قازاقستاندىق جاس ونەرتاپقىش شەتەلدىكىنەن 10 ەسە ارزان بيونيكالىق پروتەز جاساپ شىعارۋدا
ماۋلەن بەكتۇرعانوۆ «100 جاڭا ەسىم» جوباسى شابىت بەرەتىنىن ايتادى.
«مەن بيونيكالىق پروتەزدەردى جاساۋمەن اينالىسامىن. ءبىز الماتىدامىز. وسىمەن ءتورتىنشى پروتەزدى جاسادىق. شەتەلدىك پروتەزدەرمەن سالىستىرعاندا بىزدەگى باعا ون ەسە ارزان. ءاربىر كليەنتكە جەكە پروتەز جاسالادى، باعاسى 500 مىڭ تەڭگەدەن جوعارى. ترەناجەرلار، كۇش تۇسەتىن پروتەزدەردى، شىنتاق، اياق، پروتەزدەرىن جاسايمىز، ارباعا جەگىلگەندەردىڭ جۇرۋىنە كومەكتەسەتىن كورسەتتەردى جاساۋ جاعىن قاراستىرىپ جاتىرمىز»، - دەيدى ماۋلەن.
ونىڭ سەحىندا جاسالاتىن بالالارعا ارنالعان بيونيكالىق پروتەزدەردى قازاقستاندا ەشكىم جاساي المايدى. ايتا كەتەيىك، ماۋلەن اقمولا وبلىسىنداعى زەرەندى كولىنىڭ جاعاسىندا قۇرىلعان جاستار ءبىلىم بەرۋ لاگەرىنە قاتىستى.
«مۇنداي كەزدەسۋلەر، وزگەلەردىڭ قالاي بيزنەس اشقانىن، نەدەن باستاپ، نەندەي قيىندىقتارعا دۋشار بولعانىن ايتۋ جاستاردىڭ ويلاۋ قابىلەتىن جاقسارتۋ ءۇشىن وتە قاجەت. سوڭعى ەكى- ءۇش جىلدا جاستار اراسىندا ستارتاپتارمەن، قوسىمشالارمەن، روبوت تەحنيكاسىمەن اينالىسۋ ترەندكە اينالعان. وسى يندۋستريا قازىر دامىپ كەلەدى. جاستاردىڭ ىنتاسى قۋانتادى. 10 جىلدان كەيىن ولار جارىپ شىعادى دەپ ويلايمىن»، - دەيدى جاس ونەرتاپقىش.
ەسكە سالا كەتەيىك، اقمولا وبلىسىنداعى زەرەندى دەمالىس ايماعىندا جاستاردىڭ رەسپۋبليكالىق ءبىلىم بەرۋ لاگەرى اشىلدى. مۇندا جاستار ۇيىمدارىنىڭ باسشىلارى، كاسىپكەرلەر، «قازاقستاننىڭ 10 جاڭا ەسىمى» جوباسىنىڭ جەڭىمپازدارى - جالپى 300-دەن استام قاتىسۋشى كەلگەن. 12- تامىزدا باستالعان لاگەر جۇمىسى 16 -تامىزعا دەيىن جالعاسادى.
