يسلانديا فۋتبولىنىڭ قىزىقتى 10 دەرەگى

استانا. قازاقپارات -كەلەسى جىلى رەسەيدە وتەتىن الەم چەمپيوناتىنا قاتىساتىن قۇرامالاردىڭ كوبىسى انىقتالىپ قويدى.

ەندى تەك قوسىمشا جولدامالارعا يەلىك ەتەتىندەر عانا قالدى. ەۋروپاعا بولىنگەن 13 كۆوتانىڭ بىرەۋى يسلاندياعا بۇيىردى.

سوڭعى تۋردا ارالداعى ەلدىڭ فۋتبولشىلارى كوسوۆونى جەڭدى (2:0). ءسويتىپ «I» توبىندا 22 ۇپايمەن ءبىرىنشى ورىنعا يە بولدى. 1930-جىلدان باستاۋ الاتىن الەم چەمپيوناتىنا قاتىسقان قۇرامالاردىڭ ىشىندە يسلانديا حالقى ەڭ از ەل بولىپ وتىر. بۇل ەلدە بار-جوعى 330000 ادام تۇرادى.

بۇعان دەيىن وسى رەكورد ترينيداد جانە توباگوعا تيەسىلى ەدى (1,3 ميلليون ادام).

وسى رەتتە يسلاندياعا قاتىستى 10 دەرەكتى ۇسىنامىز:

1. 2016-جىلعى فرانسيادا وتكەن ەۋروپا چەمپيوناتىندا يسلانديادان 30 مىڭ جانكۇيەر كەلگەن. بۇل ەلدەگى جالپى حالىقتىڭ 10 پايىزى. بۇعان دەيىن ەۋروپا چەمپيوناتىنا ءبىر مەملەكەتتەن وسىنشا جانكۇيەر كەلمەگەن ەكەن.

2. ەۋرو-2016 ءتۋرنيرىنىڭ توپتىق كەزەڭدەگى اۋستريا قۇراماسىمەن وتكەن سوڭعى ويىندى يسلاندياداعى تەلەكورەرمەندەردىڭ 99,8 پايىزى تاماشالاعان.

3. سول ماتچتى جۇرگىزگەن كوممەنتاتوردىڭ داۋىسى الەم جانكۇيەرلەرى ەسىندە ۇزاق ساقتالارى انىق. قوسىمشا مينۋتتا يسلانديا جەڭىس گولىن سوققانداعى پەرفورمانسى عالامتوردى شارلاپ كەتكەن بولاتىن.

ايتپاقشى، يسلانديا قۇراماسىنىڭ بارلىق ويىنىن كاسىبي فۋتبول جاتتىقتىرۋشىسى گۋدمۋندۋر بەنەديكتسسون جۇرگىزگەن.

4. يسلانديا قۇراماسىنىڭ ءوز قاھارماندارى بار. مىسالى، قاقپاشى حاننەس حالدوۋرسسون كاسىبي تۇردە جارنامامەن اينالىسادى. IKEA، Coca-Cola, Icelandair سەكىلدى برەند كومپانيالارعا روليك ازىرلەگەن. -  حاننەس 19 جاسىندا ءبىراز ۋاقىت فۋتبول ويناي الماي جۇرگەن. ويتكەنى وينايتىن كوماندا تاپپايدى. ءتىپتى ءۇشىنشى ديۆيزونداعى كلۋبتاردىڭ ءبىرى «بىزدە ەكى قاقپاشى بار، ءۇشىنشىسى كەرەك ەمەس»، دەپ جاۋاپ بەرگەن، -  دەيدى يسلانديا قۇراماسىنىڭ باس باپكەرى حەيمير حادلگريمسسون.

5. يسلانديا قۇراماسىنىڭ كاپيتانى ارون گۋننارسسون 15 جاسىنا دەيىن گاندبولمەن اينالىسقان. ەرەسەكتەر اراسىنداعى چەمپيوناتقا دا قاتىسقان. ءبىراق كەيىننەن گاندبولدى تاستاپ، فۋتبولدى باستاپ كەتەدى. ءسويتىپ 22 جاسىندا يسلانديا قۇراماسىنىڭ كاپيتانى بولدى. گۋننارسسون ارقاسىنداعى تاتيروۆكاسىمەن دە كوپشىلىككە تانىمال.

6. قۇرامانىڭ باس باپكەرى حەيمير حادلگريمسسون وتكەن جىلعا دەيىن يسلانديانىڭ حەيماەي دەپ اتالاتىن وڭتۇستىك ارالىندا دانتيست بولىپ قىزمەت اتقارعان. بۇل جاقتا 4000 ادام عانا تۇرادى. قازىرگى كەزدە حەيمير تەك تانىستارىنىڭ عانا ءتىسىن ەمدەپ بەرەدى. -  يسلانديادا باپكەرلىك -  اۋەسقوي جۇمىس. جالاقى تولەيدى، ءبىراق ءومىر سۇرۋگە جەتپەيدى. ونىڭ قاسىندا ءدانتيستىڭ جالاقىسى فۋتبول باپكەرىنەن ەكى ەسەگە كوپ، -  دەيدى حادلگريمسسون.

7. يسلانديادا فۋتبول فاناتتارى مەن كوماندالار اراسىندا وتە جاقىن بايلانىس ورناتىلعان. مىسالى، مىنانداي ءداستۇر بار ەكەن: ماتچ الدىندا كوماندانىڭ باس باپكەرى جانكۇيەرلەرمەن كەزدەسىپ، نەگىزگى قۇرامدى جانە ويىنعا قۇرعان تاكتيكاسىن تانىستىرادى. كوماندانىڭ باپكەرى نەمەسە ونىڭ اسسيستەنتىنىڭ سپورت-باردا جانكۇيەرلەرمەن كەزدەسۋى ءتورت جىلدان بەرى قالىپتى جاعدايعا اينالعان.

ءبىراق ول جەردىڭ وتە قاتاڭ ەرەجەسى بار: ياعني اقپاراتتى مەدياعا جاريالاۋعا، فوتو نەمەسە ۆيدەوعا تۇسىرۋگە تىيىم سالىنعان. ءالى كۇنگە بىردە-ءبىر مەديا باردا وتەتىن ماتچ الدىنداعى ماجىلىستەن بىردە-ءبىر اقپارات تاراتا العان جوق.

8. بەس جىل بۇرىن يسلانديا ف ي ف ا رەيتينگىندە 131-ورىندا بولاتىن، ال قازىر -  22-ساتىدا.

9. وسىنداي عاجايىپ ناتيجەلەردىڭ تىركەلۋىنە ويىن الدىنداعى موتيۆاتسيالىق ۆيدەولاردىڭ دا اسەرى بار ەكەن. مۇنىڭ ءبارى فۋتبولشىلاردى پسيحولوگيالىق تۇرعىدان شىڭدايدى. «ءبىز ماتچتاردان كەيىن ءاربىر ويىنشىنىڭ ءساتتى قيمىلدارىنان كليپ جاساپ شىعارامىز. الاڭدا ونەر كورسەتكەن فۋتبولشىلاردىڭ گول سوققان ءساتى نەمەسە پاستارى مەن فينتتەرى كورسەتىلەدى. ءبىر فۋتبولشىعا بەس سەكۋندتاي ۋاقىت بەرىلەدى. مۋزىكانى ءار جولى اۋىستىرىپ وتىرامىز.

ال ەۋرو-2016 چەمپيوناتىنىڭ توپتىق كەزەڭىندەگى ەكىنشى ويىننىڭ الدىندا باسقاشا جاسادىق. بۇل جولى فۋتبولشىلاردىڭ الاڭداعى قيمىلى ەمەس، ولاردىڭ اتا-انالارى، بالالارى مەن تۋىستارىنىڭ سۋرەتتەرىن جينادىق. نەگىزىنەن ستاديوندا پلاكات ۇستاپ تۇرعان فوتولار تاڭدالدى. سلايد- شوۋعا باياۋ مۋزىكا قويىلدى. كومانداعا بۇل ۆيدەونى كورسەتپەس بۇرىن ءوزىم بەس رەت قاراپ الدىم. سونىڭ بەسەۋىندە دە جىلادىم، -  دەيدى باس باپكەر حادلگريمسسون.

10. يسلانديا فۋتبولىنىڭ وسىنداي دەڭگەيگە جەتۋى -  بارلىق دەڭگەيدە ريەۆوليۋتسيانىڭ جۇرگىزىلۋىنەن. 2000-جىلداردىڭ باسىندا جاس فۋتبولشىلاردى اتا-انالارى جاتتىقتىرعان.

ال 10 جاستاعى بالانى رەسمي تۇردە ا نەمەسە ۆ كاتەگورياسى بار باپكەرلەر دايىندايدى. قازىرگى كەزدە ەلدە 848 كاسىبي فۋتبول جاتتىقتىرۋشىسى بار. ياعني 389 ادامعا ءبىر باپكەردەن كەلەدى.

ەلدەگى فۋتبولدىڭ باستى يننوۆاتسياسى -  فۋتبول ءۇيى. بۇل جەردە كەز كەلگەن اۋا-رايىندا دوپ تەبۋگە بولادى. مانەجدىڭ ىشىندەگى گازوننىڭ استىندا جىلۋ بەرىلەتىن مۇمكىندىگى قاراستىرىلعان.

العاشقى فۋتبول مانەجى 2000-جىلى سالىندى. ونى گەير تورستەينسسون ەسىمدى فۋتبول فەدەراتسياسىنداعى باسشىلاردىڭ ءبىرى تۇرعىزعان. كەيىننەن تاعى 10 وسىنداي فۋتبول ءۇيى پايدالانۋعا بەرىلدى. جالپى، قازىرگى كەزدە بارلىق ماۋسىمعا قولايلى 30 تابيعي الاڭ جانە 150 جاساندى الاڭ بار. كاسىبي فۋتبولشىلاردىڭ سانى 20 مىڭنان اسادى.

بەك تولەۋ،

جۋرناليست

استانا