ديزەل وتىنى 115 تەڭگەگە جوعارىلايدى دەپ كۇتىلۋدە - ەنەرگەتيكا مينيسترلىگى
«ءبىزدىڭ ديزەل وتىنىنىڭ باعاسى رەسەيدەگىدەن ەكى ەسە ارزان. ءبىزدىڭ باعالار، قاتەلەسپەسەم، 1997 -جىلدان بەرى وزگەرمەي كەلەدى. بىزدىڭشە، بۇل جاعدايدى قولدان ۇستاپ تۇرۋ دۇرىس ەمەس. بۇل وتاندىق مۇناي كومپانيالارىنا دا كەرى اسەرىن بەرۋدە. ولار جىلدىق قارجىلىق احۋالىندا تەرىس كىرىسپەن اياقتاۋدا. مۇناي سالاسىنىڭ تۇرالاپ قالۋ قاۋپى بار. باعانىڭ كوتەرىلۋى قاجەت، سەبەبى تامىزدا ديزەل وتىنى بولماي قالۋى مۇمكىن. كەيىن قىسقى مەزگىلدە باعا قايتا تومەندەيدى»، - دەيدى ول.
ونىڭ سوزىنە قاراعاندا، اۋىل شارۋاشىلىعىندا ەگىن جيناۋ ناۋقانىنا جىلداعىداي تومەن باعامەن ەگىنشىلەرگە 400 مىڭ تونناعا جۋىق ديزەل وتىنى بولىنگەن. ولارعا باعا وزگەرمەيدى جانە جەڭىلدىكپەن ەسەپتەگەندە ليترىنە 79 تەڭگە شاماسىندا بولماق.
«قازىر قازاقستاندا شامامەن 200 مىڭ توننا ديزەل وتىنىنىڭ قورى بار. وسى ايدا 400 مىڭ تونناسىن قوسىمشا وندىرەتىن بولامىز. 25 - شىلدەدەگى جاعداي بويىنشا، ءبىز 330 مىڭ توننا شىعارىپ ۇلگەردىك. ونىڭ 97 پايىزىن تۇتىنۋشىلارعا جەتكىزىلدى. دەمەك، بۇگىندە ديزەل وتىنى ۇزدىكسىز نارىققا شىعارىلۋدا»، - دەدى ۆيتسە- مينيستر.
بۇنىڭ الدىندا «قازاقپارات» تىلشىسىنە بەرگەن سۇحباتىندا مۇناي- گاز سالاسى بويىنشا تاۋەلسىز ساراپشى ولجاس بايدىلدايەۆ مەملەكەت ديزەل وتىنىنىڭ باعاسىن ۇزاق ۋاقىت تەجەپ، ۇستاپ تۇرۋعا كۇش سالدى، ءبىراق، ءبارىبىر نارىق زاڭدىلىعىنا قارسى تۇرۋ مۇمكىن ەمەس ەكەندىگىن ايتقان بولاتىن.
«سوڭعى اقپاراتتارعا سۇيەنسەك، ەلىمىزدىڭ كەيبىر وڭىرلەرىندە ديزەل وتىنىنىڭ تاپشىلىعى بايقالادى. سەبەبى تۇسىنىكتى - ىشكى نارىقتا ديزەل وتىنىنىڭ دوللارلىق بالاما باعاسى تىم تومەن. سايكەسىنشە، ديزەل وتىنىن جەتكىزۋشىلەرگە ىشكى نارىقتا ساتۋ ءتيىمسىز»، - دەدى و. بايدىلدايەۆ.
اۆتور: جاسۇلان جولدىبايەۆ
