داۋلەت مۇقايەۆ «جاس وتباسى» باعدارلاماسىنىڭ باستاپقى جارناسىن 10 پايىزدان اسىرماۋدى ۇسىندى
«ادىلەت مينيسترلىگىنىڭ تىركەۋ قىزمەتى جانە زاڭ قىزمەتىن ۇيىمداستىرۋ دەپارتامەنتىنىڭ مالىمەتى بويىنشا 2022-جىلى 129707 جۇپ نەكەگە تۇرسا، 51220 جۇپ اجىراسقان. بۇل دەگەنىمىز ۇيلەنگەن جاستاردىڭ 40 پايىزعا جۋىعى اجىراسادى دەگەن ءسوز. اجىراسۋدىڭ باستى سەبەبى ماتەريالدىق قاجەتتىلىك ەكەنىن ەسكەرسەك، باسپانا ءبىرىنشى ورىندا»، - دەدى ۇكىمەت باسشىسىنىڭ ءبىرىنشى ورىنباسارى رومان سكلياردىڭ اتىنا دەپۋتاتتىق ساۋال جولداعان داۋلەت مۇقايەۆ.
ونىڭ پايىمىنشا، جاس وتباسىلاردى باسپانامەن قامتاماسىز ەتۋ ءبىرشاما ماسەلەلەردىڭ الدىن الارى انىق.
«سوندىقتان مەملەكەتتىك دەڭگەيدە «جاس وتباسى» باعدارلاماسىنىڭ باستاپقى جارناسىن 10 پايىزدان اسىرماۋدى ۇسىنامىن. بۇگىنگى تاڭدا وتباسى بانكى تاراپىنان جۇزەگە اسىپ جاتقان «جاس وتباسى» باعدارلاماسىندا باستاپقى جارنا 50 پايىزدى قۇرايدى. مۇنداي قاراجات جيناۋ جاستارعا قيىندىق تۋدىرتادى»، - دەدى ءماجىلىس دەپۋتاتى.
