قازاقستان مۇناي ەكسپورتتاۋشى 10 ەلدىڭ قاتارىنا ەندى - بولات اقشولاقوۆ

الماتى. قازاقپارات – ق ر ەنەرگەتيكا ءمينيسترى بولات اقشولاقوۆ ءىرى مۇناي-گاز-حيميا كەشەندەرىنە ارنالعان ينۆەستيتسيالار تۋرالى ايتتى، دەپ حابارلايدى قازاقپارات ءتىلشىسى.

بولات اقشولاقوۆ «KIOGE-2022» حالىقارالىق مۇناي جانە گاز كورمە-كونفەرەنسياسى بارىسىندا ەلىمىزدىڭ ەنەرگەتيكا سالاسىن دامىتۋدىڭ باسىم باعىتتارىنىڭ ءبىرى مۇناي-گاز-حيميا سالاسى ەكەنىن ايتتى.

«جۋىردا اتىراۋ وبلىسىندا قۋاتى 500 مىڭ توننا بولاتىن پوليپروپيلەن ءوندىرۋ زاۋىتى ىسكە قوسىلادى. 2024-جىلى قاشاعان كەن ورنى شيكىزاتىنىڭ بازاسىندا قۋاتى 1 ميلليارد كۇپ مەتر گاز وڭدەۋ زاۋىتىنىڭ قۇرىلىسى اياقتالادى. سونىمەن قاتار، قۋاتتىلىعى جىلىنا 1,2 ميلليون توننا پوليەتيلەن جانە جىلىنا 186 مىڭ توننا بۋتاديەن ءوندىرۋ جوبالارى ازىرلەۋ ساتىسىندا. وسى جوبالاردى جۇزەگە اسىرۋ اياسىندا 2025-جىلعا دەيىن شامامەن 14 ميلليارد ا ق ش دوللارى كولەمىندە ينۆەستيتسيا تارتىلىپ، 14 مىڭنان استام جۇمىس ورنى اشىلادى»، - دەدى مينيستر.

سونداي-اق ول قازاقستان مۇناي قورى مەن ءوندىرۋ بويىنشا الەمدە جەتەكشى ورىنداردىڭ بىرىندە ەكەنىن اتاپ ءوتتى. قازاقستان قازىرگى ۋاقىتتا مۇناي قورى بويىنشا الەمدەگى 15 ەلدىڭ قاتارىنا كىرەدى.

«30 جىل ىشىندە قازاقستاندا مۇناي ءوندىرۋ 3,5 ەسەگە جۋىق ءوستى - 1991-جىلعى 26,6 ميلليون توننادان 2019-جىلى 90,5 ميلليون تونناعا دەيىن. مۇناي ەكسپورتىنىڭ كولەمى شامامەن التى ەسەگە ءوستى. وسىنىڭ ارقاسىندا وپەك+ دەرەكتەرى بويىنشا قازاقستان مۇناي ەكسپورتتاۋشى 10 ەلدىڭ قاتارىنا ەندى»، - دەدى بولات اقشولاقوۆ.