قازاقستان وزىق 10 مەملەكەتتىڭ قاتارىنا قوسىلسا ەكەن دەپ ارماندايمىن - ەلباسى
ق ر تۇڭعىش پرەزيدەنت - ەلباسى نۇرسۇلتان نازاربايەۆ ەل تاۋەلسىزدىگىنىڭ 30 جىلدىعىنا ارنالعان سالتاناتتى جيىندا وسىنداي ويىمەن ءبولىستى، دەپ حابارلايدى قازاقپارات.
«جەر كولەمى جاعىنان الەمدە توعىزىنشى ورىن الاتىن ەلىمىز باسقا دا بارلىق باعىت بويىنشا بولاشاقتا وزىق 10 مەملەكەتتىڭ قاتارىنا قوسىلسا ەكەن دەپ ارماندايمىن. ۇلى مۇرات جولىندا بەل بايلاعان ۇلتىمىز، ماقساتكەر دە جاسامپاز جۇرتىمىز باردا سول ارماننىڭ ورىندالارىنا سەنگىم كەلەدى»، - دەگەن ەلباسى ول ءۇشىن ەل بىرلىگى مىعىم بولىپ، جاستار بىلىمگە ارقا سۇيەۋى كەرەكتىگىن اتادى.
«ءبىز باسىمىز ءبىر بولىپ، قونعان ازاتتىقتى ايالاي ءبىلۋىمىز كەرەك. «تىرلىك باسقا بولسا دا، تىلەك ءبىر. بارماق باسقا بولسا دا، بىلەك ءبىر» دەگەن اتادان قالعان ۇلاعاتتى ءسوز بار. تاۋەلسىزدىكتى جاريالاپ، تۇرلاۋلى ەتۋ ءبىزدىڭ بۋىنعا بۇيىرعان باقىت ءارى كيەلى بورىش بولدى. ال سول تاۋەلسىزدىكتى قورعاۋ مەن ەل ىرىسىن ەسەلەۋ كەلەر ۇرپاققا، جاستارىمىزعا پارىز ءارى امانات. زاماناۋي بىلىممەن قارۋلانعان بۇگىنگى جاس تولقىن تاۋەلسىزدىكتىڭ جىلناماسىن جازىپ جاتىر. قازىرگىدەي اۋمالى-توكپەلى ۋاقىتتا ءبارىن تەك ءبىلىم، عىلىم، تاۋداي تالاپ پەن تاباندى ىزدەنىس ارقىلى عانا تولىق يگەرۋگە بولادى، بەكەم باعىندىرۋعا بولادى»، - دەدى تۇڭعىش پرەزيدەنت.
ايتا كەتەيىك، بۇگىن مەملەكەت باسشىسى قاسىم-جومارت توقايەۆتىڭ قاتىسۋىمەن ق ر تاۋەلسىزدىگىنىڭ 30 جىلدىعىنا وراي سالتاناتتى جيىن ءوتىپ جاتىر. سالتاناتتى ءىس-شاراعا ق ر تۇڭعىش پرەزيدەنتى - ەلباسى نۇرسۇلتان نازاربايەۆ، ۇكىمەت مۇشەلەرى، پارلامەنت دەپۋتاتتارى، مادەنيەت جانە قوعام، ونەر، مادەنيەت سپورت قايراتكەرلەرى، زيالى قاۋىم وكىلدەرى قاتىسىپ وتىر.
