ءار ازامات 10 سوتىق جەر الۋ ءۇشىن ءوتىنىم بەرۋگە قۇقىلى - ماۋلەن اشىمبايەۆ

بۇل تۋرالى سەنات ءتوراعاسى ماۋلەن اشىمبايەۆ ايتتى، دەپ حابارلايدى قازاقپارات ءتىلشىسى.
سەناتتىڭ جالپى وتىرىسىنان كەيىن تىلشىلەر پالاتا ءتوراعاسىنان قازاقستاندىقتار 10 سوتىق جەردى الۋعا بەلسەندى تۇردە قۇجات تاپسىرۋىنا قاتىستى سۇراق قويدى.
«جەكە ءوز باسىم جەر تەلىمىنە ءوتىنىم بەرگەن جوقپىن. اتاپ ايتقاندا، جەر ۋچاسكەسىنە ءوتىنىم بەرۋگە ءار ازامات قۇقىلى. نەگىزى، ەلىمىزدە جەر بارشىلىق، بۇل تۇرعىدا ادامدارعا دۇرىس ءتۇسىندىرۋ كەرەك. قازاقستان اۋماعى اۋقىمدى، تەرريتوريا جەتكىلىكتى، 10 سوتىق تەلىمنەن قازاقستان ازاماتتارىنا تاراتۋعا بولادى. مەنىڭ ويىمشا، ءبىز وسىعان بىرتىندەپ كەلەمىز. دەگەنمەن بۇل جەر تەلىمدەرىنە كوممۋنيكاتسيالاردى تارتۋ ماسەلەسى بار. ول جەرلەردە جولدار، ەلەكتر جارىعى، سۋ، كارىز جۇيەسى بولعان ءجون»، - دەدى م. اشىمبايەۆ.
وسى ورايدا ول ينجەنەرلىك جەلىلەرگە قاتىستى ماسەلە بار ەكەنىن، بۇل باعىتتاعى تاقىرىپتاردى دەپۋتاتتار كوتەرىپ جۇرگەنىن ايتتى.
«جىل سايىن كوممۋنيكاتسيانى تارتۋعا ءتيىستى قاراجات ءبولىنىپ جاتىر، بۇل جۇمىستار جالعاسا بەرەدى. سوندىقتان كەزەڭ- كەزەڭمەن اكىمدىكتەر، ۇكىمەت اتالعان ماسەلەلەردى شەشىپ، ءبىزدىڭ ازاماتتار قاجەتتى جەر تەلىمدەرىن جەكە تۇرعىن ءۇي قۇرىلىسىنا الادى دەپ سانايمىن»، - دەدى سەنات ءتوراعاسى.
ەسكە سالا كەتەيىك، قازاقستاندىقتار ەندى جەكە تۇرعىن ءۇي قۇرىلىسىنا جەر الۋ ءۇشىن eGov.kz پورتالى ارقىلى كەزەككە تۇرا الادى. ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ حابارلاۋىنشا، تۇرعىندار، ءتىپتى كەزەگىنىڭ جىلجۋ بارىسىن ءوز بەتىنشە باقىلاپ، جەر كەزەگىنە بۇدان بۇرىن بەرىلگەن ءوتىنىشىنىڭ دەرەكتەرىن وزەكتەندىرە الادى. بۇل پروتسەس ءاربىر قازاقستاندىق الۋى ءتيىس 10 سوتىق جەردى الۋ بارىسىن بارىنشا اشىق قىلادى. ال اۆتوماتيزاتسيا ارقاسىندا بۇل پروتسەسكە 5 مينۋت قانا جۇمسالادى.