اقشانى قالاي ۇنەمدەۋگە بولادى؟ 10 كەڭەس

استانا. قازاقپارات - ومىرىڭىزدە ءبىر رەت بولسىن اقشا جيناۋعا تىرىسىپ كورگەن بولارسىز. ادەتتە، ءبىز اقشانى قانداي دا ءبىر ارمانىمىزدى ورىنداۋ ءۇشىن جينايمىز. الايدا قاجەت سومانى جيناۋ جانە ونى ساقتاپ قويۋ كەز كەلگەننىڭ قولىنان كەلە بەرمەيدى.

ءجيى ادامدار اقشانى جاڭا نەمەسە اسا قاجەت ەمەس زاتتى ساتىپ الۋعا جۇمسايدى. ءتىپتى، كەيدە جاڭا تۇسكەن جالاقىڭىز قالاي ازايىپ قالعانىن بايقاماي قالۋىڭىز مۇمكىن. مۇنداي جاعداي ورىن الماس ءۇشىن اقشانى قالاي ۇنەمۋدەۋگە بولاتىنىن بىلە جۇرگەن دۇرىس.

1. ماقسات قويىڭىز

ەڭ الدىمەن ماقسات قويۋىڭىز كەرەك. سونىڭ ارقاسىندا ارتىق اقشانى جۇمساماي، جيناۋعا موتيۆاتسيا پايدا بولادى.

2. دۇكەنگە اش قارىنمەن بارماڭىز

ادەتتە، ادامدار اۋىر جۇمىس كۇنىنەن كەيىن دۇكەنگە سوعادى. بۇل كەزدە قارنىڭىز اش بولادى، شارشاپ تۇراسىز، سوندىقتان قىمبات تۇراتىن جانە ءجيى پايدالى ەمەس دايىن تاعام ساتىپ الاسىز. سونداي-اق ۇيگە ءبىراز ۋاقىتقا جەتەتىن ازىق-تۇلىك الۋعا شىققاندا دا، تاماق ءىشىپ الىپ بارعان دۇرىس. ەگەر قارنىڭىز اشىپ تۇرسا، تىزىمنەن اۋىتقىپ، ارتىق نارسەلەر الىپ قويۋىڭىز مۇمكىن.

3. زياندى ادەتتەردەن باس تارتىڭىز

تەمەكى تارتۋ، الكوگول ءىشۋ فيزيكالىق ساۋلىعىمىزدى ناشارلاتادى جانە قارجىڭىزدىڭ دا ازايۋىنا ىقپال ەتەدى. سوندىقتان زياندى ادەتتەردەن بارىنشا تەز ارىلعان دۇرىس.

4. جۇمىسقا تۇسكى استى ۇيدەن اكەلىڭىز

سىرتتان تاماقتانۋعا قاراجاتىڭىزدىڭ ءبىراز بولىگى كەتىپ قالۋى مۇمكىن. سوندىقتان مۇمكىندىگىنشە ۇيدەن تاماق دايىنداپ اكەلگەن دۇرىس.

5. ازىق-تۇلىك ءتىزىمىن جاساڭىز

ءبىز دۇكەنگە اش بولىپ كەلگەندە عانا ەمەس، ناقتى نە قالايتىنىمىزدى بىلمەگەن كەزدە دە ارتىق اقشا جۇمساپ قويامىز. سوندىقتان دۇكەننەن نە الاتىنىڭىزدى ۇيدە الدىن الا ويلاستىرىپ، ءتىزىم قۇرىپ العان دۇرىس.

6. جەڭىلدىك كارتاسىن قولدانىڭىز

ەگەر ءبىر دۇكەنگە وتە ءجيى باراتىن بولساڭىز، سول دۇكەننىڭ جەڭىلدىك كارتاسىن العان ارتىق ەتپەيدى. ادەتتە، مۇنداي كارتالاردا بونۋس جيناۋعا بولادى.

7. كوممۋنالدى شىعىنداردى باقىلاڭىز

ەلەكتر قۋاتى مەن سۋدى ۇنەمدەۋدى ادەتكە اينالدىرىڭىز. مىسالى، بولمەدەن شىققاندا جارىقتى ءوشىرىپ ءجۇرىڭىز جانە پايدالانباساڭىز، سۋدى اعىزىپ قويماڭىز.

8. قىزىقتى جيناق ساندىقشا الىڭىز

كەيدە قىزىقتى جانە شابىت بەرەتىن نارسە جەتىسپەيدى. مىسالى، كوڭىلىڭىزدى كوتەرەتىن نەمەسە ارمانىڭىزبەن اسسوتسياتسيالاناتىن جيناق ساندىقشا ساتىپ الىڭىز.

9. تەك ساپالى زاتتار الىڭىز

كەيدە جاقسى جانە قاجەت زاتتى كورىپ، ساتىپ العىمىز كەلەدى. ءبىراق اقشاسى قىمبات بولىپ تۇرسا، ونىڭ ورنىنا بىرنەشە ارزان زات الۋدى ءجون كورەمىز. الايدا ساپالى زات الۋعا تىرىسۋ كەرەك. ساپالى نارسە ۇزاق قىزمەت ەتەدى.

10. ەسكى قاجەت ەمەس زاتتاردى ساتىپ جىبەرىڭىز

جالپى ۇيگە قاجەت ەمەس جانە كوپتەن بەرى قولدانبايتىن نارسەلەردى جيناي بەرمەگەن دۇرىس. الايدا سىزگە قاجەت ەمەس زات باسقاعا كەرەك بولۋى مۇمكىن. سوندىقتان ونى ءوز باعاسىنىڭ جارتىسىنا بولسا دا ساتىپ جىبەرۋگە بولادى.