«111» نومىرىنە ايەلدەر مەن بالالاردان قانداي شاعىم ءجيى تۇسەدى
استانا. قازاقپارات - 2024-جىلعى 1-ماۋسىم مەن 2025-جىلعى 31-مامىر ارالىعىندا «111» بايلانىس ورتالىعىنا شامامەن 226 مىڭ ءوتىنىش ءتۇستى. بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ Kazinform اگەنتتىگى جولداعان رەسمي ساۋالدىڭ جاۋابىندا ايتىلعان.
مەملەكەتتىك كورپوراتسيانىڭ مالىمەتىنشە، 123 مىڭنان استام ءوتىنىش «111» نومىرىنە قوڭىراۋ شالۋ ارقىلى، ال 103 مىڭعا جۋىق ءوتىنىش QR- كود حابارلاما ارقىلى قابىلدانعان.
كىمدەر ءجيى حابارلاسادى؟
«111» بايلانىس ورتالىعى وتىنىشتەردى جىنىسى مەن جاسىنا قاراي تىركەيدى. الايدا ءوتىنىش ءۇشىنشى تۇلعادان، ياعني تۋىسى، پەداگوگ نەمەسە الەۋمەتتىك قىزمەتشىدەن تۇسكەن جاعدايدا، جەكە كلاسسيفيكاتسياسىز ەسەپكە الىنادى. جالپى، ەرەسەكتەردەن شامامەن 122 مىڭ ءوتىنىش كەلىپ تۇسكەن، ونىڭ ىشىندە 13,5 مىڭعا جۋىعى ايەلدەردەن، 104 مىڭى - بالالاردان.
ەڭ كوپ حابارلاساتىن وڭىرلەر:
الماتى - 10 مىڭنان استام؛
استانا - 6,4 مىڭنان استام؛
شىمكەنت - شامامەن 5,6 مىڭ؛
تۇركىستان وبلىسى - شامامەن 6,8 مىڭ؛
الماتى وبلىسى - شامامەن 6,3 مىڭ.
ەڭ از تىركەلگەن وڭىرلەر:
سولتۇستىك قازاقستان وبلىسى - 1,5 مىڭنان استام؛
ۇلىتاۋ وبلىسى - شامامەن 900؛
اباي وبلىسى - شامامەن 1,6 مىڭ.
سونىمەن قاتار، الماتىدا، باتىس قازاقستان، تۇركىستان، الماتى جانە اقمولا وبلىسىندا وتىنىشتەردىڭ ءوسۋى بايقالىپ وتىر.
ايەلدەر كوبىنە قانداي ماسەلەمەن جۇگىنەدى؟
- ايەلدەردى الدىمەن مازالايتىن تۇرمىستىق زورلىق-زومبىلىق ماسەلەلەرى. اتاپ ايتقاندا، فيزيكالىق، پسيحولوگيالىق، سەكسۋالدىق جانە ەكونوميكالىق زورلىق، اليمەنت تولەمەۋ، بالانى قامقورشىلىققا الۋ داۋى، الەۋمەتتىك قورعاۋ ماسەلەسى، باسپاناسىز قالۋ، پسيحولوگيالىق قيىندىقتار مەن بالا تاربيەسىنە قاتىستى ماسەلەلەر، - دەلىنگەن ساۋال جاۋابىندا.
«111» بايلانىس ورتالىعى حابارلاسقان جاندارعا كەڭەس بەرىپ، پسيحولوگيالىق كومەك ۇسىنادى، قاجەت بولعان جاعدايدا ايەلدەردى داعدارىس ورتالىعىنا نەمەسە ءتيىستى قىزمەتكە باعىتتايدى.
- ەگەر ايەلدىڭ ومىرىنە، دەنساۋلىعىنا نەمەسە قاۋىپسىزدىگىنە قاۋىپ تونسە، قورعانىس نەمەسە داعدارىس ورتالىعىنا جولداما بەرىلەدى. مۇنداي جاعدايدا فيزيكالىق، سەكسۋالدىق، پسيحولوگيالىق جانە ەكونوميكالىق زورلىق، زورلىق قاتەرى، الەۋمەتتىك وسالدىق (كىشكەنتاي بالالارىنىڭ بولۋى، جۇكتىلىك، باسپاناسىز قالۋ تاعى باسقا)، سونداي-اق ايەل ءوزى كومەك سۇراسا دا نەگىز بولادى، - دەلىنگەن جاۋاپتا.
بالالار قانداي ماسەلەلەرمەن حابارلاسادى؟
بالالار ءارتۇرلى سەبەپپەن بايلانىسقا شىعادى.
- بالالار وتباسىنداعى كيكىلجىڭ، تۇرمىستىق زورلىق-زومبىلىق، اتا-انانىڭ ىشىمدىككە نەمەسە ەسىرتكىگە تاۋەلدىلىگى، اتا-اناسىنىڭ اجىراسۋى، ەلەمەۋ جانە ەموتسيالىق وقشاۋلاۋ، مەكتەپتەگى بۋللينگ، كيبەربۋللينگ، پسيحوەموتسيونالدىق كۇيزەلىس، سۋيتسيدتىك وي، قاتارلاستارىمەن قارىم-قاتىناستاعى قيىندىقتار، وقۋ ۇلگەرىمى مەن قۇقىعىنىڭ بۇزىلعانى تۋرالى جيى ايتادى. كەيبىر ءوتىنىش بويىنشا بالامەن جاي عانا سويلەسۋدى قاجەت ەتەدى. بۇل ىقتيمال قاۋىپتى دەر كەزىندە انىقتاۋعا جانە قاجەتتى كومەك كورسەتۋگە مۇمكىندىك بەرەدى، - دەپ تۇسىندىرەدى مەملەكەتتىك كورپوراتسيادان.
بايلانىس ورتالىعى قالاي جۇمىس ىستەيدى؟
«111» بايلانىس ورتالىعىنىڭ وپەراتورلارى قيىن جاعدايعا تاپ بولعان وتباسىلارعا كومەك كورسەتۋ ماقساتىندا تاۋلىك بويى، دەمالىسسىز، مەرەكە كۇندەرى دە جەدەل توپپەن تىكەلەي بايلانىستا جۇمىس ىستەيدى.
- ورتالىق «وسى جەردە جانە قازىر» قاعيداسى بويىنشا جۇمىس ىستەيدى، ياعني كومەك ءدال جۇگىنگەن ساتتە كورسەتىلەدى. ءپروفيلدى ءبىلىمى بار ماماندار دەرەۋ ارەكەت ەتىپ، ءتيىستى مەملەكەتتىك ورگانمەن، قىزمەتپەن بايلانىسىپ، كەڭەس بەرەدى، قاجەت بولسا، پسيحولوگيالىق قولداۋ كورسەتەدى، - دەپ ناقتىلادى ۆەدومستۆو.
سونىمەن قاتار قاجەت بولعان جاعدايدا ۇزاق مەرزىمدى سۇيەمەلدەۋ ۇيىمداستىرىلادى، اسىرەسە قىلمىستىق ىستەر بويىنشا.
«111» بايلانىس ورتالىعى بىرنەشە مەملەكەتتىك ورگانمەن بىرلەسىپ جۇمىس ىستەيدى:
قۇقىق قورعاۋ ورگاندارى (قاۋىپ نەمەسە قىلمىس جاعدايىندا)؛
پسيحولوگيالىق قىزمەت (سۋيتسيدتىك ءقاۋىپ پەن ەموتسيونالدىق كۇيزەلىس كەزىندە)؛
مەديتسينالىق ۇيىمدار؛
قورعانشىلىق جانە قامقورشىلىق ورگاندارى؛
الەۋمەتتىك جانە وتباسىلىق قولداۋ قىزمەتى؛
ءبىلىم بەرۋ ورگاندارى؛
اكىمدىك جانە جەدەل قىزمەت.
- بالالاردىڭ قۇقىقتارىنىڭ بۇزىلۋى تىركەلگەن بارلىق جاعدايلاردا وڭىرلىك بالا قۇقىقتارى جونىندەگى ۋاكىلگە حابارلانادى7 سوڭعى 12 اي ىشىندە تىركەلگەن وتىنىشتەردىڭ ناتيجەسىندە 1,5 مىڭنان استام ءىس قۇقىق قورعاۋ ورگاندارىنا قاراۋعا جولداندى، - دەپ حابارلادى «ازاماتتارعا ارنالعان ۇكىمەت».
وتكەن جىلى «ازاماتتارعا ارنالعان ۇكىمەتتىڭ» 111 بايلانىس قىزمەتىنە كىمدەر كوبىرەك جۇگىنەتىنى تۋرالى جازعان ەدىك.
