اقشانى قالاي جۇمساۋ كەرەك: 10 ماڭىزدى قاعيدا

استانا. قازاقپارات - قازىرگى ۋاقىتتا قارجىنى دۇرىس ءارى ءتيىمدى جۇمساۋ كەرەك.

كوپ جاعدايدا ءبىز بار اقشانى يگەرە الماي، قارىز الىپ كەتەمىز. سوندىقتان سىزگە قارجىعا قاتىستى قىسقا، قاراپايىم جانە تۇسىنىكتى ەرەجەلەر ۇسىنامىز.

1. العانىڭىزدان از جۇمساڭىز

قارجىنىڭ نەگىزگى ەرەجەسى - شىعىندارىڭىز كىرىسىڭىزدەن از بولۋى كەرەك. «ءبارى جاقسى بولادى» دەپ قارىزعا باتىپ، نەسيەمەن ءومىر سۇرە بەرەسىز بە؟ ەسىڭىزدە بولسىن: سىزگە نەسيە بەرەتىن ادامداردا عانا ءبارى جاقسى بولادى. ال ءسىزدىڭ جاعدايىڭىز شە؟

2. اقشا ۇستاۋ جاعىن جەڭىلدەتىڭىز

نەسيە كارتالارى نەعۇرلىم كوپ بولسا، سوعۇرلىم اقشانىڭ قايدا كەتىپ جاتقانىن بايقاماي قالاسىز. دەپوزيتتەر مەن شوتتاردىڭ سانى ارتقان سايىن ولاردى باقىلاۋ وڭاي بولمايدى. اقشا ۇستاۋ جاعى كۇردەلى بولسا، كوپ ۋاقىت پەن كۇش كەتەدى.

3. بولاشاققا قاتتى سەنىم ارتپاڭىز

تولەپ تاستاي الامىن دەگەن ويمەن قىمبات دۇنيەلەردى نەسيەگە ساتىپ الۋعا اسىقپاڭىز. كەيىن بۇل شەشىمىڭىزگە وكىنىپ قالۋىڭىز مۇمكىن. ويتكەنى الداعى ۋاقىتتا ءسىزدىڭ جالاقىڭىز قىسقارسا نەمەسە جۇمىسىڭىزدان ايىرىلساڭىز، قالاي قيىن بولارىن ويلاڭىز.

4. اقشانى دۇرىس جۇمساۋدى قازىردەن باستاڭىز

1-قادام: توتەنشە جاعدايلار ءۇشىن قورعا اقشا جيناڭىز. بانكتەگى اقشانى الامىن دەپ ۋاقىت قۇرتپاس ءۇشىن قولما- قول اقشا ۇستاڭىز. اي سايىن تابىسىڭىزدىڭ بەلگىلى ءبىر پايىزىن ۇنەمدەڭىز. مىسالى، %10 نەمەسە %15. بۇل قارجى مەنەدجمەنتىنىڭ ءبىرىنشى ەرەجەسىنە سايكەس كەلەدى. ءبىر جىلدان كەيىن قورداعى اقشانىڭ ءبىر بولىگىن پايدالانا بەرسەڭىز بولادى.

2-قادام: پايىزى كوپ قارىزدان قۇتىلىڭىز. قارىزدارىڭىزدى سۇرىپتاپ، ەڭ جوعارى پايىزدى تاڭداڭىز. سودان كەيىن بۇل قارىزدى ەكى ەسە جىلدام تولەي باستاڭىز. مۇنى قارىز وتەلگەنشە اي سايىن جاساڭىز.

5. بيۋدجەتتى دۇرىس ءبولىڭىز

اقىلدى ادام بيۋدجەتتى قالاي جوسپارلايدى؟ ول وتكەن ايلارداعى شىعىندار ستاتيستيكاسىنا قاراپ بيۋدجەتىن رەتتەيدى. بولجامدارعا ەمەس، ناقتى شىعىندار ستاتيستيكاسىنا سۇيەنگەن دۇرىس.

6. ناقتى تابىسىڭىزدى ەسەپتەڭىز

ناقتى تابىستى ەسەپتەۋ ءۇشىن كۇندەلىكتى جۇمسايتىن بارلىق شىعىنداردى الىپ تاستاڭىز. قالعان قاراجاتتى جۇمىس ۋاقىتىنىڭ ناقتى سانىنا ءبولىڭىز. وسىلايشا، ءبىر ساعات جۇمىس ىستەگەنىڭىز ءۇشىن قانشا اقشا الاتىنىڭىزدى بىلەسىز.

7. كەز كەلگەن زات ساتىپ الاردا تابىسىڭىزدى ەسكەرىڭىز

جاڭا زات ساتىپ الاردا وزىڭىزگە «ۇلكەن تەلەديدار كەرەك پە؟ مۇمكىن كىشىسىن العان دۇرىس شىعار؟» دەگەن سۇراقتار قويىڭىز. وسىلايشا ماڭىزدى دۇنيەگە عانا اقشا جۇمساۋدى ۇيرەنەسىز.

8. كولىگىڭىزدى جاقسى ۇستاڭىز

ءبىز اقشانى ۇنەمدەۋ تۋرالى ايتىپ وتىرعاندىقتان، جىلدامدىققا بايلانىستى ايىپپۇلدار مەن جانارماي شىعىنى تۋرالى ۇمىتپاڭىز. كولىگىڭىزدى كۇتىپ ۇستاڭىز، بۇزىلعان جاعدايدا بىردەن جوندەۋگە كىرىسىڭىز. جىلدامدىقتى ارتتىرماي، جول ەرەجەسىن ساقتاڭىز. سوندا ارتىق شىعىن شىعارمايسىز.

9. كوممۋنالدىق تولەمدەر

سۋ، گاز، ەلەكتر ەنەرگياسىنىڭ اقىسىن ۋاقىتىلى تولەڭىز. سونداي- اق وسى ەنەرگيانى ۇنەمدەيتىن شامداردى ساتىپ الىڭىز. ولار شىنىمەن ءسىزدىڭ ەلەكتر تولەمدەرىڭىزدى ازايتادى.

10. ۇلكەن ماقسات قويىڭىز

قالاۋىڭىز نە؟ بۇل اقشانىڭ ءبارى نە ءۇشىن كەرەك؟ قيىن سۇراق بولعانىمەن، ءسىز ءۇشىن ەڭ كۇشتى موتيۆاتور بولا الادى. سونىمەن قاتار ومىردەگى دۇرىس جولداردى كورسەتىپ، قيىندىقتان شىعۋعا كومەكتەسەدى. جۇمىستان شىققىڭىز كەلە مە؟ ءوز بيزنەسىڭىزدى اشقىڭىز كەلە مە؟ الەم بويىنشا ساياحات جاساعىڭىز كەلىپ جۇرگەن شىعار؟ نە بولسا دا، ماقساتىڭىزدى ۇمىتپاڭىز. ولار قالاعان ناتيجەگە جەتەر جولدا دۇرىس شەشىم قابىلداۋعا كومەكتەسەدى.