الماتىدا جول اپاتىنان 11 كولىك پەن 3 ادام زارداپ شەكتى

الماتى. قازاقپارات - بۇگىن الماتىدا بولعان ءىرى جول اپاتىنان 11 كولىك پەن 3 ادام زارداپ شەكتى. بۇل تۋرالى قالالىق ءى ءى د باسپا ءسوز حاتشىسى سالتانات ازىربەك ايتتى.

ونىڭ ايتۋىنشا، وقيعا رىسقۇلوۆ پەن كۇدەرين كوشەلەرىنىڭ قيىلىسىندا ورىن العان.

Hyundai ماركالى تۇرمىستىق قالدىق تاسۋشى جۇك كولىگى جولىنداعى ونداعان كولىكتى ءسۇرىپ كەتكەن. جۇرگىزۋشىنىڭ ايتۋىنشا، جۇك كولىگىنىڭ تەجەگىشى جۇمىس ىستەمەي قالعان كورىنەدى.

جول اپاتىنان زارداپ شەككەن Mitsubishi كولىگىنىڭ جۇرگىزۋشىسى مەن ونىڭ ايەلى اۋرۋحاناعا جەتكىزىلدى. تاعى ءبىر ادام مەديتسينالىق كومەك العان سوڭ ۇيىنە جىبەرىلدى.

قازىر اتالعان ءىس بويىنشا تەرگەۋ امالدارى جۇرگىزىلۋدە.