەرەگى بارشا قازاق ەلىنە ءوزىنىڭ اق باتاسىن بەردى.
اللا اۋزىنا سالعان شىعار اسىل اجە 150 جاساۋعا ءال- دارمەنىم جەتەدى دەپ قالدى. گيننەستىڭ رەكوردتار كىتابىنا ەنگەن الەمدەگى ەڭ ۇزاق جاساعان ايەل وساكالىق ميساو وكاۆا جاپون ەلىنەن شىققان.
ال قوستانايلىق عاسىر- انا جاپوندىق كەمپىردىڭ رەكوردىن جاڭارتاتىندىعىنا سەنىمدى. ويتكەنى، مارفۋعا اجەيدىڭ اناسى 123 جاسىندا دۇنيەدەن وزعان. ءبىز دە مارفۋعا اجەيگە شۋاقتى دا ۇزاق عۇمىر تىلەدىك.
