رامازان ايىندا تىيىم سالىنعان 10 تاعام ءتۇرى

استانا. قازاقپارات - رامازان ايىندا ءوزىڭدى جاقسى، جەڭىل سەزىنۋگە دۇرىس تاماقتانۋدىڭ تيگىزەر اسەرى وتە كوپ.

ءبىر اي بويى كۇندىزگى ۋاقىتتا ءنار تاتپاي ءجۇرىپ، ءوزىڭدى سەرگەك ءارى جەڭىل سەزىنۋ مۇمكىن بە؟ ارينە، مۇمكىن. سونىمەن قاتار، ورازا ۋاقىتىندا ادەتتەگىدەن دە وزگەشە جەڭىلدىك سەزىنۋگە مۇمكىندىك بار.

رامازان ايىنىڭ ۇلىلىعىن سەزىنۋ ءۇشىن ورازانىڭ رۋحاني تۇسىنا باسا نازار اۋدارعانىمىز ءجون ەكەندىگى ءمالىم. ءتانىمىز عانا ەمەس، رۋحىمىز دا ورازا تۇتقان كەزدە اشتىق پەن ءشول مۇلدە باسقا كەيىپكە ەنەدى. دەگەنمەن، بۇگىن ءبىز ورازانىڭ فيزيكالىق تۇستارىن قاراستىرماقپىز. ەندەشە، كەيبىر تاماقتاردان باس تارتۋ ارقىلى ۇزاق ۋاقىت ءوزىمىزدى جەڭىل ءارى سەرگەك سەزىنە الامىز.

سونىمەن، ەرتەسى كۇنى شولدەپ ءارى قارنىمىز اشپاس ءۇشىن اۋىز اشار ۋاقىتتا جانە سارەسى كەزىندە مىنا تاماقتاردى تۇتىنۋدى مۇلدە توقتاتقان ءجون.

گازدالعان، ءتاتتى، قوراپتاعى سۋسىندار

ءبىزدىڭ ءتىزىمنىڭ باسىندا وسى سۋسىندار تۇرادى. اۋىز اشاردا ىشسەم شىركىن، دەپ كۇنى بويى مۇزداتىلعان كوكا- كولانى ويلاپ جۇرگەن كەزىڭىز بولدى ما؟ بەكەر، ادامنىڭ سىلەكەيى گازدالعان سۋسىندارعا قوسىلاتىن ءتاتتى حوش يىستەندىرگىشتەر مەن ءدام بەرۋشىلەردى اۋىز قۋىسىنان تولىقتاي جويا المايدى. سوندىقتان دا اۋىز قۋىسىندا ءتاتتى ءدام قالىپ قويعاندىقتان، شولدەي بەرەسىز. ليموناد پەن وزگە دە ءتاتتى سۋسىندار دا سول سەكىلدى.

اۋىزدى سۋمەن ەمەس، ليمونادپەن بەكىتپەك بولساڭىز، جاعدايدى مۇلدە ۋشىقتىراسىز. گازدالعان سۋسىن استىڭ اسقازاندا ساقتالۋ مەرزىمىن 4-5 ساعاتتان 20 مينۋتقا دەيىن قىسقارتادى. ناتيجەدە ءسىز تويعانىڭىزدى بىلمەي شەكتەن تىس تاماق جەيسىز، بۇل ءوز كەزەگىندە اس قورىتۋ جۇيەسىنىڭ بۇزىلۋىنا اكەلىپ سوعادى.

دامدەۋىشتەر

كۇماندى دامدەۋىشتەر (پريپراۆا)، سورپاعا ارنالعان قوسپالار، دۇكەننىڭ دايىن تاماقتارىنىڭ قۇرامىندا ناتريي گلۋتوماتى مولشەردەن تىس بولعاندىقتان، تەك ورازا كەزىندە عانا ەمەس ادەتتەگى ۋاقىتتا دا ءبىزدىڭ دەنساۋلىعىمىزعا ايتارلىقتاي زيانىن بەرەدى. ال رامازان ايىندا تازارىپ جاتقان اعزانىڭ وسال جەرى سول، بۇل دامدەۋىشتەر ءبىزدىڭ اعزامىزعا ناعىز ۋ بولىپ تابىلادى. ولار ءبىزدىڭ اعزامىزدى سورعىتىپ، قۇرعاتىپ جىبەرەتىندىكتەن، اۋزى ورازا ادام قاتتى شولدەپ، اش وزەگىنە ءتۇسىپ كەتۋى ىقتيمال.

جوعارى سۇرىپتاعى ۇننان ازىرلەنگەن تاعامدار

جوعارى سۇرىپتاعى ۇننان جاسالعان كەز كەلگەن نان ءونىمى كومىرسۋلاردىڭ بايىتىلعان جيناعى بولىپ تابىلادى. اق ۇننان جاسالعان ءبىر سامسا نەمەسە ءبالىش، ماكارون جەگەن ادام اعزاسىن گليۋكوزامەن شەكتەن تىس تولتىرادى. قانتتىڭ شەكتەن شىققان مولشەرىن جويۋ ءۇشىن قانعا ينسۋلين (ۇيقى بەزىنىڭ اعزاداعى كومىرسۋلاردىڭ الماسۋىن رەتتەيتىن گورمونى) اۋىر مولشەرمەن كەلىپ سوققى بەرەدى. وسىلاي تاماقتانعان ادام تەز تويىپ قالادى دا جارتى ساعاتتان سوڭ قاتتى قارنى اشا باستايدى. سوندىقتان دا، رامازان ايىندا جوعارى سۇرىپتاعى ۇننان ازىرلەنگەن تاعامداردى ۋاقىتشا توقتاتا تۇرعان دۇرىس. سوندا عانا اۋىز اشاردا جەگەن از عانا تاعامنان اعزامىزعا پايدالى زاتتار كوپ سىڭەدى.

قۇرامىندا كوفەينى بار سۋسىندار

كوفە جانە قۇرامىندا كوفەين بار سۋسىندار. بۇل سۋسىندارى شامادان تىس پايدالانعان كەزدە ولار اعزانى قۇرعاتىپ جىبەرەدى. اۋىز اشار ۋاقىتتا ءشاي نەمەسە كوفە ىشۋگە بولادى، ءبىراق ارتىنان كوپ سۋ ىشكەن دۇرىس.

سويا تۇزدىعى

اۋزىڭىزدى ەل اراسىندا سانگە اينالعان سۋشي- بارعا بارىپ اشۋدى جوسپارلاپ ءجۇرسىز بە؟ ولاي بولسا، سويا تۇزدىعىن بايقاپ پايدالانىڭىز. بۇل تاعام ءتۇرى ەلەكتروليتتىڭ تەپە- تەڭدىگىن بۇزادى دا قان قۇرامىنداعى ناتريي كوبەيىپ، سۋدىڭ توسىلۋىنا الىپ كەلەدى. ناتيجەدە ادام وتە بەلسەندى ءارى اشۋشاڭ بولىپ جۇرەدى، كۇنى بويى شولدەپ، شامادان تىس تەرشەڭ بولىپ كەتەدى ءارى كىشى دارەتكە دە ءجيى باراتىن بولادى.

مارينادتالعان كوكەنىستەر

بۇل كوكەنىستەردى دايىنداۋ بارىسىندا كوپ مولشەردە تۇز قولدانىلادى. ال، شامادان تىس پايدالانىلعان تۇز زات الماسۋ پروتسەسىن بۇزادى. 50 گرام تۇزدالعان كوكەنىس تاۋلىككە قاجەتتى تۇزدىڭ مولشەرىن ساقتاۋعا جەتكىلىكتى. ال ەگەر ول مولشەردەن اسار بولسا، پلازماداعى ءناتريدىڭ شەكتەن شىعۋىنا الىپ كەلەدى. تۇزدىڭ مولشەرى ۇلعايعان سوڭ سۋدىڭ توسىلۋى ورىن الىپ، دەنە ىسىنەدى. اسىرەسە، كەشكى ۋاقىتتا تۇزدى تاعامدى كوپ جەگەندىكتەن ىسىك انىق ءبىلىنىپ تۇرادى. تۇزدى كوپ مولشەردە پايدالانۋ شولدەتەدى، سۋدى شەكتەن تىس كوپ ىشكەندىكتەن، كوزدىڭ، بەتتىڭ جانە وزگە دە اعزانىڭ ىسىنۋىنە اپارىپ سوعادى.

دايىن تاڭعى استار

جىلدام دايىن بولاتىن بوتقالار (ميۋسلي، جۇگەرى ۇلپالارى، ءتاتتى تاڭعى استار) وتە ىڭعايلى ءارى پايدالى دەگەن اتپەن بەلگىلى. نەگىزىندە ولاردى ءجيى پايدالانۋ دەنساۋلىققا ايتارلىقتاي زيانىن تيگىزۋى ىقتيمال. سونىڭ ىشىنە سالماقتىڭ ۇلعايۋى. دايىن تاڭعى استار تولىقتاي كومىرسۋلاردان تۇرادى، سوندىقتان دا تويىمدى كەلەدى، الايدا بىرنەشە ساعاتتان سوڭ قارىندى قاتتى اشىرادى. سوندىقتان دا سارەسىنە دايىن تاڭعى استاردى پايدالانباڭىز.

مايونەز

بۇل تاعامنىڭ ءدامىن كىرگىزۋشى بولىپ تابىلاتىن ەڭ كۇشتى قوسپا. بۇل جەردە تابەتتى اشاتىن نەبىر قوسپالار (ۋكسۋس، تۇز، قىشا)، قانتپەن قاتار كوپ مولشەردە ترانس- مايلار بار. بۇل قوسپادان تىم بولماسا ورازا كەزىندە باس تارتۋعا تىرىسىڭىز. سوندا سىزگە اس قورىتۋ جۇيەڭىز العىسىن ايتادى.

پەچەنە، كامپيت سەكىلدى تاتتىلەر

بۇل تاتتىلەر قانداعى قانتتىڭ قۇرامىن ۇلعايتادى ءارى قۇنارلىعى وتە كۇشتى تاعام تۇرىنە جاتادى. بۇلاردىڭ قۇرامىندا پايدالى زاتتار مۇلدە جوق، سوندىقتان دا اشتىق سەزىمى لەزدە پايدا بولادى.

مايى الىنعان ءسۇت ونىمدەرى

ونداي ونىمدەردە ماي جوق بولعاندىقتان لاكتوزانىڭ ىدىراۋىن باياۋلاتادى. بۇل كەزدە ادام اعزاسى تاماقتى جىلدام قورىتاتىن بولعاندىقتان، قارىن دا تەز اشاتىن بولادى. تىم بولماسا %2,5  نەمەسە تابيعي ءسۇت ونىمدەرىن پايدالانعان ءجون، ولار ءسىزدىڭ ءبىراز ۋاقىت توق بولىپ جۇرۋىڭىزگە كومەك بەرەدى.

رامازان ايىندا رۋحاني ءارى فيزيكالىق تۇرعىدا مىقتى بولۋدى اللا تاعالا بارشامىزعا ءناسىپ ەتسىن!

 

 دەرەككوزى: Reactor