تۇركيا ەلىمىزدىڭ ەكونوميكاسىنا ەڭ كوپ ينۆەستيتسيا باعىتتاعان 10 مەملەكەتتىڭ ءبىرى - مۇرات نۇرتىلەۋ

استانا. قازاقپارات - ەلىمىزدە تۇركيا كاپيتالىمەن 4,3 مىڭ كومپانيا جەمىستى جۇمىس اتقارىپ كەلەدى.

مۇنى ەلىمىزگە رەسمي ساپارمەن كەلگەن تۇركيانىڭ سىرتقى ىستەر ءمينيسترى حاكان فيدانمەن كەزدەسكەن ق ر سىرتقى ىستەر ءمينيسترى مۇرات نۇرتىلەۋ ءمالىم ەتتى، دەپ حابارلايدى قازاقپارات ءتىلشىسى.

«ورتا جانە شاعىن كاسىپكەرلەر قۇرعان كاسىپورىندار بويىنشا دا ەلەۋلى ناتيجەگە قول جەتكىزدىك. تۇركيانىڭ كاپيتالىمەن ەلىمىزدە 4300 دەن استام كومپانيا جەمىستى جۇمىس اتقارۋدا. وسى ۋاقىتقا دەيىن تۇركيا قازاقستان ەكونوميكاسىنا 4,7 ميلليارد دوللار كولەمىندە تىكەلەي ينۆەستيتسيا قۇيىپ، ەڭ ءىرى ينۆەستورلاردىڭ وندىعىنا كىردى. بۇگىنگى تاڭدا 31 ينۆەستيتسيالىق جوبا جۇزەگە اسىرىلۋدا، وعان قوسا 50 جاڭا جوبا پىسىقتالىپ جاتىر. بيىل بۇل ءۇردىس جالعاسىپ، ءبىرىنشى توقساننىڭ قورىتىندىسى بويىنشا ەلىمىزگە كەلگەن تۇرىك كاپيتالى 112 ميلليون دوللاردى قۇرادى»، - دەدى مۇرات نۇرتىلەۋ.

ءمينيستردىڭ مالىمدەۋىنشە، تۇركيا مەن قازاقستان بولاشاقتا ينۆەستيتسيا كولەمىن ۇلعايتۋعا مۇددەلى.

سونىمەن قاتار ۆەدومستۆو باسشىسى قاراشادا تۇركىستان قالاسىندا وتەتىن تۇركى مەملەكەتتەرىنىڭ مەرەيتويلىق 10-سامميتىنە قاتىسۋ ءۇشىن تۇركيا پرەزيدەنتى رەجەپ تايپ ەردوعان كەلەتىنىن اتاپ ءوتتى.

بۇعان قوسا، بيىل 7 ايدا قازاقستان مەن تۇركيا اراسىنداعى ساۋدا اينالىمى 3,6 ميلليارد دوللارعا جەتتى.