الەمدەگى ەڭ قارت 112 جاستاعى ەر ادام وسۆەنتسيم تۇتقىنى بولىپ شىقتى

استانا. قازاقپارات - Gerontology Research Group حالىقارالىق زەرتتەۋ توبى عالامشارداعى جاڭا ەڭ قارت ادامدى تاپتى، دەپ حابارلادى «پەتەربۋرگسكي دنيەۆنيك» باسىلىمى.

112 جاستاعى يسراەل كريستال ەكىنشى دۇنيەجۇزىلىك سوعىس جىلدارىندا فاشيستىك وسۆەنتسيم لاگەرىنىڭ تۇتقىنى بولدى.

يزرايل تۇرعىنى ونىڭ ناقتى جاسى انىقتالعاننان كەيىن رەسمي تۇردە الەمدەگى ەڭ قارت ەر ادام بولىپ تانىلدى.

زەرتتەۋشىلەر الدىمەن عاسىردان استام ءومىر سۇرگەن ادامنىڭ وتباسىنا ەلەكتروندى حات جولداپ، كريستالدىڭ وسى اتاققا ۇمىتكەر بولعانىن حابارلادى. ءبىراق تا ونى دالەلدەۋ ءۇشىن يسراەل كريستال ءوزىنىڭ جاسىن قۋاتتايتىن قۇجاتتى تابۋى ءتيىس ەدى. بۇل قۇجات 20 جاسقا جەتكەنشە الىنۋى مىندەتتى.

اۋەلدە كريستالدا مۇنداي قاعاز بولماي شىقتى. دەگەنمەن جاقىندا پولشادان بۇرىنعى كونتسلاگەر تۇتقىنىنىڭ تۋعان كۇنى جازىلعان قۇجات تابىلدى.

Gerontology Research Group بۇكىل الەم بويىنشا 110 جاستان اسقان ادامداردى ىزدەپ تاۋىپ، ءوزىنىڭ ءتىزىمىن گيننەسستىڭ رەكوردتار كىتابىنا جولداپ وتىرادى.