جۇرگىزۋشى كۋالىگىنە قاتىستى ماڭىزدى 10 سۇراقتىڭ جاۋابى

نۇر-سۇلتان. قازاقپارات - 13- اقپان قازاقستاندىقتارعا جۇرگىزۋشى كۋالىگىن وزىمەن بىرگە الىپ جۇرمەۋگە رۇقسات ەتەتىن جاڭا زاڭ كۇشىنە ەندى.

13- اقپاننان باستاپ قازاقستاندىقتار وزىمەن بىرگە جۇرگىزۋشى كۋالىگىن الىپ جۇرمەسە دە بولادى. جاڭا زاڭنىڭ تالاپتارى بويىنشا تەك جەكە كۋالىكتى عانا ۇستاۋعا رۇقسات بەرىلگەن. پوليتسەيلەر قالعان قۇجاتتى اقپاراتتىق بازا ارقىلى تەكسەرەدى. بۇدان بولەك، كەيبىر جۇرگىزۋشىلەر بۇعان دەيىنگى ايىپپۇلدان بوساتىلادى. وسى ماسەلەگە قاتىستى ماڭىزدى 10 سۇراقتىڭ جاۋابىن ۇسىنامىز.

1. جەكە كۋالىكتىڭ فوتوسىن كورسەتە سالۋعا بولا ما؟

- بۇگىندە قازاقستاندا سيفرلىق قۇجاتتار قىزمەتى جاقسى دامىعان. الايدا جەكە باستى كۋالاندىراتىن قۇجاتتار تۋرالى زاڭناماعا سايكەس، ازىرشە وسى ساناتتاعى قۇجاتتارعا ماتەريالدىق وبەكتىلەر، ياعني، قاعاز ۇلگىسىندەگى قۇجاتتار عانا جاتادى. سوندىقتان جول پوليتسياسىنا جەكە كۋالىكتىڭ فوتوسىن كورسەتە سالۋعا بولمايدى. قۇقىق قورعاۋشى ونى قولمەن ۇستاپ، جۇرگىزۋشىنىڭ جەكە باسىن انىقتاۋى ءتيىس. بولاشاقتا سيفرلىق قۇجاتتاردىڭ قۇقىقتىق مارتەبەسى وزگەرسە، كولىك جۇرگىزۋشىلەرىنە جەكە كۋالىكتىڭ سيفرلىق ۇلگىسىن دە قولدانۋعا رۇقسات بەرىلۋى مۇمكىن.

2. جەكە كۋالىكتەن بولەك قانداي قۇجاتتى كورسەتۋگە بولادى؟

«جەكە باستى كۋالاندىراتىن قۇجاتتار تۋرالى» زاڭدا وسى ساناتتاعى قۇجاتتاردىڭ ناقتى تىزبەسى بەرىلگەن. ولار:

- قازاقستان رەسپۋبليكاسى ازاماتىنىڭ پاسپورتى؛

- قازاقستان رەسپۋبليكاسى ازاماتىنىڭ جەكە كۋالىگى؛

- شەتەلدىكتىڭ قازاقستان رەسپۋبليكاسىندا تۇرۋ ىقتيارحاتى؛

- ازاماتتىعى جوق ادامنىڭ كۋالىگى؛

- قازاقستان رەسپۋبليكاسىنىڭ ديپلوماتتىق پاسپورتى؛

- قازاقستان رەسپۋبليكاسىنىڭ قىزمەتتىك پاسپورتى؛

- بوسقىن كۋالىگى؛

- تەڭىزشىنىڭ پاسپورتى؛

- شەتەلدىك پاسپورت؛

- قايتىپ ورالۋعا ارنالعان كۋالىك؛

- تۋۋ تۋرالى كۋالىك؛

- جول ءجۇرۋ قۇجاتى؛

ايتا كەتكەن ءجون، تۋۋ تۋرالى كۋالىك جەكە كۋالىككە دەيىن قولدانىلاتىن قۇجات بولىپ سانالادى.

3. پوليتسەيلەر باسقا قۇجاتتاردى قالاي تەكسەرەدى؟

- پوليتسەيلەر پلانشەت ارقىلى كولىككە قاتىستى بارلىق اقپاراتتى تەكسەرەدى. ول ءۇشىن جەكە كۋالىكتە كورسەتىلگەن مالىمەتتەردى اقپاراتتىق بازاعا ەنگىزەدى دە، جۇرگىزۋشى كۋالىگى، كولىكتى تىركەۋ كۋالىگى، ساقتاندىرۋ ءپوليسى، سونداي-اق، تەحنيكالىق بايقاۋ تۋرالى قۇجاتتاردىڭ ەلەكتروندى نۇسقاسىن الىپ شىعادى.

4. جەكە كۋالىك بولماسا، قانداي شارا قولدانىلادى؟

- جۇرگىزۋشىنىڭ جەكە كۋالىگى نەمەسە ءتولقۇجاتى بولماسا، الدىمەن ەسكەرتۋ بەرىلەدى. ون كۇننىڭ ىشىندە ادام تاعى جەكە كۋالىكسىز ۇستالعان جاعدايدا 5 ا ە ك (14585 تەڭگە) كولەمىندە ايىپپۇل سالىنادى. ال جۇرگىزۋشى كولىكتىڭ وزىنە تيەسىلى ەكەنىن دالەلدەي الماسا، كولىك ايىپپۇل تۇراعىنا قويىلادى.

5. كولىكتى ايىپپۇل تۇراعىنا قويۋدىڭ تاعى قانداي سەبەپتەرى بار؟

- جول پوليتسياسى پلانشەت ارقىلى كولىك قۇجاتتارىن تەكسەرگەندە ساقتاندىرۋ پوليسىن دە قارايدى. وسى قۇجات رولدە وتىرعان ادامنىڭ اتىنا راسىمدەلۋى ءتيىس. زاڭ بويىنشا كولىكتى باسقارىپ جۇرگەن ادامدا تىركەلگەن ساقتاندىرۋ پوليسى بولماسا، اكىمشىلىك حاتتاما راسىمدەلەدى. جۇرگىزۋشىگە 10 ا ە ك (29170 تەڭگە) كولەمىندە ايىپپۇل سالىنادى. ال كولىك ايىپپۇل تۇراعىنا قويىلادى.

6. بۇعان دەيىن جۇرگىزۋشى كۋالىگىن الماعانى ءۇشىن راسىمدەلگەن ايىپپۇلدى تولەمەۋگە بولا ما؟

- ءيا، جاڭا زاڭنىڭ كەرى كۇشى بار. ەگەر زاڭ قابىلداعانعا دەيىن كولىك يەسىنە جۇرگىزۋشى كۋالىگىن قالدىرىپ كەتكەنى ءۇشىن اكىمشىلىك حاتتاما راسىمدەلسە، ال، ەڭ باستىسى، ايىپپۇل تولەنبەسە، ونى الىپ تاستايدى، ايىپپۇل كەشىرىلەدى. ول ءۇشىن ءوتىنىش جازۋ قاجەت. شەتەلدىك ءنومىر تاققان كولىكتەر مەن جۇرگىزۋشى كۋالىگىن شەتەلدە العان جۇرگىزۋشىلەر ايىپپۇلدان بوساتىلمايدى.

7. تاس جولدىڭ بويىندا ينتەرنەت ۇستاماسا، پوليتسەي كولىككە قاتىستى مالىمەتتەردى قالاي تەكسەرەدى؟

- پوليتسيا قىزمەتكەرلەرى ينتەرنەتى جوق ەلدى مەكەندەردە جانە تاس جولداردا كولىك پەن جۇرگىزۋشىگە قاتىستى بارلىق اقپاراتتى راديوبايلانىس ارقىلى تەكسەرە الادى.

8. پوليتسەي جۇرگىزۋشى كۋالىگىن تالاپ ەتسە، نە ىستەۋ كەرەك؟

- 13- اقپاننان باستاپ پوليتسيا قىزمەتكەرى جۇرگىزۋشى كۋالىگىن تالاپ ەتسە، «102»- گە قوڭىراۋ شالۋعا نەمەسە ىشكى قاۋىپسىزدىك قىزمەتىنە ارىز تۇسىرۋگە بولادى. ال اكىمشىلىك حاتتاما جاسالسا، سوتتا قارسىلىق ءبىلدىرىپ، كۇشىن جويۋعا مۇمكىندىك بار.

9. شەتەلدىك نومىرمەن جۇرگەن كولىك يەلەرى قانداي قۇجات ۇستايدى؟

- زاڭنىڭ جاڭا نورماسى تەك قازاقستان ازاماتتارىنا عانا قاتىستى. شەتەلدىك ءنومىر تاققان كولىكتەر مەن جۇرگىزۋشى كۋالىگىن شەتەلدە العان جۇرگىزۋشىلەر وزىمەن بىرگە بارلىق قۇجاتتى الىپ ءجۇرۋى ءتيىس.

10. جۇرگىزۋشى كۋالىگى مەن تەحنيكالىق تولقۇجاتتىڭ قاعاز نۇسقاسىن شىعارۋ توقتاتىلا ما؟

جوق، جۇرگىزۋشى كۋالىگى مەن تەحنيكالىق ءتولقۇجاتتىڭ قاعاز نۇسقاسىن بەرۋ توقتاتىلمايدى. بۇل الەۋمەتتىك ماڭىزى بار مەملەكەتتىك قىزمەت بولىپ سانالادى. وعان قوسا، شەتەلگە شىققاندا جۇرگىزۋشى كۋالىگى مەن تەحنيكالىق ءتولقۇجاتتى الىپ ءجۇرۋ كەرەك. جۇمىسقا ورنالاسقاندا كاتەگوريانى دا راستاۋعا بولادى. سوندىقتان وسى قۇجاتتار شىعارىلا بەرەدى.

sputniknews.kz