الەمدەگى ەڭ جىلدام 10 پويىز: قازاقستانداعى «تۇلپار» نەشىنشى ورىندا؟

 استانا. قازاقپارات - الەمدە جىلدام جۇرەتىن پويىزدار وتە كوپ. ءبىراق ولار رەكورد ورناتقان جىلدامدىعىن جولاۋشىلار تاسىمالداۋ كەزىندە ماكسيمال تۇردە پايدالانبايدى.

كەيبىر رەكوردتار ارنايى تەمىر جولداردا جۇزەگە اسىرىلسا، كەيبىرى ماگنيت قۇرىلعىسى ارقىلى جۇزەگە اسىرىلادى.

ەندەشە ءبىز الەمدەگى ەڭ جىلدام 10 پويىز تۋرالى اڭگىمەلەيتىن بولامىز.

10. Eurostar e320

ساعاتىنا 320 شاقىرىمدىق جىلدامدىقپەن قوزعالاتىن بۇل پويىز لوندون، پاريج جانە بريۋسسەل ارالارىن ءبىر-بىرىمەن بايلانىستىرادى. Eurostar e320 ۇزىندىعى 560 شاقىرىم بولاتىن اتاقتى لا-مانش بۇعازى ارقىلى جۇرەدى. جولاۋشىلار كوزدەگەن مەكەنىنە ورتاشا ەسەپپەن 2 ساعات 15 مينۋتتا جەتەدى.

بۇل پويىز نەمىستىڭ Siemens Velaro زاۋىتىندا قۇراستىرىلعان بولسا دا، Eurostar فرانسيا،  ۇلى بريتانيا جانە بەلگيانىڭ بىرىككەن جوباسى بولىپ ەسەپتەلەدى.

9. Talgo 350


 

ءبىز جاقسى بىلەتىن، ەلىمىزدەگى جولاۋشىلارعا قىزمەت كورسەتەتىن «تۇلپار» پويىزى «atentes Talgo S. L. » كومپانياسىنا تيەسىلى وسى پويىزدىڭ موديفيكاتسيالانعان ءتۇرى.

بۇل پويىزدىڭ دامىعان نۇسقاسى ارنايى جولداردا جىلدامدىعىن ساعاتىنا 350 شاقىرىمعا دەيىن ارتتىرا الادى. ونى يسپانيالىقتار تۇمسىعى ۇيرەككە ۇقسايتىن بولعاندىقتان «Pato» (ۇيرەك) دەپ اتايدى.

ال ەلىمىزدەگى «تۇلپار- Talgo250» پويىزى ماكسيمال جىلدامدىعىن ساعاتىنا 250 شاقىرىمعا جەتكىزە العانىمەن، جولاۋشىلاردى تاسىمالداۋ كەزىندە ساعاتىنا 140-160 شاقىرىم جىلدامدىقپەن عانا قوزعالادى.

8. Shinkansen

جاپونيانىڭ وتە جوعارى جىلدامدىقپەن قوزعالاتىن پويىزدارىنىڭ ءبىرى Shinkansen Е5 جانە Е6 مودەلدەرى. بۇل پويىزدار قاجەت جاعدايدا جىلدامدىعىن ساعاتىنا 400 شاقىرىمعا دەيىن جەتكىزە الادى.

7. Velaro E



Siemens Velaro دەپ اتالاتىن بۇل پويىز يسپانيانىڭ RENFE تەمىر جول كومپانياسىنا تيەسىلى. ول ماكسيمال جىلدامدىعىن ساعاتىنا 404 شاقىرىمعا دەيىن ارتتىرادى جانە بۇل جاعىنان يسپانياداعى ەڭ جىلدام پويىز بولىپ ەسەپتەلەدى.

6. Aerotrain I80

فرانسۋز ينجەنەرى جان بەرتەن ويلاپ تاپقان پويىز رەاكتيۆ-قوزعالتقىشپەن جۇرەدى. جان بارتەن تۋىندىسىمەن 1974-جىلى جىلدامدىق بويىنشا رەكورد ورناتقان. ءبىراق ساعاتىنا 430 شاقىرىم جىلدامدىقپەن قوزعالا الاتىن بۇل پويىزعا بىردە-ءبىر جولاۋشىنى تاسۋ باقىتى بۇيىرماعان.

1977-جىلى جان بەرتەن قايتىس بولعانان سوڭ جوبا قارجىسىز قالىپ، جابىلعان. ءبىراق ينجەنەردىڭ يدەيالارى ولگەن جوق. ماگنيت جانە اۋا جاستىعى ارقىلى قوزعالاتىن ءتاسىل باسقا پويىزداردا كەيىننەن قولدانىلا باستادى. بۇل تۋرالى ءبىز كەيىن كولەمدى ماقالا جاريالايتىن بولامىز.

5. CRH380A

قىتايدا 2010-جىلى پايدالانۋعا بەرىلگەن تەمىر تۇلپاردىڭ ەرەكشەلىگى اتالعان پويىز قىتايلىق ينجەنەرلەردىڭ شەت ەلدىك كونسترۋكتسيالار جانە تەحنولوگيالارىنسىز قۇراستىرىلعان العاشقى وتاندىق ءونىمى بولىپ ەسەپتەلەدى.

CRH380A پويىزىنىڭ ماكسيمال جىلدامدىعى ساعاتىنا 486 شاقىرىم، ءبىراق 2011-جىلعى اپاتتان كەيىن جىلدامدىعىن 300 ك م/ساعات ەتىپ شەكتەگەن.

4. Shanghai Maglev Train

بۇل ماگنيتتىك جاستىقشادا قوزعالاتىن العاشقى كوممەرتسيالىق پويىز تۇڭعىش رەت 2004-جىلى رەلسكە شىعىپ، جىلدامدىعىن ساعاتىنا 500 شاقىرىمعا دەيىن ارتتىرعان. قازىر SMT شاڭحاي قالاسىنىڭ شەتكى اۋداندارىن پۋدۋن حالىقارالىق اۋەجايىمەن بايلانىستىرادى.

3. TGV POS



2007-جىلى موديفيكاتسيالانعان پويىز قاراپايىم كولىكتەر اراسىنداعى الەم رەكوردىن ورناتىپ، جىلدامدىعىن ساعاتىنا 575 شاقىرىمعا جەتكىزگەن. كەيىن پويىزعا ءبىرقاتار وزگەرىستەر ەنگىزىلدى.

ۇلكەن دوڭگەلەكتەر ورناتىلىپ، 2 قوزعالتقىش عانا قالدىرىلدى. وسىدان سوڭ ول فرانسيا مەن شۆەيتساريا اراسىنا قاتىناي باستادى. ورتاشا جىلدامدىعى ساعاتىنا 320 شاقىرىم.

2. JR-Maglev MLX01




2003-جىلى جاپونيانىڭ ياماناسي وكرۋگىندە ورنالاسقان ارنايى 40 شاقىرىمدىق تەمىر جولدا ساعاتىنا 585 شاقىرىم جىلدامدىقپەن قوزعالعان MLX01 پويىزىنىڭ رەكوردىن كەيىنگى 12 جىلدا وسى ساناتتاعى ەشقانداي ترانسپورت جاڭارتا الماعان. 2015-جىلدا عانا ول ءوزىنىڭ كوشباسشىلىق ورنىن كەيىنگى «ۇرپاققا» بوساتىپ بەردى.

1. SCMaglev L0 Series

ماگنيتپەن قوزعالاتىن بۇل تەمىر تۇلپاردىڭ جىلدامدىعىنا اناۋ-مىناۋ ۇشاق ىلەسە المايدى. 2015-جىلى 603 شاقىرىم جىلدامدىقپەن قوزعالعان SCMaglev L0 Series-ءتىڭ ىشىندە تەك ماشينيست قانا بولعان ەكەن. جاپونيانىڭ تەحنولوگيا عاجايىبى سانالاتىن SCMaglev L0 Series بۇگىندە توكيو-وساكا ارالىعىندا قاتىنايدى.

ءبىراق جوعارىدا ايتىپ وتكەن پويىزدارداي بۇل دا ماكسيمال جىلدامدىعىن پايدالانبايدى. بۇل پويىزداردى نەگە ەۋروپا، قىتاي نەمەسە جاپونيادا عانا پايدالاناتىنىن ءتۇسىندىرىپ كەتكەن دۇرىس.

ورتاشا 800-1000 عا دەيىن جولاۋشى تاسىمالدايتىن جىلدام تەمىر تۇلپارلار شىعىنىن اقتاۋ ءۇشىن حالىق جوعارى تىعىزدىققا يە بولۋى كەرەك ياعني حالىق كوپ بولۋى شارت. سونىمەن بىرگە ەجەلدەن كەلە جاتقان پويىزدا وتىرۋ مادەنيەتى قالىپتاسقان بولۋى كەرەك.

ايتا كەتەرلىگى كارى قۇرلىق، جاپونيا، قىتاي پويىزدارى وزدەرىنىڭ جىلدامدىعىمەن تانىمال بولسا دا تەمىر جول جۇيەسىندەگى قىزمەت كورسەتۋ كولەمى جاعىنان ەشقانداي كومپانيا «ءۇندىستان مەملەكەتتىك تەمىرجولدارى» (Indian Railways) كومپانياسىمەن تەڭدەسە المايدى.

1832-جىلى نەگىزى قالانعان بۇل كومپانيا جىلىنا 350 ميلليون توننا جۇك، رەسمي تۇردە 6 ميلليارد جولاۋشى تاسىمالدايدى. 6 ميلليارد دەگەنىمىز شارتتى تۇردە.

سونشاما بيلەت رەسمي ساتىلعانىمەن، جولاۋشىنىڭ ناقتى سانىن ەشكىم ايتا المايدى. سەبەبى، ءىشى تۇگىل ۇستىندە قۇجىناعان كوپ ادامدارى بار ءۇندىستان پويىزدارىن كوپشىلىك كورگەن. جانە بۇل ءجيى-ءجيى قايتالانىپ تۇراتىن جاعداي.

Massaget.kz