كوزگە وتا جاساپ - وپىق جەپ قالماڭىز: لازەرلىك كوررەكسياعا قاتىستى 10 كەڭەس

 استانا. قازاقپارات - كوزىلدىرىك كيەتىن ادامداردىڭ نەگىزگى ارمانى - كوزدەگى قۇرالدان نەمەسە جاناسپالى لينزادان قۇتىلۋ. مۇنداي مۇمكىندىكتى لازەرلىك كوررەكسيا ۇسىنۋدا.

جارنامالاردا ءمىنسىز كورسەتىلەتىن ءادىستىڭ ارتىقشىلىعى مەن كەمشىلىگىن اجىراتۋدى ءجون سانادىق. بۇل ماقساتتى ىسكە اسىرۋعا دارىگەر- وفتالمولوگ جومارت دجۋنۋسبەكوۆ كومەكتەستى.

1. سوڭعى جىلدارى ترەندكە اينالعان «مينۋستى نولگە» تۇسىرەتىن وتانىڭ اتى - لازەرلىك كوررەكسيا. قازىرگى ۋاقىتتا نەگىزگى لازەرلىك كوررەكتسيانىڭ بىرنەشە تۇرلەرى قولدانىلادى.

 ولار: لاسيك (ەكسيمەر- لازەرلىك كەراتوميلەز) ، فەمتولاسيك جانە Smile. بۇلاردىڭ بارلىعى كوزدىڭ ءمۇيىزدى (قاساڭ قابىعى؛ شىناينا) قاباتىنىڭ ورتاڭعى بولىگىنە اسەر ەتەتىن وتانىڭ تۇرلەرى. بۇل ادىستەر ارقىلى جاقىننان كورگىشتىكتى (ميوپيا)، الىستان كورگىشتىكتى (گيپەرمەتروپيا) جانە استيگماتيزمدى ەمدەۋگە بولادى. ال، مينۋستى جاتتىعۋلاردىڭ نەمەسە دارىلەردىڭ كومەگىمەن قالىپقا كەلتىرۋ دەگەن قۇر اڭىز. سەبەبى، ول تاجىربيە جۇزىندە مۇمكىن ەمەستىگى سان مارتە دالەلدەنگەن.

2. لازەرلىك كوررەكسيانى 18-20 جاستان باستاپ جاساۋعا بولادى. سەبەبى بۇل جاستا كوزدىڭ تولىق قالىپتاسۋىن بايقايمىز. ياعني، بۇل جاس ارالىعىندا كوزدىڭ الدىڭعى- ارتقى ۇزىندىعى ارى قاراي وسپەيتىنىن كورەمىز. بۇل دەگەن ءسوز، مينۋس ءبىر قالىپتى. ءبىراق كەيبىر ناۋقاستاردا 23-25 جاستا عانا ميوپيا تولىقتاي قالىپتاسادى. سوندىقتان، لازەرلىك كوررەكسيانى اسىقپاي جاساتقان ابزال. كەيبىر دارىگەرلەر كليەنتتى جوعالتپاس ءۇشىن كامىلەتكە تولعان ءار ادامعا جاساي بەرەدى. ءبىراق، ول - دۇرىس ەمەس.

3. وتادان سوڭ كوزدىڭ كورۋ قابىلەتى قايتادان ناشارلامايدى. ءبىراق، ەگەر ناۋقاستا جىلدان- جىلعا مينۋس ءوسىپ جاتقانىنا قاراماستان وپەراتسيا جاسالسا، وندا بىرنەشە جىلدان سوڭ ازداپ جاڭا مينۋس پايدا بولۋى مۇمكىن. جوعارىدا ايتقان ميوپيا ماسەلەسى وسىعان بايلانىستى.

4. لازەرلىك كوررەكسيادان سوڭ جاقىننان كورۋ قابىلەتى ناشارلايدى. بۇل دەگەنىمىز - بۇگىن جاساپ، ەرتەڭ ناشارلايدى دەگەن ءسوز ەمەس. ايەل ادام 45-48 جاستان سوڭ، ەر ادام 50 جاستان سوڭ جاقىننان كورۋ ءۇشىن ارنايى كوزىلدىرىك كيەتىن بولادى. مەنىڭ تاجىريبەمدە بولعان وقيعانى ايتىپ بەرەيىن. وتا جاساتۋ ءۇشىن 46 جاستاعى ايەل ادام كەلدى. ول الىستان % 100 كورگىسى كەلەتىنىن، ال جاقىندى كورۋ ءۇشىن كوزىلدىرىك كيۋگە دايىن ەكەنىن اشىق ايتتى. ءبىز وتا جاسادىق، ەرتەسىنە مەن جاقىننان كورسەتەتىن پليۋس كوزىلدىرىك جازىپ بەردىم. ال، ەگەردە لازەرلىك كوررەكسيا كەزىندە ەڭ تومەنگى دەڭگەيدەگى مينۋستى قالدىرساق، مۇنداي قيىندىق بولمايدى.

5. وتادان بۇرىن كوزدى تولىق دياگنوستيكادان وتكىزگەنى ءجون. سەبەبى كەز- كەلگەن كوزگە بۇنداي وپەراتسيا لايىق بولماۋى مۇمكىن. سوندىقتان، وپەراتسيانىڭ الدىندا ءبىر- ەكى كۇن ىشىندە دايىندىق جاسالادى. اسىرەسە، جاناسپالى لينزانى كۇندەلىكتى تۇردە تاققان ادامداردان وپەراتسياعا دەيىن ءبىر- ەكى اپتاداي تاقپاۋىن تالاپ ەتەمىز.

6. لازەرلىك كوررەكسيانى، ارينە، بارلىق ادامعا جاساۋعا بولمايدى. مىسالى، ەگەر دە، قاساڭ قابىعىنىڭ قالىڭدىعى از بولىپ، لازەرلىك وپەراتسياعا جەتكىلىكسىز بولسا، وندا بۇل ادامدارعا جاساۋعا بولمايدى. نەمەسە، كاتاراكتا، گلاۋكوما، وتسلويكا سەتچاتكي، كەراتيت، كونيۋنكتيۆيت جانە ت. ب. كوز اۋرۋلار بولسا، وپەراتسيانى مۇلدەم جاساۋعا بولمايدى.

7. جۇكتى جانە ەمىزەتىن ايەلدەرگە لازەرلىك كوررەكسيانى جاساۋعا تىيىم سالامىز. بىرىنشىدەن، وپەراتسيا كەزىندە جانە وپەراتسيادان سوڭ پروفيلاكتيكا رەتىندە كوزگە انتيبيوتيكتەردى تامىزامىز. بۇل تامشىلاردىڭ بالاعا كەرى اسەرى بولۋى مۇمكىن. ال ەكىنشىدەن، بۇنداي جاعدايدا گورمونالدىق ديسبالانس بولادى. ول وپەراتسيانىڭ ەسەپتەرىنىڭ قاتە بولۋىنا اسەر ەتەدى. وپەراتسيادان كەيىن تابيعي جولمەن بوسانۋعا بولادى. بوسانۋعا وپەراتسيانىڭ بۇعان ەشقانداي قاتىسى جوق. بۇنىڭ بارلىعى سەتچاتكانىڭ (تور قابىعىنىڭ) ساۋ نەمەسە ءالسىز بولۋىنا بايلانىستى. ياعني، ەگەر سەتچاتكانىڭ جاعدايى جاقسى بولسا، جىرتىقتار نەمەسە ديستروفيالار بولماسا، وندا مينۋس ءبىر بولسىن، مينۋس ون بولسىن، تابيعي جولمەن بوسانۋعا بولادى. ال ەگەر دە، سەتچاتكادا وزگەرىستەر بولسا (ديستروفيا نەمەسە جىرتىقتار) ، وندا تەك قانا دارىگەرلەردىڭ پىشاقتارىنىڭ كومەگىمەن بوسانۋعا بولادى.

8. لازەرلىك كوررەكسيا وتە تەز، ءارى اۋىرتپاي جاسالىنادى. بارلىعى بولعانى 10-15 مينۋتتى عانا الادى. ەشقانداي اۋىر وپەراتسيا ەمەس. اۋىرسىنۋدى باساتىن تامشىلاردى تامىزعان سوڭ، كوز ەشتەڭە سەزبەيدى. ەشقانداي ناركوز بەرىلمەيدى، سوندىقتان ناۋقاس وياۋ بولىپ جاتادى. بۇل وپەراتسيانىڭ ەشقانداي قاۋىپى جوق جانە وسى ۋاقىتقا دەيىن لازەرلىك كوررەكسيادان سوڭ ەشكىم سوقىر قالعان جوق.

9. وپەراتسيادان سوڭ ەڭ كەمىندە جىلىنا ءبىر رەت دارىگەرگە قارالۋى ءجون. وپەراتسيادان كەيىن بارلىق ناۋقاستارعا 2-4 اپتانىڭ ىشىندە باسسەيندە نەمەسە سۋعا شومىلۋعا، اۋىر زاتتى كوتەرۋگە، ىشىمدىكتى ىشۋگە، كوزدى ۋقالاۋعا تىيىم سالامىز. ال كومپيۋتەردىڭ الدىندا جۇمىس ىستەۋگە، ۇشاقپەن سەرۋەندەۋگە، ماشينا جۇرگىزۋگە ءبىر- ەكى كۇننەن كەيىن رۇقسات بەرەمىز.

 10. قازاقستاندا لازەرلىك كوررەكسيانىڭ باعاسى  250000- 800000 تەڭگە ارالىعىن قامتيدى. باعانىڭ قىمبات بولۋى مەكەمە قولدانىلاتىن لازەرلىك جابدىقتىڭ، جاساعان ادىستەردىڭ جانە دارىگەردىڭ تاجىريبەسىنە بايلانىستى.

https://comode.kz