استانادا وتەتىن «قاسيەتتى قازاق ەلى» فەستيۆالىنە 10 ەلدەن قانداستارىمىز قاتىسادى

استانا. قازاقپارات - ەلوردادا شەتەلدىك وتانداستارىمىزدىڭ قاتىسۋىمەن «قاسيەتتى قازاق ەلى» اتتى حالىقارالىق ونەر فەستيۆالى وتەدى، دەپ حابارلايدى قازاقپارات ءتىلشىسى.

ونەر فەستيۆالىنە 10 ەلدەن بارلىعى 50 گە جۋىق ۇمىتكەر قاتىسادى. ونىڭ 35 ى - شەتەلدەن، قالعانى - ءوز ەلىمىزدەن. فرانسيا، اۋعانستان، تۇركيا، يران جانە تاعى باسقا ەلدەردەن وتانداستارىمىز ب ا ق سىنايدى.

بايقاۋ ءۇش باعىتتا وتەدى: ءداستۇرلى قولونەر سايىسى، تەرمەشىلەر بايقاۋى جانە جىر ءمۇشايراسى.

«بۇل فەستيۆال - جىل سايىن وتكىزىلىپ كەلە جاتقان ايتۋلى شارا. مۇنداعى ماقسات - شەتەلدە تۇراتىن قانداستارىمىزدىڭ باسىن قوسىپ، ۇلتتىق ونەرىمىزدى بىرگە ۇلىقتاۋ. بيىل ونەر دوداسىن ەلوردا تورىندە وتكىزەمىز دەپ شەشتىك. ال كەلەسى جىلى الدىمەن ەلىمىزدىڭ بارلىق وڭىرىندە ايماقتىق فەستيۆال وتكىزىپ، ىشىنەن ۇزدىكتەرىن تاڭدايمىز. سوسىن عانا جىل سوڭىندا استانادا ءىرى كولەمدە فەستيۆال ۇيىمداستىرۋدى جوسپارلاپ وتىرمىز»، - دەدى دۇنيەجۇزى قازاقتارى قاۋىمداستىعىنىڭ استانا جانە اقمولا وبلىستىق فيليالىنىڭ باسشىسى قارلىعاش بەكپاتشا قىزى.

ۇيىمداستىرۋشىلاردىڭ ايتۋىنشا، ونەر شاراسى شەتەلدەگى وتانداستارىمىزبەن قارىم-قاتىناستى نىعايتۋ ءۇشىن ماڭىزدى. جانە بيىلعى ەرەكشەلىك - العاش رەت استانادا وتكىزىلۋىندە.

حالىقارالىق ونەر باسەكەسىنىڭ جالپى جۇلدە قورى - 3 ميلليون تەڭگەگە جۋىق. شارا دۇنيەجۇزى قازاقتارى قاۋىمداستىعى مەن «وتانداستار» قورىنىڭ ۇيىمداستىرۋىمەن 7 -قاراشا كۇنى «بەيبىتشىلىك جانە كەلىسىم» سارايىندا وتەدى. قولداۋشى - قوعامدىق دامۋ مينيسترلىگى.

بۇعان دەيىن حابارلاعانىمىزداي، بۇگىن استانادا شەتەل قازاقتارى باس قوسقان بولاتىن.