نۇر-سۇلتاندا بيىل 10 مىڭ الەۋمەتتىك پاتەر سالىنادى
«باسپانا ماسەلەسى قالا تۇرعىندارى ءۇشىن قاشاندا وزەكتى بولىپ قالا بەرمەك. تۇرعىن ءۇي قولجەتىمدىرەك بولۋى ءۇشىن بىرنەشە باعىت بويىنشا جۇمىس ءجۇرىپ جاتىر. ولار - جەڭىلدىكپەن بەرىلەتىن قولجەتىمدى تۇرعىن ءۇي سالۋ، تۇرعىن ءۇي كەشەندەرىن جوندەۋ، اپاتتى جاعدايداعى جانە ەسكى ۇيلەردى بۇزۋ، قۇرىلىسى ۇزاققا سوزىلعان نىسانداردى اياقتاۋ جانە باسقاسى.
جەڭىلدىكپەن بەرىلەتىن پاتەرلەر سالۋ جۇمىسى «بايتەرەك» حولدينگىنىڭ ەنشىلەس ۇيىمدارى جەلىسى بويىنشا ءجۇرىپ جاتىر.
وسى سەبەپتى ءبىرقاتار ۇيىمنىڭ باسشىلىعىمەن جينالىس ءوتىپ، وزەكتى ماسەلەلەر قاراستىرىلدى.
وسىلايشا بۇگىنگە دەيىن جۇرگىزىلگەن باعدارلامالاردى ارى قاراي جالعاستىرامىز.
ماسەلەن، قازاقستاندىق تۇرعىن ءۇي باعدارلاماسى (ق ي ك) جەلىسى بويىنشا - مەديتسينالىق جانە الەۋمەتتىك قىزمەتكەرلەرگە، پەداگوگتەرگە، پوليتسيا دەپارتامەنتى مەن ت ج د قىزمەتكەرلەرىنە، مادەنيەت جانە سپورت قايراتكەرلەرىنە ارنالعان الەۋمەتتىك تۇرعىن ءۇي»، - دەپ جازدى قالا باسشىسى Instagram-پاراقشاسىندا.
التاي كولگىنوۆ وتكەن جىلدان باستاپ وتباسى بانكى جەلىسى بويىنشا كەزەكتە تۇرعاندار جاستار ءۇشىن ارنايى باعدارلاما ىسكە قوسىلعانىن ەسكە سالدى.
«تۇرعىن ءۇي بويىنشا جەڭىلدەتىلگەن الەۋمەتتىك نەسيەلەندىرۋ باعدارلاماسى قالامىزدىڭ 36 جاسقا دەيىنگى جاستارىنا (كۇيەۋىنىڭ/ايەلىنىڭ جاسى ماڭىزدى ەمەس) ارنالعان. مەملەكەت باسشىسى ازاماتتاردىڭ قولجەتىمدى باسپانا ساتىپ الۋىنا جاعداي جاساۋ ماسەلەسىنە ەرەكشە نازار اۋدارۋدى تاپسىردى. بيىل ءبىز تاعى دا 10 مىڭ الەۋمەتتىك پاتەر سالۋدى جوسپارلاپ وتىرمىز»، - دەپ جازدى ەلوردا اكىمى.
