پەداگوگتار ءۇشىن 10 مىڭ تۇراقتى جۇمىس ورنى قۇرىلادى - ۇكىمەت وتىرىسى

نۇر- سۇلتان. قازاقپارات - بۇگىن ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ەل اۋماعىندا سالىناتىن الەۋمەتتىك نىساندار تۋرالى ايتتى، دەپ حابارلايدى قازاقپارات ءتىلشىسى.

«جۇمىسپەن قامتۋ» جول كارتاسىنىڭ الداعى ۋاقىتتا الەۋمەتتىك- ەكونوميكالىق وڭ اسەرى جونىندە تاعى دا ەسكە سالا كەتكىمىز كەلەدى. جاڭادان سالىناتىن 683 نىسان دا بولاشاقتا وڭىرلەردە الەۋمەتتىك اكتيۆ رەتىندە حالىققا قىزمەت ەتەتىن بولادى. ونىڭ ىشىندە ءبىلىم بەرۋ سالاسىنداعى 80 جاڭا قۇرىلىس اپاتتىق ءۇش اۋىسىمدى مەكتەپ، اۋىلدا ءبىلىم الۋعا قولجەتىمدىلىك ماسەلەلەرىن شەشۋمەن قاتار، ءبىزدىڭ پەداگوگتارىمىزعا 10 مىڭ جاڭا تۇراقتى جۇمىس ورنىن بەرەدى»، - دەدى مينيستر.

بۇدان بولەك، دەنساۋلىق، مادەنيەت، سپورت جانە تۋريزم سالاسىنداعى جاڭا 60 جوبا 20 مىڭ تۇراقتى جۇمىس ورنىن قامتىماق. 153 سۋ شارۋاشىلىق نىسانىنىڭ قۇرىلىسى مەن جاڭعىرتىلۋى سۋارمالى جانە جايىلىمدىق جەرلەردىڭ كولەمىن ەداۋىر ارتتىرىپ، اۋىل شارۋاشىلىعىندا 77 مىڭ تۇراقتى جۇمىس ورنىن بەرمەك. سونداي- اق 400-گە جۋىق كوممۋنالدىق- شارۋاشىلىق نىسانىن، 8 مىڭ شاقىرىمنان استام قالالىق ءارى اۋىلدىق جولدى سالۋ مەن جاڭارتۋ جوسپارلانعان.

«900 ەلدى مەكەندى اباتتاندىرۋ - اكىمدەردىڭ حالىقپەن كەزدەسۋى كەزىندە تۇرعىنداردىڭ كوتەرگەن ماسەلەلەرىن شەشۋگە جانە حالىقتىڭ ءومىر ءسۇرۋ ساپاسىن ارتتىرۋعا باعىتتالعان. جالپى، جول كارتاسىنىڭ جوبالارى 100 مىڭنان استام تۇراقتى جۇمىس ورنىن قۇرۋعا نەگىز قالايتىن بولادى»، - دەدى نۇرىمبەتوۆ.

بۇدان بۇرىن حابارلانعانداي، جول كارتاسى اياسىندا 13 مودۋلدىك ينفەكسيالىق اۋرۋحانا سالىنادى. اۆتور: رۋسلان عابباسوۆ