قىتاي تۇرمەسىندە جاتقان قازاقستاندىق جۇرگىزۋشى 10 جىلعا سوتتالۋى مۇمكىن

استانا. قازاقپارات - جۇك كولىگىنىڭ جۇرگىزۋشىسى بولىپ جۇمىس ىستەيتىن سەمەي قالاسىنىڭ تۇرعىنى ەۆگەني ميرونوۆقا قىتايدىڭ شەكاراسىندا كىسەن سالىندى.

ونىڭ كولىگىنەن پنيەۆماتيكالىق قارۋدىڭ ەكى قوراپ وعى شىققان. بۇل تۋرالى altaynews.kz حابارلادى.

قىتايدان جۇك تاسيتىن جۇرگىزۋشى قازىر كورشى ەلدە قاماۋدا جاتىر. قىتاي شەكاراشىلارى كولىكتى تەكسەرۋ بارىسىندا، ۇساق- تۇيەك زاتتار سالاتىن قالتادان ىشىندە 715 وعى بار ەكى قوراپتى تاۋىپ الدى. كورشى ەلدىڭ ارنايى قىزمەت وكىلدەرى جەرلەسىمىزدى تۇتقىنداعالى ءبىر ايدان استام ۋاقىت ءوتىپتى. سوتتى كۇتىپ، شاۋەشەك قالاسىنداعى ۋاقىتشا تەرگەۋ يزولياتورىندا جاتقان 42 جاستاعى قازاقستاندىق جۇرگىزۋشى 10 جىلعا باس بوستاندىعىنان ايىرىلۋى مۇمكىن.

جۇبايىنىڭ ايتۋىنشا، قازىر ەۆگەني ميرونوۆپەن ەشقانداي بايلانىس جوق.

«كونسۋل كەزدەسىپ، سويلەسكەن ەكەن، دەنساۋلىعى جاقسى، ءبارى دۇرىس دەگەننەن باسقا ەشتەڭە ايتقان جوق. كۇيەۋىم وقتى باقشاداعى قارعالاردى ۇركىتۋ ءۇشىن قازاقستاندا ساتىپ العان. بىزدە ونى ساتىپ الۋعا ەشقانداي رۇقساتتىڭ كەرەگى جوق. ول كوبىنەسە رەسەيدەن جۇك تاسيتىن، ويلاماعان جەردەن قىتايعا باراتىن بولىپ قالدى دا، كولىكتىڭ ىشىندە جاتقان وقتى ۇمىتىپ كەتكەن، - دەيدى جۇرگىزۋشىنىڭ جۇبايى ەلەنا ميرونوۆا.

شەكارادان وق- دارىلەردى الىپ ءوتتى دەپ ايىپتالعان ەۆگەني ميرونوۆتىڭ سوتى تامىزدىڭ ىشىنە بەلگىلەنگەن ەكەن. ميرونوۆتار وتباسى بىردەن ەلىمىزدىڭ سىرتقى ىستەر مينيسترلىگىنە حابارلاسىپتى. ازىرگە، اتالعان ءىستىڭ انىق- قانىعى زەرتتەلىپ جاتىر.

Baq.kz