د د س ۇ: كەلەسى اپتادا كوروناۆيرۋس جۇقتىرعاندار سانى الەم بويىنشا 10 ميلليوننان اسادى
مامانداردىڭ پىكىرىنشە، جەر جاھاندا ىندەتتىڭ ەكىنشى تولقىنى كۇتىلۋدە دەپ حابارلايدى «استانا» ارناسى.
ۇيىم ديرەكتورى تەدروس ادحانوم گەبرەيەسۋستىڭ ايتۋىنشا، سوڭعى ايدا ءتورت ميلليوننان استام ادام ۆيرۋس جۇقتىرعان.
«ىندەتتىڭ ءورشي تۇسكەن العاشقى ايىندا ون مىڭداي جاعداي تىركەلدى. وتكەن ايدا ءتورت ميلليونعا جۋىقتادى. كەلەسى اپتادا ون ميلليونعا جەتەدى. ءبىز ۆاكتسينانى زەرتتەۋمەن قاتار ادامدار ءومىرىن ساقتاپ قالۋعا تالپىنىپ جاتىرمىز. سوعان قاراماستان قاۋىپتى ىندەتتىڭ تەز تارالۋى قاتتى الاڭداتادى»، - دەيدى ول.
ايتا كەتۋ كەرەك، covid-19 لاتىن امەريكادا ءورشىپ تۇر. برازيليادا سوڭعى تاۋلىكتە كوروناۆيرۋس جۇقتىرۋدىڭ 42 مىڭ جاعدايى تىركەلگەن. ال پەرۋدەگى كارانتينگە قارسى نارازىلىق شارالارىنا قاتىسۋشىلار پوليتسەيلەرمەن قاقتىعىسىپ قالدى. ولار ىشەرگە اس تابا الماي وتىرعاندارىن ايتىپ، جۇمىسقا شىعارۋدى تالاپ ەتۋدە.
بۇل ەلدە ەكى ءجۇز الپىس مىڭنان استام ادامنان COVID-19 انىقتالعان. سەگىز مىڭنان استامى كوز جۇمعان. دۇنيەجۇزىلىك دەنساۋلىق ساقتاۋ ۇيىمىنىڭ وكىلدەرى اتالعان ەلدەردەگى جاعداي ءۇشىن الاڭداۋشىلىق بىلدىرۋدە.
«سولتۇستىك جانە وڭتۇستىك امەريكادان سوڭ، ەندى ۋشىعا باستاعان ورتالىق جانە لاتىن امەريكاسىندا جاعداي ءالى ورلەۋ شىڭىنا جەتكەن جوق. سوندىقتان الداعى اپتادا ىندەت جۇقتىراتىندار سانى ەسەلەنىپ، ادام ءولىمىنىڭ ارتۋىنا اكەپ سوعۋى ىقتيمال»، - دەيدى د د س ۇ توتەنشە جاعدايلار بويىنشا باعدارلامالار جونىندەگى اتقارۋشى ديرەكتورى مايكل رايان.
كارانتين بوساڭسي قالعان سوڭ كاليفورنيا تۇرعىندارى جاپپاي جاعاجايعا اسىعىپ، مەيرامحانالارعا شوعىرلانعان.
سونىڭ سالدارىنان سوڭعى ەكى كۇننىڭ ىشىندە كوروناۆيرۋس جۇقتىرعاندار سانى 70 پايىزعا كوبەيگەن.
«دۇيسەنبى كۇنى COVID-19 جاعدايىنىڭ جاڭادان 4230 دەرەگى تىركەلدى. قازىر شامامەن 69 پايىزعا ارتتى. جەتى مىڭنان استام ادام دەگەنىڭىز كاليفورنيا شتاتى ءۇشىن تىم كوپ، رەكوردتىق كورسەتكىش. بۇل ۆيرۋستا شەكارا جوق. ساق بولىڭىزدار. قوعامنان وقشاۋلانۋدى ۇيرەنىڭىزدەر»، - دەيدى كاليفورنيانىڭ گۋبەرناتورى گەۆين نيۋسوم.
ەستەرىڭىزگە سالا كەتەيىك، بۇعان دەيىن ەۋروپانىڭ 30 ەلىندە كوروناۆيرۋس ينفەكتسياسىن جاپپاي جۇقتىرۋ جاعدايلارى قايتادان انىقتالا باستاعانىن حابارلاعان ەدىك.