كاپيتوليگە شابۋىل جاساعان 110 ادام سوتتالدى

استانا. قازاقپارات - ا ق ش سوتى «Proud Boys» وڭشىل توبىنىڭ بۇرىنعى جەتەكشىسىنە جاپپاي تارتىپسىزدىك ۇيىمداستىرعانى ءۇشىن 22 جىلعا ۇكىم كەستى. سوت ونى ۆاشينگتونداعى كاپيتوليگە شابۋىل جاساۋعا تىكەلەي كىنالى دەپ تانىعان.

2021 -جىلى قاڭتاردا مىڭداعان ادام كونگرەسس عيماراتىنا شابۋىل جاسايدى. تەرەزەلەرىن سىندىرىپ، ءمارمار تاستاردى قيراتادى. مىنە وسى جاپپاي تارتىپسىزدىكتى ۇيىمداستىردى دەپ ايىپتالعان كۇدىكتىلەر ىشىندە 39 جاستاعى ەنريكە تارريو دا بار. وعان قاتىستى تەرگەۋ ەكى جىلداي ءجۇردى. پروكۋرورلار ونى وڭشىل توپتىڭ بەلدى جەتەكىشىسى بولدى، ءارى 2021 -جىلى 6 -قاڭتار كۇنى زاڭدى بيلىك اۋىسۋى پروتسەسىنە قارسى ارانداتۋ ارەكەتىنە بارعان دەيدى.

ترامپتىڭ جاقتاستارىن كاپيتولييگە باسىپ كىرۋگە ۇگىتتەدى دەپ ايىپتاپ، سوتتان 33 جىل سۇرادى. دەگەنمەن، ۇكىم 22 جىلعا كەسىلدى. بۇل قاڭتارداعى جاپپاي تارتىپسىزدىككە قاتىستى ەڭ قاتاڭ جازا بولىپ وتىر. ادۆوكاتتار اپەللياتسياعا بەرەمىز دەدى.

نايب حاسان، ايىپتالۋشىنىڭ ادۆوكاتى:

- ءبىز 15 جىلدان ارتىق جاز كەسپەۋدى سۇراعانبىز. وتكەن اپتادا شىعارىلعان ۇكىمدەردى كوردىك جانە سولارعا سۇيەنە وتىرىپ وسىنداي ۇسىنىس ايتقانبىز. جاقىن ارادا قايتا شاعىم تۇسىرەمىز. ونىڭ 6-قاڭتاردا ۆاشينگتوندا بولماعانى تارتىپسىزدىكتەرگە «تىكەلەي ىقپالى» بولماعانىن بىلدىرەدى.

ەسىڭىزدە بولسا، ەكى جىل بۇرىن ا ق ش استاناسىندا جاپپاي تارتىپسىزدىكتى ۇيىمداستىرۋشىلار پرەزيدەنت سايلاۋىندا جەڭىسكە جەتكەن دجو بايدەندى كونگرەستىڭ رەسمي بەكىتۋىنە كەدەرگى كەلتىرمەك بولعان. سول كەزدەگى اق ءۇي باسشىسى دونالد ترامپ تا وتقا ماي قۇيىپ، سايلاۋ دۇرىس وتپەدى، جاپپاي الاياقتىق بولدى دەپ مالىمدەگەن ەدى. ونىڭ مىڭداعان جاقتاستارى كونگرەسكە باسىپ كىرىپ، اراسىندا پوليتسيا قىزمەتكەرى بار بەس ادام قازا تاپتى. 140 پوليتسيا ءتۇرلى جاراقات الدى. كاپيتولييگە شابۋىل جاسادى دەگەن ايىپپەن بارلىعى 1100-دەن استام ادام قامالىپ، ونىڭ 630 كىنالى دەپ تانىلدى. ال 110 ادام سوتتالىپ كەتتى. رەسپۋبليكاشىل بۇرىنعى پرەزيدەنت دونالد ترامپقا دا ايىپ تاعىلىپ، ۇستىنەن ءىس قوزعالعان.

نۇربەك بەكەن، «حابار 24»