ەلىمىزدە ءبىر جاسقا تولماعان 10 مىڭ ءبۇلدىرشىننىڭ اتىندا دەپوزيت بار
اتالعان دەپوزيت ءتۇرى بويىنشا تۇرعىن ءۇي قۇرىلىس جيناق بانكىندە جينالعان قاراجات سوماسى - 10,7 ميلليون تەڭگە، دەپ حابارلايدى قازاقپارات بانكتىڭ باسپا ءسوز قىزمەتىنە سىلتەمە جاساپ.
قازىرگى كەزدە وسى قىزمەتتى پايدالانىپ، 164817 اتا-انا ءوز بالالارىنا ەسەپشوت اشقان. ال، ءدال وسىدان ءبىر جىل بۇرىن بانكتەگى بالالار دەپوزيتىنىڭ سانى 144682 ءنى قۇراعان بولاتىن.
نەگىزىنەن، بانكتەگى شوتتار 1 جاستان 10 جاسقا دەيىنگى سابيلەرگە اشىلعان. قازىرگى ساتتە وسى جاس ارالىعىنداعى بالالاردىڭ اتىندا 88761 دەپوزيت بار. ەكىنشى ورىندا تۇرعاندار - تۇرعىن ءۇي قۇرىلىس جيناق بانكىنىڭ 10 جاستان 18 جاسقا دەيىنگى سالىمشىلارى. ولارعا اشىلعان جالپى دەپوزيت سانى - 65480. ال، ءۇشىنشى كەزەكتە - بانكتىڭ ەڭ كىشكەنتاي كليەنتتەرى، ياعني، 1 جاسقا دەيىنگى سابيلەر. ولاردىڭ اتىنا بۇگىندە 10576 دەپوزيت اشىلعان.
«جالپى، جىل سايىن بالالار دەپوزيتىنە دەگەن سۇرانىس اسىرەسە كۇز ايىندا، اتاپ ايتساق، بالالاردىڭ مەكتەپكە باراتىن كەزىندە ەرەكشە بايقالادى. ءدال وسى ساتتە كوپشىلىك اتا-انا بالالارىنىڭ ءوسىپ كەلە جاتقانىن ەسكەرىپ، ولاردىڭ جارقىن بولاشاعى ءۇشىن جاعداي جاساۋ كەرەكتىگى جونىندە شەشىم قابىلدايدى (ماسەلەن، تۇرعىن ۇيگە ينۆەستيتسيا سالۋ).
سوندىقتان، ولار تۇرعىن ءۇي قۇرىلىس جيناق بانكىندە دەپوزيت اشىپ، قاراجات جيناقتاي باستايدى. ال بانك، ءوز تاراپىنان ءاربىر سالىمشىنىڭ جيناعان اقشاسىنا جىل سايىن مەملەكەتتىك سىياقى مەن بانك سىياقىسىن تولەيدى. مۇنىڭ ءبارى بىرىگىپ سالىم بويىنشا جىلدىق %13 كولەمىندەگى جىلدىق ءتيىمدى مولشەرلەمەنى قۇرايدى» دەلىنگەن حابارلامادا.
تاعى ءبىر ايتا كەتەتىن جايت، بالالار 18 جاسقا تولعاندا كەرەمەت جەڭىلدىكتەردىڭ بىرىنە، ياعني، جىلدىق %3,5- دان %5- عا دەيىنگى مولشەرلەمەمەن تۇرعىن ءۇي زايمىن نەسيەگە الۋ مۇمكىندىگىنە يە بولادى.
بالالارعا ارنالعان دەپوزيتتى ءاربىر اتا-انا وزىنە ىڭعايلى كەز كەلگەن جەردە جانە ۋاقىتتا، ءتىپتى پەرزەنتحانادا دا اشۋىنا بولادى. ول ءۇشىن تەك بانك كەڭەسشىسىن شاقىرتۋ جەتكىلىكتى.
ال، دەپوزيتتى اشار كەزدە ءسابيدىڭ تۋۋ تۋرالى كۋالىگى مەن ونىڭ اتا-اناسىنىڭ بىرەۋىنىڭ جەكە كۋالىگى قاجەت. جالپى، بالالار دەپوزيتى - كەز كەلگەن ءسابيدىڭ بولاشاق باسپاناسىنا قاراجات جيناقتاۋدىڭ تاماشا مۇمكىندىگى. ول، سونداي-اق، «وتباسىلىق پاكەتتىڭ» ءبىر بولىگى رەتىندە قاراجات تابىستىلىعىن ارتتىرىپ، ءوز ۇيىنە قاراجات جيناپ جاتقان وتباسىنىڭ تۇرعىن ءۇي زايمىن تەزىرەك الۋىنا جول اشادى.
