قازاقستاندا 10 مىڭنان استام كوللەدج ستۋدەنتى كاسىپورىندار تاپسىرىسىمەن وقىپ جاتىر
«بيىلعى وقۋ جىلىنان باستاپ كوللەدجدەرگە كاسىپورىن وتىنىمدەرى بويىنشا كادر دايارلاۋ ەنگىزىلدى. ءوزارا ىنتىماقتاستىق ەڭبەك نارىعىنىڭ سۇرانىسىنا ساي مامان ازىرلەۋگە مۇمكىندىك بەرەدى. مەملەكەتتىك تاپسىرىستىڭ ارتىقشىلىعى - كوللەدج بىتىرگەن سوڭ ستۋدەنت تاپسىرىس بەرۋشىنىڭ كومپانياسىندا جۇمىس ىستەيدى. ول ءۇشىن ءبىلىم بەرۋ ۇيىمى، كاسىپورىن جانە ستۋدەنت اراسىندا ءۇش جاقتى كەلىسىمشارت جاسالادى»، - دەلىنگەن ۆەدومستۆو اقپاراتىندا.
وقۋ- اعارتۋ مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ەرنات ءجۇنىسوۆتىڭ ايتۋىنشا، مينيسترلىك مەملەكەت باسشىسىنىڭ تاپسىرماسىنا ساي بيىلعى وقۋ جىلىنان باستاپ جۇمىس بەرۋشىلەردىڭ وتىنىمدەرى بويىنشا وقىتۋدى باستادى. كوللەدجدەر ەڭبەك نارىعىنا قاجەت كادر دايىندايدى. ءوز كەزەگىندە كاسىپورىندار ستۋدەنتتەردى ءوز بازاسىندا تاجىريبەدەن وتكىزەدى، تاعىلىمداما ۇيىمداستىرادى، كەيىن جۇمىسقا قابىلدايدى.
«ماقساتتى تاپسىرىس كوللەدجدەرگە كادر سۇرانىسىنا ساي ءبىلىم بەرۋ باعدارلامالارىن جاڭارتۋعا مۇمكىندىك بەرەدى. بۇگىنگى تاڭدا كادر دايارلاۋدى «سارى ارقا اۆتوپروم»، «كاماز» ج ش س، «ارسەلور ميتتال تەمىرتاۋ» ا ق، «كەنتاۋ ترانسفورماتور زاۋىتى» ا ق، «بازيس- استانا»، «Аster Аuto Аstana» ج ش س جانە باسقا دا ءىرى كاسىپورىندار قولداپ وتىر. ماقساتتى تاپسىرىس بويىنشا 10 مىڭنان استام ستۋدەنت وقيتىن بولادى»، - دەلىنگەن مينيسترلىك حابارلاماسىندا.
رەداكتور
گۇلميرا الياكپاروۆا
