ەرلان سايروۆ وندىرىستە ادام كوز جۇمعان جاعدايدا 10 جىلدىق جالاقى كولەمىندەگى تولەم ەنگىزۋدى ۇسىندى
«پرەزيدەنت قاسىم-جومارت توقايەۆ جاقىندا ۇلتتىق كەڭەستە سويلەگەن سوزىندە ەڭبەك قاۋىپسىزدىگى شارالارىن جەتىلدىرۋگە ەرەكشە نازار اۋداردى. سونىمەن قاتار، 2020 -جىلى رەسپۋبليكا كاسىپورىندارىندا جازاتايىم وقيعالاردىڭ ناتيجەسىندە 1503 ادام زارداپ شەكتى، بۇل الدىڭعى جىلدىڭ ۇقساس كەزەڭىمەن سالىستىرعاندا 5 پايىزعا ارتىق (1430) جانە ولىممەن اياقتالعان 208 جازاتايىم وقيعا ورىن الدى، بۇل الدىڭعى جىلدىڭ ۇقساس كەزەڭىنە قاراعاندا 15 پايىزعا ارتىق (180)»، - دەدى ە. سايروۆ ۇكىمەت باسشىسىنىڭ ورىنباسارى ەرالى توعجانوۆتىڭ اتىنا جولداعان ساۋالىندا.
كاسىپوداقتار فەدەراتسياسىنىڭ مالىمەتىنشە، 192 كاسىپورىندا ادام ولىمىنە اكەپ سوققان جازاتايىم وقيعالار ورىن الىپ، 163 كاسىپورىندا جۇمىس بەرۋشىنىڭ كىناسى دالەلدەندى. بۇل رەتتە تەك 58 كاسىپورىندا كاسىپوداق ۇيىمدارى بار. بۇل كورىنىس جۇمىس بەرۋشىلەردىڭ قىزمەتكەرلەر ءۇشىن ءقاۋىپسىز ەڭبەك جاعدايلارىن قامتاماسىز ەتۋ ماسەلەلەرىندەگى جاۋاپسىزدىعىن بايقاتادى.
«ولىممەن اياقتالعان وندىرىستىك جاراقاتتانۋدىڭ ەڭ جوعارى دەڭگەيى ءداستۇرلى تۇردە قۇرىلىس سالاسىندا (%19)، تاۋ- كەن مەتاللۋرگيا سالاسىندا (%14)، اۋىل شارۋاشىلىعىندا (%8) بايقالادى»، - دەدى دەپۋتات.
وسى ورايلا ول ۇكىمەت پەن بيزنەس ەڭبەكتى قورعاۋ مەن ونىڭ قاۋىپسىزدىگىنە، ەلدىڭ ەڭبەك رەسۋرستارىنىڭ ساپاسىن ارتتىرۋعا ءجىتى نازار اۋدارۋى ءتيىس ەكەنىن ايتتى. بۇل تۇرعىدا دەپۋتاتتىق ساۋالدا جاعدايدى تۇزەتۋ ءۇشىن ءتيىستى ۇسىنىستار ايتىلدى:
1. وندىرىستە ادام قازا تاپقان جاعدايدا جۇمىس بەرۋشى ونىڭ وتباسىنا 10 جىلدىق جالاقىنىڭ كولەمىندە ءبىر رەتتىك تولەم جونىندەگى تالاپتى قالىپقا كەلتىرۋ. بۇگىندە كاسىپورىنداردا ەڭبەك قاۋىپسىزدىگىن ارتتىرۋعا ەشقانداي ەكونوميكالىق ىنتالاندىرۋ جوق. سوندىقتان وسى سالادا، ادامداردىڭ ولىمىنە الىپ كەلەتىن، كوزبوياۋشىلىق پەن فورماليزم قاپتاپ كەتكەن.
2. ەڭبەكتى قورعاۋ جونىندەگى تەحنيكالىق ينسپەكتورلاردىڭ نۇسقامالارىن ورىنداماعانى ءۇشىن جاۋاپكەرشىلىك شارالارىن ايقىنداي وتىرىپ، ولاردىڭ مارتەبەسىن قۇقىقتىق دەڭگەيگە شىعارۋ قاجەت. تيىسىنشە، ەڭبەك سالاسىنداعى قوعامدىق باقىلاۋدىڭ ءرولى مەن تەحنيكالىق ينسپەكتورلاردىڭ ميسسياسىن ارتتىرۋ كەرەك.
3. الەۋمەتتىك ارىپتەستەر ەلدىڭ كاسىپوداقتارىمەن بىرلەسىپ، تەحنيكالىق ينسپەكتورلاردىڭ وكىلەتتىكتەرىن ارتتىرۋ ماقساتىندا سالالىق كەلىسىمدەرگە جانە ۇجىمدىق شارتتارعا ەڭبەكتى قورعاۋ جونىندەگى تەحنيكالىق ينسپەكتورلاردىڭ وزەكتەندىرىلگەن وكىلەتتىكتەرى مەن ماتەريالدىق ىنتالاندىرۋ قادامدارىن ەنگىزگەن دۇرىس.
4. وندىرىستەگى جازاتايىم وقيعالار مەن كاسىبي اۋرۋلاردى ەسەپكە الۋ مەن باقىلاۋدىڭ ءبىرىڭعاي اقپاراتتىق جۇيەسى قالىپتاستىرۋ ماڭىزدى.
5. وندىرىستەگى جازاتايىم وقيعالاردان، كاسىپتىك اۋرۋلاردان زارداپ شەككەندەردى جانە كاسىپتىك تاۋەكەلى جوعارى قىزمەتكەرلەردى جۇمىسقا ورنالاستىرۋ ءۇشىن قولدانىلاتىن ماماندىقتار اتلاسىن ازىرلەۋ ماڭىزدى.