مەككەنى 10 جىل باسقارعان قازاق
اراب ەلىندە بەيبارىس سۇلتاننان كەيىن، ساۋد ەلى پاتشاسىنىڭ وڭ قول ۋازىرلىگىنە جانە مەككە قالاسىنىڭ اكىمى لاۋازىمىنا دەيىن كوتەرىلگەن، ساۋد- ارابيا ەلىنە «ەڭبەگى سىڭگەن گەنارال»، مينيستر دارەجەلى اسكەري باسشى.
ءابدوللانىڭ ءوز ەسىمى - شاكەن سارى ۇلى. 1927 -جىلى قىتايداعى ءور التايدىڭ شىڭگىل اۋدانىندا تۋعان، ورتا ءجۇز كەرەي ىشىندەگى سارباس رۋىنان. 1940-جىلى قازاقتى قىناداي قىرعان دۇڭعان مافۋفاڭنىڭ تالاۋىنا ءتۇسىپ، 13 جاسىندا تۋعان ەلىنەن ايىرىلىپ، ساۋداگەر ۇيعىرعا ساتىلىپ كەتكەن. 1941 -جىلى سول ۇيعىرمەن بىرگە ساۋد- ارابياعا بارىپ، سوندا قالعان. مىنە وسىلايشا بەيبارىستىڭ تاعدىرىن قايتالاعان تاعى ءبىر الىپ تۇلعا ومىرگە كەلدى.
اكەسى سارى اتاسى ۇرزىكەنىڭ قول استىندا بالۋان، باتىر، وجەت مىنەزدى، ەلپەك بولىپ، اعاسى بۋراتايدىڭ ەل باسقارۋىنداعى باس قولعاناتىنا اينالعان. اكەسى سارى ۇرزىكە ۇلى، كەڭ يىقتى، قاپساعاي دەنەلى، بۋراتاي اۋىلىنىڭ 500 جىلقىسىن شىرعاسىن شىعارماي قايىراتىن مىقتى پالۋان ەكەن.
اناسى زاۋكە - كەرەي، جانتەكەي ىشىندە تاسبيكە، اتاقتى ءالىپ باتىردىڭ نەمەرە تۋىسى قۇسايىن ءتايجىنىڭ قىزى. قوڭقاق مۇرىن، سارعىش كەلگەن، بيىك بويلى، قايراتتى دا مىعىم ايەل بولعان. جاستايىنان ەركەكشە كيىنىپ، جىلقى باققان ەكەن.
ايەلى زامزيا - اراب قىزى.
ۇلدارى: بايسال، ادىنان، ءادىل. قىزدارى: ءناديا، ءابدىسام، ءساميا، ءاريش.
بۇرىنعى ايەلىنەن تۋعان ءبىر قىزى بولعان، ەسىمى بەلگىسىز.
شاكەن سارى ۇلى 1941 -جىلى اسىراپ العان ۇيعىر اكەسىمەن بىرگە ساۋد- ارابيا ەلىنە كەلگەن. 1942 -جىلدان باستاپ مەككە قالاسىنداعى جەتىم بالالار ۇيىندە تاربيەلەنگەن.
1946 -جىلى مەككە قالاسىنداعى مەملەكەتتىك اسكەري ۋنيۆەرسيتەتكە قابىلدانادى. شاكەن وقۋ بىتىرگەسىن مەككە قالاسىندا جول ساقشىسى بولىپ ىستەگەن. كەيىن شەكارا قورعانىس ارمياسىندا، شەكارا قورعانىسىنىڭ ەسىرتكىمەن كۇرەس بولىمىندە ماڭىزدى قىزمەتتە بولادى. ەكى رەت مەملەكەت تاراپىنان ماراپاتتالعان. اتاپ ايتقاندا، «ەرەكشە ەڭبەگى ءۇشىن» ماراپاتى مەن «مەملەكەتكە ەڭبەگى سىڭىرگەن گەنارال» اتاعى بەرىلىپ، مينيستر دارەجەلى اسكەري قىزمەتكەرگە اينالادى. وتكەن عاسىردىڭ 70-جىلدارى مەككە قالاسىنىڭ اكىمى مىندەتىن 10 جىلعا تاياۋ اتقارعان كەيىن ساۋد پاتشاسىنىڭ كومەكشىسى، ءۋازىرى قىزمەتىنە دەيىن كوتەرىلگەن. 1992 -جىلى زەينەتكە شىعىپ تۋعان جەرى باركول قازاق اۆتونوميالى اۋدانىنا بارىپ قايتتى.
ءوز ومىرىندە 39 مارتە قاجىلىق ەتكەن شاكەن قاجى سارى ۇلى 2000 -جىلى ساۋد- ارابيانىڭ جيددا قالاسىندا 73 جاسىندا دۇنيەدەن ءوتتى.
قازىر بەلگىلى بولعانداي: شاكەننىڭ 2 ۇلى ۇشقىش، ءبىر ۇلى ادنان شاكەن ۇلى ءال- بۇحاري اكەسىنىڭ جولىن قۋعان جوعارى لاۋازىمدى قىزمەتتە.
قايرات قايپوللا ۇلى
atazhurt2050.kz/
