قىتاي قازاقستاندىقتارعا 113 ءبىلىم بەرۋ گرانتىن ءبولدى

استانا. قازاقپارات - وتىنىمدەر 2023 -جىلعى 19-قاڭتاردان 3-اقپانعا دەيىن قابىلدانادى.

قىتاي ۇكىمەتارالىق كەلىسىمدەر اياسىندا 113 ءبىلىم گرانتىن ءبولدى.

قازاقستاندىقتار باكالاۆريات، ماگيستراتۋرا جانە دوكتورانتۋرا باعدارلامالارى بويىنشا تەگىن وقيدى، دەپ حابارلايدى Azattyq R‎hy.

وتىنىمدەر 2023 -جىلعى 19-قاڭتاردان 3-اقپانعا دەيىن Egov.kz ەلەكتروندىق ۇكىمەت پورتالى ارقىلى نەمەسە حالىقارالىق باعدارلامالار ورتالىعىندا قابىلدانادى.

كونكۋرستىق ىرىكتەۋگە قاتىسۋعا ۇمىتكەرلەر قىتاي ستيپەنديالىق كەڭەسىنىڭ campuschina.org سايتىندا اعىمداعى جىلعى 1-اقپانعا دەيىن ونلاين تىركەلۋى كەرەك.

«تىركەلگەن كەزدە ۇمىتكەر وقۋ باعدارلاماسىن، جوعارى وقۋ ورنىن جانە ماماندىقتى تاڭدايدى. قازاقستاندىقتارعا ق ح ر-دىڭ 250 دەن استام جەتەكشى جوعارى وقۋ ورنى ۇسىنىلادى. وقۋ قىتاي نەمەسە اعىلشىن تىلدەرىندە وتەدى.

ءبىرقاتار ەلدەر ءتىلدى بىلمەيتىن ۇمىتكەرلەر ءۇشىن تەگىن تىلدىك دايىندىقتان ءوتۋ مۇمكىندىگىن قاراستىرعان»، - دەپ اتاپ ءوتتى حالىقارالىق باعدارلامالار ورتالىعىنىڭ باسقارما ءتوراعاسى ءانۋار جانعوزين.

گرانت اكادەميالىق وقۋ، جاتاقحانادا تۇرۋ، مەديتسينالىق ساقتاندىرۋ شىعىندارىن وتەيدى، سونىمەن قاتار ستۋدەنتتەرگە اي سايىن ستيپەنديا تولەنەدى. وقىتۋ اعىلشىن نەمەسە قىتاي تىلدەرىندە وتەدى. قىتاي تىلىندە وقىتۋدى تاڭداعان كەزدە باكالاۆر دارەجەسىنە ۇمىتكەرلەر HSK 3 سەرتيفيكاتىن، ماگيستر جانە دوكتور دارەجەسىنە ۇمىتكەرلەر - HSK 4 سەرتيفيكاتىن ۇسىنۋى ءتيىس.

گرانت تاعايىنداۋ كونكۋرسىنا قاتىسۋ ءۇشىن نەگىزگى كريتەريلەر:

باكالاۆر دارەجەسىن الۋعا ۇمىتكەرلەر ءۇشىن - اتتەستات نەمەسە نەگىزگى ورتا ءبىلىم تۋرالى كۋالىك جانە اعىمداعى وقۋ جىلىنداعى اعىمداعى ۇلگەرىمى تۋرالى تابەل/ترانسكريپتنەمەسە ارناۋلى ورتا ءبىلىم تۋرالى ديپلوم ورتا بالىنىڭ كەمىندە 4,0 (5,0 تەن) بالىنا سايكەستىگى؛

ماگيستر دارەجەسىن الۋعا ۇمىتكەرلەر ءۇشىن - باكالاۆر/مامان/ ديپلومى نەمەسە اعىمداعى ۇلگەرىمى تۋرالى ترانسكريپت ورتاشا بالىنىڭ كەمىندە 3,0 (4,0 تەن) بالعا سايكەستىگى؛

اعىلشىن تىلىندە وقۋ ءۇشىن ق ح ر ۋنيۆەرسيتەتى بەلگىلەگەن دەڭگەيدەگى شەت ءتىلى بويىنشا قولدانىستاعى سەرتيفيكات بولۋى ءتيىس.